Depresión de Sarrión

De Biquipedia
Ir a la navegación Ir a la búsqueda
Envista de la val d'Olba, en lo cabaixo de la depresión de Sarrión.

La depresión de Sarrión u depresión de La Puebla de Valverde-Sarrión ye una antiga cuenca sedimentaria que se formó entre lo macizo de Chabalambre y las serranías de Gúdar, y que se plenó con sedimentos d'edat neochena.[1]

Se situa a lo nordeste de la sierra de Chabalambre, a l'este de la sierra de Camarena, a lo sudeste de la sierra de los Cabezos y a lo sud de la depresión de Rubiuelos (cabaixo de las serranías de Gúdar). Enta l'este contina a traviés de las depresions de Millars meyo y de Palancia.[1]

Cheolochía estructural[editar | editar código]

Por debaixo de los materials d'edat neochena bi ha rocas sedimentarias de lo Cretacio inferior (destacando las facies Weald), en una disposición monoclinal entre lo Churasico de lo macizo de Chabalambre y lo Cretacio de las serranías de Gúdar. En las foces que ha formau lo ret fluvial de Millars afloran los materials cretacios.

Bi ha unas fallas de 200 a 300 m en contacto con las serranías de Gúdar que corresponden a una etapa de deformacions de lo Plioceno superior quan s'alzoron en forma de domo los macizos de Chabalambre y Gúdar, deformando-se la superficie d'erosión fundamental de zaguers de lo Terciario, lo que creyó la disposición fundida actual.

Cheomorfolochía[editar | editar código]

En la depresión de Sarrión destaca un modelau con glacis y foces. Tamién bi ha muelas, faixas fluvials y toscars con formación de calsineras travertinicas.

Dende lo macizo de Chabalambre baixan dos glacis que ocupan buena part de la superficie de la depresión: lo de Sarrión y lo de La Puebla de Valderde, encaixando-se lo segundo bells 20-40 m en lo segundo. Estos glacis no cubren la superficie en lo sector nordoriental, a on que bi ha muelas.

Los atros glacis y las faixas fluvials de Millars son mes recients que no los dos glacis. En lo cabalto de la depresión los encaixamientos fluvials son modestos,[2] pero en lo cabaixo son espectaculars, plegando dica bells 300-400 en las foces de Millars.[3]

Referencias[editar | editar código]

  1. 1,0 1,1 (es) Jose Luís Peña Monné et al. : Geomorfología de la Provincia de Teruel. Instituto de estudios turolenses, 1984. pp 80-81.
  2. (es) Mateo Gutiérrez Elorza, José Luis Peña Monné: Las formas del relieve de la provincia de Teruel. "Cartillas Turolenses Nº 7º". Instituto de Estudios Turolenses, 1990. pp. 45-46.
  3. (es) José Luis Peña Monné, Luis Alberto Longares Aladrén, Marta Espinalt Brillas: Paisajes naturales de la provincia de Teruel. Guía del medio natural. Instituto de Estudios Turolenses, 2000. pp 109-111.

Bibliografía[editar | editar código]