Cabezo d'Alcalá
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Lo Cabezo d'Alcalá ye un important chacimiento arqueolochico que se troba en lo termin municipal de Zaila (Baixo Martín, Teruel, Aragón) que ha proporcionau muitos repuis, porque se i han feito excavacions dende fins de lo sieglo XIX.[1] Las troballas s'escalonan dende la I Edat de Fierro dica la época de Chulio César. La estratigrafía ha dato 3 livels: Campos d'Urnas tardanos (I Edat de Fierro), cultura iberica (II Edat de Fierro) y ciudat ibero-romana.
Se crei que lo livel iber corresponde con lo toponimo conoixiu por atras fuents (monedas por eixemplo) Sedeis, Sedeiskem, capital de los ibers sedetans. Manimenos Miguel Beltrán Lloris crei que corresponde con Beligion.
La ciudat ibero-romana ye la que ha dato mes información. Paradochicament las inscripcions en alfabeto iberico son de lo livel ibero-romano. Tamién ye paradochico trobar-se palabras celtas como belenos; esto s'interpreta como que la cultura iberica s'estendió por la val d'Ebro sobre un sustrato cultural indoeuropeu de la I Edat de Fierro. Bi ha un templo on se troboron estatuas de bronce: un toro con una roseta hexapetala en la frent y repuis d'atra que yera un ombre con un caballo.
Se crei que atacoron la ciudat ibero-romana en una guerra civil romana (bels investigadors creyen que en las Guerras Sertorianas, 72 aC-76 aC), pero bi'n ha beluns creyen que estió mas tarde, en lo 49 aC. Cosa curiosa ye que pa puyar ta la ciudat calió fer una rampa como la que se fació en Masada (Israel). La rampa enrunó un tumulo de la I Edat de Fierro que s'ha reconstruito como simbolo en una curva de la carretera que pasa por lo lugar. Dezaga la guerra la ciudat no se reconstruyó, porque no feba falta un lugar fortificau pa articular lo territorio (y en la zona creixió la ciudat romana de Lepida Celsa en un puesto millor comunicau y mas plan, on huei son Exelsa y Viliella d'Ebro).
Referencias
[editar | modificar o codigo]- ↑ P. Gil, 1885-1890; J. Cabré y Pérez Temprado, 1919-1935 y 1940-1942; Universidat de Zaragoza, 1964; M. Beltrán, dende 1971
| Control d'autoridaz |
|
|---|
Datos: Q2932315
Multimedia: Cabezo de Alcalá / Q2932315