Enneco Ariesta

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Enneco Ariesta
Rei de Pamplona y de Sobrarbe
Estatua d'Enneco Ariesta, a Madrit (J. Oñate, 1750-53).
Rei de Navarra
810/820 - 852
Succesor	García Ennéguiz
Rei de Sobrarbe
868 - 870
Predecesor	Sancho Garcés
Succesor	García Ennéguiz

Naixencia	781
Muerte	852
Dinastía	Ennéguiz
Pai	Enneco Ximéniz
Mai	Onneca

Enneco (u Ennego) Ariesta (en basco Eneko Aritza; en castellano Íñigo Arista), naixito enta 781 y muerto en 852, estió lo primer rei de Pamplona (810-820 y 852), conte de Sobrarbe y de Bigorra. Se li considera patriarca d'a dinastía Ennéguiz, a primer dinastía reyal de Pamplona. A figura ye considerata meyo lechendaria en bels aspectos.

Hestoria

Yera lo fillo d'Enneco Ximéniz y d'Onneca. Muerto su pai, a mai se casó alavez con Musá ibn Fortún de Tudela, un Banu Qasi, sinyor d'a val de l'Ebro, que l'aduyó a conseguir o trono. Iste matrimonio deixó uns territorios considerables baixo la influencia d'Enneco Ariesta, dende Pamplona en t'as altas vals pirinencas d'Irati (Navarra) y la val d'Echo. Os Banu Qasi controlaban as fértils riberas de l'Ebro, dende Tafalla ent'a redolada de Zaragoza.

L'advenimiento d'o primer rei de Navarra no estió pas fácil. D'entre os nuclios de población cristiana (minoritaria), beluns refirman o partiu franco, sustenito en primeras per Carlos Magno y, mes tardi, per Ludovico Piu. A rica familia cristiana d'os Belasco ye a la capeza d'ixe partiu.

En 799, uns procarolinchios asesinan o gubernador de Pamplona, Mutarrif ibn Muza, d'a familia d'os Banu Qasi. En 806, os carolinchios controlan Navarra per meyo d'un Belasco como gubernador. En 812, Ludovico Piu ninvía una expedición contra Pamplona. A tornata no ye guaire gloriosa, prenendo como hostaches zagals y mullers d'a zona ta protecher-sen mientres que trescruzan o puerto de Roncesvals.

En 824, os contes francos Elbe y Aznar fan una altra expedición ta Pamplona, pero son vencitos per Enneco, qui ye ayutato per os suyos chóvens Musá ibn Fertún y García lo Malo de Chaca.

Ye alavez que, seguntes Eulochio de Cordoba, i apareix Enneco Ariesta como rei de Pamplona: "Christicolae princeps" (prencipe cristiano).

En 841, Enneco ye victima d'una malautia que lo deixa parlaticato. O fillo suyo, García Ennéguiz, exerce una rechencia cerenya, dirichindo as campanyas militars.

Casamientos y descendients

Enneco se casó con Enneca, filla de Belasco, Sinyor de Pamplona muerto en 816.

Fillos:

Assona Ennéguiz, casata con Musá ibn Fertún, walí de Uesca y Tudela.
García Ennéguiz, o succesor d'Enneco en o trono.
Galindo Ennéguiz de Pamplona, muerto en 851 a Cordoba y pai de Musá ibn Galindo, walí de Uesca en 860.
Nunila, casata con o conte García lo Malo d'Aragón.

Enneco en as cronicas medievals

En o capítol X d'a Cronica de Sant Chuan d'a Penya, se i leye:

Muerto aquesti Rey, regnó Exemen García de los quales recontamiento otro non trobamos, los quales murieron. Assin que no fincó regidor en la tierra. Et el general de la tierra veyendo que ellos fincarian sin gouernador et la tierra fincaba desolada de senyor, fueron cercando a qui eslieyrían por senyor lur et defendedor no trobauan mas valient ni mas auençado cauallero, como el noble varon natural del condado de Vigorra clamado Ennego, el qual era venido, en estas partes por defender los xpistianos de las crueldades et terribles persequciones de los moros. El qual hauía vencido et desbaratado muytas et diuersas vegadas aquellos. Et por la grant nobleza de coraçon et de armas que en él era, las gentes de la tierra ensemble, concordantes con Fortunyo Ximenez comte Daragon, eslieron el dito Ennego en rey de Pamplona. Et era tanto abiuado et encorajado de hauer batallas continuament con los moros, que apenas estaua vn dia seguro. Et por esto metiéronle sobrenombre Ariesta, porque assin como la ariesta aplegada cerca el fuego, en vn moment quema, assin el dito rey Don Ennego sabiendo que los moros deuiessen haber batallas con él, en vn moment era con ellos; assin de las oras entaqua, huuo nombre Enego Ariesta. Et huuo por muller la regna Doña Toda, de la qual procreó vn fillo qui fué clamado García Eneguez. Et murió el rey Don Enego Ariesta, et fué soterrado en San Saluador de Leyre, año DCCCXXXIX.

Cal mirar-se o texto manimenos en o suyo contexto historico y no considerar-lo una fuent plenament fidedigna. A etimolochía d'Ariesta (en basco Aritza) ye probablement una altra.

En "Cronica de los estados peninsulars", que ye pro-aragonesa fan enfasi en o suyo orichen aragonés:

Encara por razones, la primera que Ariesta romanz yes proprio de Aragon, e non yes bescunz ni encara romanz de Navarra^[1]

Manimenos, en o sieglo XVI a palabra ariesta s'utilizaba en Pamplona, y en o XX agún s'utilizaba en a Ribera navarra, en Ablitas y Mélida^[2]. Igualment, en bascuenz en Navarra tenemos aresta y arezta ^[3]. Uei en dia en basco stándard a forma ye Alezta^[4].

Se veiga tamién

Cruz d'Enneco Ariesta

Predecesor: Rei fundador	Rei de Navarra 810/820 - 852	Succesor: García Ennéguiz
Predecesor: Sancho Garcés de Sobrarbe	Rei de Sobrarbe 868 - 870	Succesor: García Ennéguiz

Referencias

↑ Cronica de los estados peninsulars
↑ Caro Baroja (1969). "Observaciones sobre el vascuence y el Fuero General de Navarra". Fontes Linguae Vasconum: 61-96.
↑ Orotariko Euskal Hiztegia, Euskaltzaindia.
↑ |Alezta. Euskaltzaindia.

[1] Cronica de los estados peninsulars

[2] Caro Baroja (1969). "Observaciones sobre el vascuence y el Fuero General de Navarra". Fontes Linguae Vasconum: 61-96.

[3] Orotariko Euskal Hiztegia, Euskaltzaindia.

[4] |Alezta. Euskaltzaindia.

[1]

[2]

[3]

[4]