Corvus corax

*Corvus corax*
Cuervo cracrando (Corvus corax)
Denominacions populars
cuervo, corvaz / corvazo, cuervazo, corvachina, cuervo burrero, cuervo carnicero, alforchero, volaco
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Passeriformes
Familia:	Corvidae
Chenero:	Corvus
Especie:	C. corax
Descripción
Corvus corax Linnaeus, 1758
Distribución cheografica
Distribución d'es cuervos per o mundo

O cuervo^[1] (nombre cientifico Corvus corax (L., 1758)) ye un muixón d'a familia d'es corvidos de bels 65 – 70 cm de lonchitut, y 105 – 120 cm d'amplaria d'alas, estando asinas o mes gran animal adintro d'ista familia d'aves.

Ye una especie de distribución cuasi homochenia en tot l'amplo de l'hemisferio norte, en Eurasia y America d'o Norte, especialment per causa d'a suya versatilidat alimentaria. Es solos puestos a on no se vei guaire son ixes a on abundan altras especies similars que compiten con éls, como las cuervas y grallas, como también en as ciudaz.

Nombres

O nombre mas cheneralizato pa ista au en Aragón ye cuervo^[2], denominación rechistrada en puestos como Echo, Lanacha, as Corz, Salas Altas, Sobrarbe y as provincias de Zaragoza y Teruel.

Per o suyo aspecto fisico se l'ha trafulcato a sobén con a cuerva, asumindo-se popularment bellas vegadas que en yera o masclo d'a mesma especie, per estar mes gran que no ixa altra ave, y basando-se en os pareixius d'es dos animals, se gosa a emplegar a (erronia) expresión "cuervo masclo" ta designar iste animal en contraposición con l'altro. En bellas parlas tamién se fan refrencias enta la suya mida achuntando-ie formas aumentativas ta lo nombre con o sufixo -az(o): corvaz^[1]^[2]^{[nota 1]} en Benás y Grist u corvazo^[2]^[1]^{[nota 2]} en Benás, Castilló de Sos, Grist y Veri u cuervazo^[1]. Tamién se rechistran os nombres corvachina^[1] y curbeta^[2], iste zaguero en Lobarre.

También per es suyos costumbre carronyadors se'n diz cuervo burrero^[1]^[2] en mutos puestos como Alquezra u Salas Altas y cuervo carnicero^[1]^[2]. En Alquezra se diz tamién alforchero^[1]^[2] y en Pandicosa volaco^[1]^[2]. En Lanacha ye tamién rechistrata a denominación de cuervo de cocote gordo^[2].