Faixa fluvial
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Una faixa fluvial ye una plana que bi ha a cantos d'o cauz d'un río, plana que enantes yera parte d'una antiga plana d'inundación d'ixe río, pero que dimpués quedó dencima d'a vinient plana d'inundación, que s'ha desembolicau debaixo mientres o río va erosionando a plana anterior. O cabo d'una faixa fluvial enta o cauz ye una ripa baixo a que bi ha atra faixa fluvial u la plana d'inundación actual d'o río. Si en ixa ripa aflora verticalment la roca subchacent, la faixa ye una faixa fluvial pendida.
A formación de faixas fluvials puet estar favoreixida por:
- Alternancia de periodos secos y pluviosos.
- Cambios climaticos que han malmeso a vechetación y por ixo tamién han facilitau a erosión.
- Variacions eustaticas d'o livel d'a mar.
- Elevación d'o terreno por movimientos tectonicos.
A interpretación d'as faixas fluvials d'a val d'Ebro ha teniu bell cambio, agora se crei que en os periodos secos os ríos levan menos augua, no podendo trasportar totz os materials que levaban en os periodos humidos, y rematan erosionando sectors d'a plana d'inundación, dixando materials sin erosionar en as dos marguins.
En a val d'Ebro os terrenos d'as faixas fluvials gosan estar més fertils que os atros terrenos d'arredol y tradicionalment s'ha puyau l'augua d'o mesmo río con l'aduya de zutes y zaicas.
Como una faixa fluvial ye por d'encima d'o nivel d'inundacions d'o río y ye un terreno fertil, ye un lugar tradicional d'edificación de casas y d'establimiento d'aldeyas, lugars y ciudatz, como por eixemplo Alcanyiz.