Chinchipera

Chinchipera^[1]^{[nota 1]} u chinchipela^[1]^{[nota 2]} son variants d'o nombre chenerico que s'emplegan cadaguna en diferents puestos de l'Alto Aragón ta decir-ne de tot un faixo d'especies de muixons (paseriformes) con caracteristicas alto u baixo similars, anque no necesariament tienen relacions filocheneticas d'entre ellas. Per l'usual, se i diz chinchipera a cualsiquier muixón de mida chicota (a redol d'os 15 cm de lonchitut), que vuele distancias curtas batendo rapedo las alas y deixando de bater-las a intervalos, que per tierra se i desplace fendo saltez, y cuan se posa en un palo u puesto en alto bata la coda periodicament. Solen estar especies omnivoras anque en a suya dieta i predominen os insectos, mas que no en altros tipos de muixons.

Os tres termins tienen probablement una radiz onomatopeyica en a canción que ye pareixita en as diferents especies d'estes animals, que se siente muto a sobén per o mont: un biaz de «chin-chin paa», ixo ye, una secuencia de dos notas agutas y breus, de timbre metalico, seguitas per una mas ubierta y prolongata.