Mayos

De Biquipedia
Ir ta: navego, busca

Os Mayos son una fiesta tradicional celebrata l'1 de mayo en amplas zonas d'o centro y norte d'a Peninsula Iberica.

A maya u lo mayo ye un tronco u palo alto (árbol de mayo) que s'alza en a plaza u puesto publico en o mes de mayo y con s'achuntaban os mozos y mozas pa divertir-sen con bailes y fiestas. Os chóvens competiban por puyar por l'árbol dica plegar ta la parte d'alto on heban d'agafar a bandera, mientres as mesachas los animaban dende abaixo bailando u cantando arredol l'árbol.

En Castiella os cantos d'esta celebrazión se dedicaban a la virchen María, pero dimpués s'aproveitoron pa rondar a las mozas casaderas, a las autoridatz y a los funcionarios recient plegatos a lo lugar. Una orquestina gosaba acomapanyar a os rondadors. A moza rondata u maya yera obligata a invitar a lo mozo a una buena brenda. A los d'a orquestina lis se daba una garnacha. Os mayos se celebran dica en zonas tan surorientals como Motilla del Palancar u Minglanilla (Manchuela Cuencana), y dica en a Manchuela Albaceteña.

A palabra maya evolucionó en castellán ta maja, con atro significato y que s'aplicó a la palabra majo, castellanismo admeso en aragonés.

L'antropologo Caro Baroja la considera d'orichen celta y diz comenta que se celebra en Galicia, a Meseta y a parte d'Aragón on vivioron os celtibers. En atros países on estioron os celtas existen fiestas pareixitas o mesmo día como o Beltaine (fuego de Bel) en Irlanda.

N'Aragón se celebra en lugars d'a provincia de Zaragoza, como Morata de Xalón, y lugars d'a provincia de Teruel como Fridas d'Albarrazín, Griegos y Guadalaviar. En Forcallo y Torralba de los Fraires celebraban as Mayas, que a ilesia bedó en o sieglo XVI.

En Castellón y Valencia se celebra, amás de Castellón capital, en bells lugars de l'interior,(Cinctorres, Serra d'en Galcerán, Argelita, Herbers, Vallat, Borriana, La Foya y Chuliella), beluns d'os qualos se repobloron con aragoneses como Borriana u Chuliella. En a Provincia de Valencia tamién celebran os mayos en Tueixa, lugar repoblato con aragoneses.