Placha

A placha de s'Estanyol d'Alcúdia.

Una placha en Venezuela.

Una placha ye una forma de terreno u relieu que a cheomorfolochía define como una acumulación chunto a lo canto d'a mar de materials de diferents midas ditos sedimentos, destacando as plachas con arena. Os materials pueden estar d'orichen organicos (restas d'escletos y cascas de tipo calsinoso u silicatato) u inorganicos (procedents d'a meteorización de rocas).

En as plachas se produce deriva litoral, un movimiento efectivo d'arena constant en una dirección paralela a la costa como conseqüencia d'ondas marinas que chocan obliquament contra ella. D'esta traza as particlas d'arena son empentatas por as ondas marinas en a superficie d'a placha seguindo a trachectoria d'o frent d'a onda marina, pero quan a onda retacula, as particlas d'arena no retaculan en ixa dirección y baixan seguindo a linia de més pendient, perpendicular a la linia de costa, quedando en un punto diferent d'a linia de costa. A onda marina vinient tornará a mover a particla con una trachectoria obliqua respecto a la lina de costa, pa dimpués baixar seguindo a linia de més pendient dica arribar a un punto d'a linia de costa encara més luent de l'orichinal.

As plachas se forman por l'acción d'as ondas marinas y as corrients de deriva litoral que tresportan materials a una determinata zona, pero son estructuras que cambeyan constantement tenendo aportacions y perdugas de materials y cal que as aportacions sían mayors u iguals a las perdugas, ta que se forme a placha y contine existindo. Quan as aportacions de material no pueden compensar a las perdugas, a placha desapareixe. Isto se puet veyer de manera prou platera por eixemplo en as plachas d'o Maresme, a on que a construcción de puertos esportivos ha feito que as aportacions de sedimentos que plegaban tresportatos por as corrients d'o norte ya no pleguen y as plachas vaigan desaparexendo a moniquet, y por ixo quan bi ha una perduga de material important, debito por eixemplo a un temporal de levant, calgan grans aportacions artificials de material ta rechenerar-las de manera temporal.

Banderas en a placha

• Verda: banyo libre.
• Amariella: banyo con precaución.
• Roya: Ye vedato banyar-se.
• Azul: se concede a las plachas y puertos esportivos que ha feito un especial esfuerzo ta mantener-los limpios y chestionatos respetanto lo medio ambient.

Bibliografía

• Eumenio Ancochea Soto, Francisco Anguita Virella, Fernando Moreno Serrano. Geología Procesos Externos. Editorial Edelvives, 1990.
• Francisco Anguita Virella, Fernando Moreno Serrano. Procesos geológicos externos y geología ambiental. Editorial Rueda, 1993.

Vinclos externos

• Se veigan as imáchens de Commons sobre as plachas.