Cleta de sustens de Cardrona

A cleta de sustens de Cardrona (en anglés Cardrona Bra Fence) ye una atracción turistica polemica de Nueva Zelanda (rechión d'Otago), que consiste en una cleta rural plena de sustens penchaus. A cleta se troba a o costau d'una carretera publica, adchacent a uns terrenos, en a val de Cardrona, a o sud-ueste de Wanaka.

A cleta de sustens prencipió en bel inte entre Nadal y cabo d'anyo de 1999, cuan os sustens de cuatro mullers fuoron penchaus en o filo d'arambre d'a cleta chunto a la carretera, por razons desconoixidas. A noticia s'estendilló, y ascape mas sustens prencipioron a apareixer. O numero d'istos continó incrementando-se a mida que se feba mas conoixida. En primerías de 2006, bi heba mas de 800 sustens en l'arambrada. Bels locals dioron a bienvenida a la cleta en considerar-la como atracción turistica, atros la consideraban una monstruosidat y vergonya, y tamién un periglo potencial ta os conductors que emplegaban a carretera.^[1]

O 28 d'abril de 2006, dimpués de descubrir que a cleta se trobaba en un espacio reservau a la carretera publica, o consello local determinó que a cleta yera una monstruosidat y un periglo y ordenó sacar os sustens d'a cleta.^[2]

A eliminación d'a cleta levo en l'anyo siguient a protestas mirando de fer a mayor cadena de sustens d'o mundo en un festival anyal celebrau en a vecina localidat de Wanaka. A cadena plegó dica os 7.400 sustens, mas de 100.000 por debaixo d'o record mundial, encara que replegó mas de 10.000 $ ta obras de caridat.^[3]

A cleta de sustens se troba actualment amán d'a destilería de Cardrona. En l'anyo 2015 fue rebaptizada, ya en a suya nueva ubicación, como "Bradrona" (chuego de parolas entre "Bra", sustén en anglés, y "Cardrona"), convertindo-se a mas en una iniciativa que ha reculliu, en una caixa situada en o mesmo puesto, mas de 30,000 $ en a luita contra o cáncer de mama.^[4]