Celula eucariota

De Biquipedia
Ir a la navegación Ir a la búsqueda
Este articlo trata sobre as celulas eucariotas, ta atros emplegos d'a parola eucariota, se veiga Eucariota (desambigación).

Celulas eucariotas son as celulas que tienen o suyo material heredable (información chenetica) a dintro d'una doble membrana, a membrana nucleyar, que les determina un nuclio celular. Os organismos que son feitos de celulas eucariotas sen gosa decir eucarionts.

L'alternativa a esta organización celular ye la que tienen as clamadas celula procariota. En ixas atras celulas, o material hereditario ye simplament disperso por dintro d'o citoplasma. A mayoría de celulas procariotas tienen atras envueltas por fuera d'a suya membrana plasmatica, mientres que d'entre os eucarionts no en tienen si que os fongos y as plantas.

Organización[editar | editar código]

En comparanza con as celulas procariotas, as eucariotas tienen o citoplasma muit compartimentado, con organelas deseparadas u qualques vegadas interconectadas, totas ellas bien independizadas con membranas biolochicas que son d'a mesma naturaleza esencial que a membrana plasmatica d'a celula. O nuclio ye lo más notable y caracteristico d'os compartimentos que trestallan o protoplasma. O protoplasma tiene tres components esencials que son a membrana plasmatica, o nuclio celular y o citoplasma, estando este zaguer a suma d'as organelas, estructuras y o citosol. As celulas eucariotas son dotadas d'un citoesqueleto complexo, muit estructurato y dinamico, feito de microtubulos y filamentos proteicos.

A demás, muitos tipos d'eucarionts tienen paretes celulars, como os fongos u as plantas, o bela atra suerte de cubierta por defuera d'a celula.

Fisiolochía[editar | editar código]

Quasi totas as celulas eucariotas tienen mitocondrias, as quals seguntes a Teoría d'a Endosimbiosi, serían o zaguer producto d'una asociación simbiotica escaíta d'entre una bacteria antiga (u bell atro procariota), y d'estas organelas n'obtienen a suya capacidat de fer metabolismos aerobios (respiración de l'oxicheno), muito més afavoreixedors enercheticament. Ye prou important a dependencia cheneralizada d'os eucarionts respecto d'a respiración aerobia que en a gran mayoría d'as especies actuals s'ha perdido a grans rasgos a capacidat de fer metabolismos alternativos (anaerobiosi, fermentacions, ecetra.). Bi ha, a la contra, bells eucariotas que han modificado as suyas mitocondrias en convertindo-las en atras estructuras como os hidrochenosomas.

Qualques atros eucarionts fan a fotosintesi, perque tienen en o suyo citoplasma organelas ditas plastos, que les ne permiten. A mesma Teoría d'a Endosimbiosi tamién en fabla, d'estas organelas, ubicando as suyas orichens en l'asociación de bellas celulas eucariotas con procarionts d'o grupo d'as cianobacterias.

Encara que d'entre as multiples variedatz de celulas eucariotas s'amuestren diferencias que se son a destacar, totas ellas comparten caracteristicas fundamentals d'a suya organización celular, y una sorprendent homochenidat en tot lo que environa la suya bioquimica y metabolismo. Asinas, as celulas eucariotas, y por extensión totz os eucarionts forman un grupo d'organismos fuertement contraposados con os procariotas, os quals se caracterizan por a suya gran diversidat fisiolochica.

Organismos eucarionts[editar | editar código]

L'articlo prencipal d'esta sección ye Eukarya.

Os organismos eucarionts son os que forman o dominio Eukarya (u Eukaryota), incluindo-se-ie muitos d'os millor conoixius a dintro d'os quatre reinos: Animalia (animals), Plantae (plantas), Fungi (fongos) y Protista, os quals tamién incluyen totas as especies fosils pluricelulars que s'estudean mudernament.

Esquema d'una tepica celula eucariota[editar | editar código]

Biological cell.svg
  1. Nucliolo.
  2. Nuclio.
  3. Ribosoma.
  4. Vesicla.
  5. Reticlo endoplasmatico rugoso.
  6. Aparello de Golgi.
  7. Microtubulo.
  8. Reticlo endoplasmatico liso.
  9. Mitocondria.
  10. Vacuola.
  11. Citoplasma.
  12. Lisosoma.
  13. Centriolos.

Se veiga tamién[editar | editar código]