Eukaryota

Este articlo trata sobre lo dominio taxonomico Eukarya. Ta atros emplegos d'a parola eucariota se veiga Eucariota (desambigación).

Eukaryota
Clasificación scientifica
Dominio: Eukarya u Eukaryota
Reinos
Animalia - Animals Fungi - Fongos Plantae - Plantas Protista

Eucariota (cientificament, en latín, Eukarya u Eukaryota, termino que dimana d'o griego «eu», d'o griego bien u buen, y «karyon», centro u nuclio; en conchunto se puede interpretar como «Bien nucleyau/da») ye lo dominio d'os organismos que tienen as celulas con verdaders nuclios. A sobén fa referencia a las celulas que composan estes organismos: as celulas eucariotas.

O conchunto d'os organismos eucariotas incluye dende os organismos pluricelulars en dó que las celulas son especializadas en fer fayenas concretas y talment les sería imposible de sobrevivir anisoladas, dica las muitas (anque no totas) especies unicelulars. A resta d'altros organismos vivos (toz unicelulars) se cuaternan adintro d'os altros dos dominios: Archaea y Eubacteria.

Pertenixen a lo dominio Eukarya cuatro reinos: Animalia, Plantae, Fungi y Protista. Toz ellos tienen caracteristicas parellanas a nivel molecular (estructura d'os lipidos, proteinas, y chenoma) y tienen antipasaus comuns. Se piensa que las suyas orichens fincan fa bellas 2 mil millons d'anyadas, tot y que l'alcuerdo no ye unanime. Fósils previos no s'han puesto clasificar facilment.

As primeras trazas que poderían relacionar-se con os grupos modernos d'eucariotas emprenciparon a apareixer fa uns 800 millons d'anyos, mientres que la mayoría d'os grupos fósils que hu se tienen bien definius no apareixioron dica lo Cambrico.

Protozoario Paramecium aurelia, un eucariota unicelular.

Os eucariotas s'han cuaternau en cuatre reinos: Protista, Plantae, Animalia y Fungi, que poderían estar cinco seguntes Cavalier-Smith (os anteriors mas o reino Chromista) u encara muitos mas perque bels autors heban considerau que muitos d'os organismos unicelulars habrían d'estar clasificaus a desparte, fendo puyar ixa posible cifra de reinos dica la ventena.

O reino Protista ye lo que en taxonomía se clama un grupo parafiletico. Ixo quier decir que los suyos miembros han estau en muitos casos cuaternaus asinas perque simplament no casaban mica bien adintro d'altras agrupacions; ye per ixo que que la suya diversidat ye similar a la diversidat fundamental d'os eucariotas.

En a recient clasificación de Adl et al. (2005) s'evitan os problemas d'a clasificación adintro de reinos substituyindo-ie estes taxons per un numer de grupos filochenicament emparentaus ta los que no s'aplica garra categoría con finalidat de no tener o problema d'a suya posterior actualización. En esta clasificación, os grans clados serian estes:

• Amoebozoa (cualques amebas u ameboflachelaus)
• Archaeplastida (incluye Plantae d'entre altros grupos)
• Chromoalveolata (como lo suyo nombre indica, incluye Alveolata y altros grupos que feban parte d'o reino Chromista proposato por Cavalier-Smith en 1981).
• Excavata (incluye bels protozous flachelaus, ameboides o ameboflachelaus)
• Opisthokonta (incluye Fungi y Animalia, d'entre altros)
• Rhizaria

Se veiga que las formas ameboides o flachelars no indican pertinencia a garra grupo, como s'heba creyiu enantes, sin de creyar nuevos grupos artificials dende lo punto d'envista evolutivo.

Se veiga tamién

• Sistema de nomenclatura binominal.
• Clasificación cientifica.
• Celula eucariota.
• Prokaryota.
• Dominio (biolochía).
• Reino (biolochía).

Referencias

• Datos: Q19088
• Multimedia: Eukaryota / Q19088
• Especies: Eukaryota