Cornualla (Bretanya)

Cornualla Bro-Kernev
Provincia de Bretanya
Bandera
Entidat  • Estato  • País	Provincia Francia Bretanya
Capital	Kemper
Superficie  • Total	5 979 km²
Población  • Total (1999)	456.307 hab.
Creyación	865
A provincia de Cornualla en Bretanya

Cornualla (en bretón Kernev, Bro-Kernev, en francés Cornouaille) ye una d'as comarcas tradicionals ("países", en bretón broioù) en que se dividiba l'antiga Bretanya. O suyo nombre fa referencia a o país de Cornualla, en a Gran Bretanya, con o que no s'ha de confundir (d'a mesma traza que Devon feba referencia a l'antiga Dumnonia). Tien una superficie de 5.979 km² y una población de 456.307 habitants seguntes o censo de 1999, y agrupa 218 municipios. O suyo prencipal centro y capital ye a villa de Kemper

Seguntes se creye, o nombre quereba decir o cantón d'os foranos, y feba referencia a l'acantonamiento que i tenioron os celtas por parti d'anglos y saxons. Ta mirar d'esfensar as costas d'a Galia d'as incursions d'os corsarios escotos y saxons, d'o 287 a o 293 Carausius y Alecto organizoron un territorio deseparato en as costas d'a mar d'a Manga tal evitar os ataques, pero Constancio I la tornó a l'Imperio román. I viviban os osismii, pueblo celta, pero en o sieglo VI o territorio fue colonizato intensivament por britans procedents d'as islas. Ya lo heban intentato mientres o reinato de Valentinián I en 370.

A Cornualla armoricana se decumenta por primera vegata y indreitament entre 852 y 857 quan «o bispe de Saint-Corentin», Anaweten, ye qualificato de cornugallensis (derivato latín de Cornugallia). Mientres o sieglo IX fue un contato feudal y a sobén recibió o nombre de Poher, pero una vegata s'unificó o Ducato de Bretanya o poder politico pasó a l'arcebispe de Kemper. Quan en 1791 se fació a nueva división en departamentos, fue repartita entre os de Mor-Bihan y Costas d'Armor.

Toponimia

En aragonés se decumenta iste toponimo referindo-se a la merluça de Cornualla en textos provinients de Chaca.