Pazinacos
De Biquipedia
Un u más biquipedistas son treballando autualment enamplando iste articlo.
Ye posible que, por ixo, bi aiga lagunas de contenito u defizienzias de formato. Por fabor, antis de reyalizar correzions mayors u reescrituras, contaute con els en a suya pachina d'usuario u a pachina de descusión de l'articlo ta poder coordinar-ne a redazión.
Os Pazinacos yeran un pueblo de luenga turquesa que emigró dende Asia Zentral t'as estepas d'Europa Oriental e influyó en a istoria d'o Imperio Román d'Orient, os eslabos orientals, os ongaros e os bulgaros.
[editar] Denominazions
En testos latins lis deziban bisseni bessi e pizenaci, y en ongaro besenyő, pero tamién becencik, en griego patzinakitai (d'astí a denominazión de pazinaco que sale en o libro d'os emperadors), en turco Peçenek u Beçenek, en arabe e persa Bjnak/Bjamak/Bajanak, en tibetán Be-co-nag, en cheorchián Pacanak-i, en armenio Pacinnak en luengas eslabas orientals Peceneghi/Pecenezi, en polonés Pieczyngowie/Piecinigi
O suyo nombre s'ha quiesto relazionar con a radiz bajanaq/bajinaq que sennifica en luengas turquesas antigas cuñato, e sennificaría clan u tribu emparentato por alianza.
Sin d'embargo o istoriador ongaro György Györffy crei que poderba aber sennificato omes que abitan en as selbas, con a ebidenzia que muitas referenzias a selbas d'Europa zentro-oriental tienen a os pazinacos como un component d'o suyo nombre.
- Silva blacorum et bissenorum d'o sur de Transilbania.
- Una selba d'os pazinacos en a región de Vinniţa (Ucraína).
- Una selba pazinaca en a ripa d'o río Rosava de Polonia.
- Silva Pieczyngarum en o surueste de Polonia.
- Concentrazión de toponimos pazinacos (Biborţeni, Baraolt, Ozon) en as probinzias de Harghita e Covasna, que tienen muitas selbas.
- En un documento de 1218, os pazinacos d'a zona de Bakony, en l'ueste de Ongría son menzionatos como chents d'a selba.
O etnonimo emplegato por os ongaros besenyő ye parexito con o etnomino wusun. Os wusuns estioron un pueblo nomada de raza caucasoide que i eba en Asia Zentral e que menzionaban as fuents chinas antigas, e s'ha pensato que poderban estar os antepasatos d'os pazinacos.
[editar] Os pazinacos en fuents bizantinas
Os Pazinacos yeran descritos en De administrando imperio, obra d'o emperador Costantín VII lo Porfirocheneta, como un pueblo nomada, que se desplaza en funzión d'a plebia e d'os puestos pa paxentar e tamién se diz yeran ricos porque controlaban unas rutas comerzials d'esclabos, zera e pelletas.
O cronista Marzawi proporziona en o sieglo IX bels detalles sobre os territorios controlatos por os pazinacos:
Os pazinacos teneban a estrutura sozial tipica d'os nomadas, estando una confederazión de clans organizata cherarquicament, pero libres d'operar independientment.
De Administrando Imperio contién zinco capítols dedicatos a los pazinacos. Dimpués que os bulgaros los esen derrotato bellas begatas, os bizantins i beyioron unos aligatos estratechicos cuentra o común enemigo bulgaro.
Baxo Costantín VII os bizantins seguiban una politica d'atrazión con correspondenzia e regalos prebando de dominar-los. O Imperio Bizantín los animó a obtener por meyos pazificos articlos de luxo que d'atra traza esen abito de prener como trofeu de guerra. Una begata compratos os serbizios d'os pazinacos d'esta traza, os pazinacos yeran adrezatos cuentra os enemigos d'o imperio.
O mesmo Costantín Porfirocheneta menziona en a suya obra De cerimomiis que os líders d'as confederazions tribals tebeban dreitos eguals dende o punto de bista d'o Imperio Bizantín. Esto contrimuestra que os pazinacos no teneban un líder unico pero que a diferenzia d'atros pueblos, a los líders pazinacos lis reconoxeban o status d'independenzia, dende o inte que yeran autorizatos a tener correspondenzia con o emperador de Costantinoble.
O Zar bulgaro Simión fazió serbir a los pazinacos pa fer pinza a los ongaros e forachitar-los d'a tierra que ocupaban en as estepas d'Europa Oriental. Os pazinacos estioron tan efizients que os ongaros abioron d'emigrar temporalment ta Etelköz (en luenga ongara "entre ríos"), enantes que s'establisen pa cutio en Panonia e o Danubio.
