Baile de mayordomos

De Biquipedia
Ir a la navegación Ir a la búsqueda
Start hand.svg Esta fuella ye escrita en belsetán.

Lo (u la) baile de mayordomos (en benasqués ball de mayordoms/os) yera una mena de baile de plaza tipica d'antes de l'Alto Aragón, con es eixemplos millor conservatos dica l'actualidat en as valles de lo Sobrarbe y en l'alta Ribagorza (sector nord-oriental de Uesca), que se soleba bailar ta la fiesta gran d'es lugars. Lo termin "baile", en luenga aragonesa, gosa estar masculino y femenino per igual.

Lo baile representaba lo intercambeyo d'as fayenas de mayordomos y mayordomas (ixo ye, es qui organizaban la fiesta) en o final d'as fiestas de lo lugar, d'entre es qui ya el heban estato ixe anyo y es qui alavez preneban lo relieu ta el venider. Lo bezcambeyo se feba representato con o trespaso de ramos de flors (es mozos) y pans (las mozas), curiosament, quasi siempre d'entre danzants de lo mesmo sexo; es mozos t'altros mozos, y las mozas t'altras mozas.

Esta baile teniore chicotas diferencias d'entre totz es puestos a on se i heba feto, estando-ne la principal que en o Sobrarbe la feban es dos sexos d'igual maniera, mientres que en a valle de Benás yera exclusivament masculina. La versión sobrarbenca que mos ye arribata dica huei ye la de Sant Chuan de Plan (valle de Chistau), que habendo-se esenronata per mans de las mullers d'El Corro d'es Bailes d'ixa localidat, s'ha puesto estudear prou bien.

La musicologa belsetana Isabel Riazuelo en fa un estudeyo detallato en o suyo libro Danzas de Sobrarbe (2000), explicando-be pas per pas totas las evolucions de la baile en a suya versión ta es dos sexos. En a versión sobrarbenca i predominan las disposicions en filas paralelas de las parellas, agafatos per las mans unas vueltas, sueltos la resta d'es tiempos, fendo-se una formación quadrata (con una parella en o centro) només que concidindo con o tema numer cuatre d'a musica. En Benás la progresión d'a baile deixa las dos filas paralelas bien luego (només se i fan es dos primers temas) ta fer-se-be en un gran corrol on que totz es mozos danzan es uns dezaga d'es altros, chirando en chunto per la plaza de lo lugar. Esta versión ribagorzana se fa castanyeteyando con as mans mientres se danza, per lo que mai no se pueden agafar es uns con es altros.

Anque no s'han puesto estudear ni tampoco no pareixca que s'haigan conservato, qualques presonas de més edat en guardan recordos que enantes tamién s'heban feto bailes de mayordomos en altros lugars y villas d'ixas dos comarcas, en Chistén, en Bielsa, en A Buerda (perduto d'antes d'es anyos 1920), Fuent de Campo (dica es quarenta) Campo y talment Graus tamién.

Actualment, de lo muto que enantes se bailaba, només que mos ye quedato como baile d'exhibición y como muestra de folclor tradicional de lo Pireneyo, estando per eixemplo, principal como acto d'exhibir-se en a fiesta mayor de Benás.

Melodía y controversia historica[editar | editar código]

l'Articlo principal d'este alpartato ye Himno de Riego.

La baile d'es mayordomos tiene per gran particularidat de concidir en a suya melodía con a dita Marcha de Riego, la musica que gosó estar dica lo himno oficial d'a Segunda Republica Espanyola. Esta concidencia ha feto que s'haigan formulato mutas hipotesis sobre la suya oríhen.

La Marcha de Riego la composoren en l'anyo 1820, anque no ibi ha garra consenso d'entre es historiadors de qui ye que la composó. Himno popular d'entre es liberals en o sieglo XIX, la fayoren oficial en 1931 con a proclamación d'a Segunda Republica. La Marcha tenió diferents letras con es anyos, fendo-se-ne diferents versions seguntes conveniba. La musica de la baile de mayordomos nunca no s'ha cantato.

D'alcuerde con Riazuelo, lo historiador Llanas Almudévar afirma en a suya obra Pequeña Historia de Huesca. Glosas I que lo cheneral Rafael de Riego pasó tiempos adestinato en a fortaleza de Benás quan yera chóven, y d'alcuerde con a versión benasquesa d'ixa hestoria, l'abría agradato tanto la musica en aquers anyos que més luego encara la chiflaba estando ya cheneral. Ansinas pareix que l'han puesto documentar historiadors actuals como Honorio Feito :

Parece que Riego solía tararear en Sant Fernando una musiquilla muy parecida a la que luego aparecería en el pentagrama..[1]

Totz estes datos fan factible, anque no segura, la oríhen altaragonesa (u més pirenenca, talment) d'ixa pieza, anque dimpués per es escaiximients historicos ese arribato tan leixos como dica himno nacional. Musicas semilars yeran significativament coneixitas (y dica bailatas) dica no fa guaire tamién en o costato francés de lo Pireneyo.

Referencias[editar | editar código]

  1. Honorio Feito. Evaristo Sant Miguel. La moderación de un exaltado. (1995).

Vinclos externos[editar | editar código]

Bibliografía[editar | editar código]

  1. RIAZUELO FANTOVA, Isabel; "La Danza o Baile de los Mayordomos", pags. 125 enta 131, adintro de Danzas de Sobrarbe. Sender Edicions + Ayuntamiento de Bielsa, Zaragoza, 2001.