Aleixo I Comneno

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Aleixo I Comneno
Emperador de l'Imperio Bizantín
Emperador de l'Imperio Bizantín
1081 - 1118
Predecesor	Niceforo III
Succesor	Chuan II Comneno
Naixencia	1048 u 1056
Muerte	15 d'agosto de 1118
Dinastía	Dinastía d'os Comnenos
Pai	Chuan Comneno
Mai	Ana Dalasena

Aleixo I Comneno estió emperador de l'Imperio Bizantín dende o 4 d'abril de 1081 dica o 15 d'agosto de 1118. Ye naixito u en 1048 u en 1056 y morió o 15 d'agosto de 1118. O zaguer capítol d'o "Libro de los Emperadors" ye dedicato a lo suyo mandato, (Del tempo de Alexio Comneno, y cómo regió su imperio; ut sequitur).

Aleixo I Comneno habió de luitar contra os normandos, que amás de mantener-sen bellas anyatas en Durraz, feban incursions por Macedonya, Tesalia, Epiro manatos por Baimundo de Tarento. En o "Libro de los Emperadors" lo describen asinas:

en aquel tiempo trayeron nuevas al emperador que un latino clamado Ruberto passava dreito por ir en Grecia, el cual era hombre de guerra pleno en malicia: por que l'emperador fue entro a pres Dirrachio contra el dito Rubert,

En Costantinoble creixeba o sentimiento anti-latín y se refirmaba a Henrique IV contra o Papato. Se concedió a Venecia privilechios comercials en 1084 pa asegurar-se la suya aduya naval.

Aleixo habió de combatir a los pazinacos, que invadioron Tracia en 1086 y plegoron a asitiar Costantinoble en 1091. Los redotoron en 1091 en Mont Lebunion d'una traza decisiva, con l'aduya d'os cumans.

En o norte tamién luitó contra os bogomils, como mencionan en o "Libro de los Emperadors", distinguindo-los bien d'os paulicians:

En aquel tempo un heretge clamado Vassilioti el cual cuasi levava el ábito del diablo, e sus diciplos se clamavan bogomili. Aquesti Vassilioti ha apreso aquella malvada doctrina dentro XV anyos, e aprés ha predicado por el mundo LII años. El cual ha feito perder las ánimas a muitos con su falsa doctrina. Finalment fue a Contastinoble do fue castigado cuando l'emperador fue enformado de sus malas obras...

Cuan encomenzó a Primera Cruzata l'Imperio no yera en periglo inmediato. Aleixo I yera intresato en reclutar mercenarios occidentals pero no heba demandato aduya a lo Papa de Roma Urbán II. Acullió a los cruzatos con desconfianza y rezelo. Entre os cruzatos i heba enemigos naturals de Bizancio como os normandos d'o sud d'Italia. Con tot y con ixo consiguió que os suyos chefes aceptasen prou l'autoridat imperial y un compromís que entregasen a Costantinoble os territorios que conquerisen y que hesen estato bizantins en tiempos inmediatament anteriors, como Bitinia:

E passaron por medio de Contastinoble, e se posaron en la part de levant. E cuando los latinos vinieron, passaron en Bitinia, la cual senyoriaban en aquel tempo los turcos. Con muitas batallas e grant destrucción de la una part e de la otra, fue presa de los latinos, los cuales la han vendida al emperador. E aprés fueron en Antiochía e la han presa.

Gracias a los cruzatos l'Imperio recuperó Nicea, Dorilea, Efeso y atras plazas que aseguraban o control d'a Mar Echea, pero o Emperador habió d'aceptar a formación d'os principatos d'Edesa y Antioquía, on os cruzatos tenioron a colaboraión d'os armenios locals. Baimundo de Tarento, sinyor d'Antioquía prebó d'atacar Iliria en 1107, pero fue redotato y rindió vasallache a l'emperador por o suyo principato en 1111. O suyo succesor Tancredo se negó a renovar-lo.

Bibliografía

• Jose-Ramón Julià: Atlas de Historia Universal. Tomo I: De los orígenes a las crisis del siglo XVIII. Editorial Planeta.

Predecesor: Niceforo III

Emperador de l'Imperio Bizantín 1081 - 1118

Succesor: Chuan II Comneno

• Datos: Q41600
• Multimedia: Alexios I Komnenos / Q41600