Abrahán

De Biquipedia
Articlo d'os 1000
Abrahán
Abraán y Isaac en un cuadro de Rembrandt
Abraán y Isaac en un cuadro de Rembrandt
Información personal
Calendata de naixencia 2000-1500 aC
Calendata de muerte 2000-1500 aC
Ocupación Patriarca d'o chudaísmo, cristianismo y islam
Conchuche Saray y as concubinas Agar y Quetura.
Fillos Ismael (con Agar)
Isaac (con Saray)
Zimram, Jocsán, Medán, Madián, Isbac y Súa con Quetura).[1]

Abrahán (en hebreu אַבְרָהָם, Avraham; en arabe ابراهيم, Ibrāhīm, adaptato como Brahin u Brahen por os moriscos aragonesoparlants), ye seguntes a tradición chodiga un d'os patriarcas d'o pueblo d'Israel. No ye prou platero si ye un personache historico lechendario u si ye de tot un personache mitico. Manimenos no bi ha garra evidencia historica d'a suya existencia, encara que os datos tradicionals sitúan a suya biografía entre o 2166 aC y o 1991 aC u seguntes a tradición chodiga entre l'anyo 1948 d'a Creyación, ye decir l'anyo 1812 aC.

Ye reconoixito por o cristianismo y tamién ye un profeta muit important en o islam, decindo-se a vegatas istas dos relichions, chunto a lo chudaísmo oreo, as relichions abrahanicas. A historia d'a suya vida la recentan o Chenesi y l'Alcorán.

Ta muitos filosofos ye un simbolo d'a luita de l'hombre entre a libertat y o destín u o deber. Bels criticos dicen que o Brama indio se refiere a la mesma persona, encara que no han puesto probar iste feito.

Abraham ye muito conoixito por o relato en o Chenesi 22:1-19 d'o sacrificio d'o suyo fillo Isaac ta Dios y ye representato a sobén d'ista traza.

Abrahán en fuents aragonesas[editar | modificar o codigo]

L'antroponimo hebreu Avraham prene una prenunciación en -n en aragonés, luenga a on de fueras de bella parla oriental, a -m final se neutraliza con a -n final, manimenos en os textos medievals as palabras d'orichen semitico rematadas en -m s'escriben con esta letra, se pronunciase u no, (Jerusalem, Alcalatem, etc...).

En o "Libro d'el Trasoro" lo nombran como Abrahan, Abraan u Abran:

E qui quiera saber la naxencia de Abrahan [...] aca deçaga en el començamjento de los primeros omnes e de los fillos de Noe
Abraan engendró Ysac. De Ysac nasció Iacob
E aun biuja Abrahan mas el auje bien clx anyos de tiempo. Iacob engendró Iosep e sus hermanos

En o "Liber Regum" lo mencionan como Abraam y dicen:

Est fo el padre de Abraam e fo ydolatre que fazia las ydolas. Visco Thare LXX annos & ouo tres fillos : Abraam, Nachor et Aran. Tro aqui son las dos edades del sieglo.
Quando ouo Abraam LXXX.VII annos ouo fillo ad Ismael de Agar, so manceba. E quando ouo Abraam XC.IX annos estoncz se circuncidie e circuncidie ad Ismael so fillo, e tot fo casado.
E cuando ouo Abraam C annos priso muller a Sarra. & ella auia LXXX. annos et ouo fillo et ouo fillo della (sic) ad Ysaac. Visco Sarra CXX annos e murie en Quiria Turba en Ebron e soterróla Abraam en la cueua doblada que dizen spelunca duplici, que compro de Effron eteu por CCCC marcos de plata. E por esta razón compran los iudios las fuessas en que se sotierran. Visco Abraam C.LXX.V annos e murie e soterroronlo en Ebron con Sarra, so muller, en la cueua.

En o "Libro d'as Marabillas d'o Mundo" escriben:

Daq(ue)lla cibdat de hur por mandamje(n)to de dios se p(ar)tio Abraham empues la muert de su padre & leuo sarray su Mug(er) & loth el fijo de su h(e)rmano con el / Por q(ue) eill no auia point de fijo / Et finco enla t(ier)ra de Canaam en vn logar q(ue) a no(m)bre sichen / Et este loth fue aq(ue)l q(u)i fue saluo q(u)ando sodoma & gomorra & las otras cibdades fueron cremadas & fondidas en abismo alla do es la mar muerta assi como yo vos he dicho ot(r)a vez

Os cristianos aragoneses y navarros no gosaban fer servir este nombre biblico como antroponimo, pero sí os chodigos y moriscos d'a val d'Ebro (igual como los chodigos y musulmans d'atras tierras). Os musulmans aragonesoparlants (mudéchars u moriscos), feban servir as variants Brahin u Brahen d'o nombre, como podemos veyer en o fogache de 1495.

Bibliografía[editar | modificar o codigo]

  • (pt) Bacon, Josephine, y Martin Gilbert. Civilização judaica. Lisboa: Dinalivro, 2003.
  • Borger, Hans. Uma história do povo judeu, San Pablo: Séfer, 2008, tomo 1.
  • (es) Dubnow, Simón. Manual de la historia judía: desde los orígenes hasta nuestros días, Buenos Aires: Sigal, 1977.
  • (fr) Kedourie, Elie, ed. Le monde du judaïsme, Londres y París: Thames & Hudson, 2003.
  • Sed-Rajna, Gabrielle. L'abecedaire du Judaïsme, París: Flammarion, 2000.

Referencias[editar | modificar o codigo]

  1. Chenesi, 25:1-2

Vinclos externos[editar | modificar o codigo]