Crepaza
- Pa la ferida en as mans, se veiga crepaza (lesión).
Una crepaza[1][2], crebaza[1][3][4] u crepa[1][2] (d'o latín < CREPARE)[5] ye una ubertura irregular entre dos piezas mal encaixatas. Ye tamién o espacio vueito que desepara dos partis d'un obchecto, una masa u una superficie trencata.
Gosa parlar-se de crepazas en a piel, en as parez d'un edificio, en a tierra, en os glaciars, etc... Tienen oríchens muit diferents y penden a sobén d'o puesto y a forma en que se producen, pero por un regular a suya causa ye a trencadura d'una superficie richida.
En a superficie d'a Tierra se producen por acción d'os movimientos tectonicos y –en edaz cheolochicament luent unas d'atras- han tenito grans dimensions. Se pueden decir tamién crepazas –sin estar-lo propiament- determinatas erosions provocatas por l'augua corrient en superficies muit cerenyas pero solubles, como en as calsineras.
En a piel y a fusta d'os árbols, entre atros, ye producita por a desaparición d'a humedat que li da flexibilidat.
En un suelo pavimentato u en un muro de mampostería se producen en asentar-se en o terreno a obra edificata, por defecto d'os alacez y pueden estar causa de ruina d'un edificio.
En un glaciar se producen por o desplazamiento d'a masa glacial sobre un fundo irregular y tamién por as diferents velocidaz de desplazamiento d'o chelo d'o glaciar, que s'eslisa mas a escape en as partis centrals que en as partis que frotan con o terreno u os costatos d'a val. Pueden tener entre bels poquez metros dica una mica mas de cincuanta, ya que por debaixo –y debito a la relativa plasticidat d'o glaciar- a gran presión d'a masa chelata lis emboza. Muito a sobén, con os nevazos, se creyan puents de nieu, que a vegatas cubren de tot a crepaza u nomás a suya superficie, estando a suya gordaria y solideza variables, representando un d'os periglos mas importants ta a practica de l'alpinismo.
Eixemplos d'uso
[editar | modificar o codigo]Referencias
[editar | modificar o codigo]- ↑ 1,0 1,1 1,2 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ 2,0 2,1 2,2 Fernando Blas Gabarda y Fernando Romanos Hernando, El Aragonés de Baixo Peñas; Institución «Fernando el Católico» + Gara d'Edizions, 2005. ISBN 84-8094-054-9
- ↑ (es) José María Satué Sanromán Vocabulario de Sobrepuerto: léxico comentado de una comarca despoblada del Altoaragón, Instituto de Estudios Altoaragoneses, 1991, ISBN 84-86856-48-5, p.35
- ↑ (es) Ana Leiva Vicén:Léxico aragonés de Antillón (Huesca). Análisis lingüístico (I). Alazet: Revista de Filología Nº 15, 2003, pp. 65-151, ISSN 0214-7602
- ↑ (es) María Pilar Benítez Marco L'ansotano. Estudio del habla del Valle de Ansó, Gubierno d'Aragón, 2001, ISBN 9788477538554, p.265
- ↑ Fernando Romanos y Fernando Sánchez. L'Aragonés de A Fueba. Bocabulario y notas gramaticals. Consello d'a Fabla Aragonesa, 1999. ISBN 36-86036-68-2.
Se veiga tamién
[editar | modificar o codigo]| Control d'autoridaz |
|
|---|
