Graptopetalum paraguayense

Graptopetalum paraguayense
G. paraguayense
Denominacions populars
Madreperla, graptopetala
Estau de conservación
Seguro (IUCN)
Clasificación cientifica
Dominio:	Eukaryota
Reino:	Plantae
División:	Angiospermae
Orden:	Saxifragales
Familia:	Crassulaceae
Subfamilia:	Echeverioideae
Chenero:	Graptopetalum
Especie:	G. paraguayense
Descripción
Graptopetalum paraguayense N.E.Br., 2011

A madreperla (d'o castellano «madreperla», «nacra») u graptopetala (Graptopetalum paraguayense (N.E.Br.)) ye una planta crasulacia suculenta y perén, natural de bells habitats semi-deserticos de Mexico, que se cautiva como planta ornamental en buena cosa d'o mundo.

Descripción

Ye una planta que en a naturaleza creixe arrocegando-se, con tallos carnosos en os que as fuellas i brostan en orden espiral, por o que caso de meter-la en un tiesto, i creixe penchadera. As fuellas mas chovens se situan en forma de roseta, mientres que as mas antigas van distanciando-se d'entre ellas a mesura que o tallo creixe.

A color ye blanquinyosa con brilluras grisas u vrioletas. As fuellas viellas van cayendo, por l'usual, en orden d'antiguedat, y s'ixecan d'antes de desprender-se-ne. En plantas de mas d'una temporada ye regular que buena cosa d'o tallo quede despullada, y no se conserve sique a roseta, en posición terminal, de as fuellas mas chovens.

Necesidatz

Como muitas atras crasulacias, Graptopetalum paraguayense suporta muit bien as condicions de sequera y altas temperaturas, y en climas como o d'Aragón resiste en o exterior sin guaires problemas con una irrigación menima, testimonial, y mesmo con l'augua de plevia en arias con precipitacions arredol d'os 1.000 mm anyals.

Ye una planta que vive millor en os exteriors, y se torna feble quan se mete en a uembra u en os interiors. Vive perfectament y encara se robustifica quan ye a pleno sol.

En hibierno, resiste as cheladas nocturnas moderadas, pero os teixius carnosos que tiene sufren quan o periodo baixo 0 °C se prolarga, de o que puede gosar dica morir-se.

No suporta mica bien quedar-se soterrada en a nieu, por o que no ye aconsellable plantar-la en tierra en rechions en as que eventualment pueda quedar-ie sepultada mas tiempos que unas pocas horas. Os exemplars en tiestos s'habrán de retirar quan i haiga previsión de nevazos.

Imáchens

• 
  Detalle d'una roseta de fuellas chovens.
• 

Vinclos externos

• Wikispecies tiene un articlo sobre Graptopetalum paraguayense.
• Se veigan as imáchens de Commons sobre Graptopetalum paraguayense.

Graptopetalum paraguayense