Gran Depresión
A Gran Depresión u Crisi d'o 29 prencipió en l'anyo 1929 en Estatos Unitos con a mayor recesión economica mundial d'a historia moderna, tanto en profundidat como en duración. A manca de planificación d'o sistema capitalista feba consustancial l'aparición de crisis ciclicas: a una fase de puyata d'os pres, beneficios y producción, la sucedeba una atra de depresión, con cayita d'os pres y d'a producción, que ocasionaban una paranza forzosa. Mientres o sieglo XIX istas crisis se producioron, pero en 1929 a crisi estió muito mas que una frenata a lo sistema. O impacto estió tan fundo que gosó cambear a situación economica mundial, que descansaba en a confianza ilimitata en o capitalismo liberal.
No bi ha consenso sobre as causas, pero a mayoría d'os autors coinciden en afirmar que a crisi d'o 29 tenió os suyos orichens en a sobreproducción de mercancías y en a gran especulación de capitals que caracterizaban a la economia mundial dimpués d'a Primera Guerra Mundial. S'orichinó inicialment en os Estatos Unitos d'America, a partir d'o crack d'a bolsa d'o 24 d'octubre de 1929 (o dito "Chueves Negro") en Wall Street.
Dende os Estatos Unitos s'estendilló a la resta d'o mundo capitalista. A crisi prevocó grans tasas de desempleyo: catorze millons de presonas en os Estatos Unitos, seis en Alemanya y tres en o Reino Unito. En Australia, a tasa de desempleyo estió encara mas gran que en os Estatos Unitos y o Reino Unito chuntos. S'estima que a cinquena parti d'a población britanica viviba por debaixo d'o ran d'a pobreza en a metat d'a decada de 1930.
A eslección como president de Franklin Delano Roosevelt y o establimiento d'o New Deal en 1932 marcó lo prencipio d'a fin d'a Gran Depresión en os Estatos Unitos. Manimenos, en Alemanya, a desaparición d'o financiamiento exterior, a prencipios d'os anyos 1930, y l'aumento d'as dificultatz economicas, facioron que apareixese o nacionalsocialismo y que plega-se a lo poder Adolf Hitler, que sustituyó de raso a la Republica de Weimar.
[editar] Bibliografía
- Hayek, Friedrich A. von. Contra Keynes y Cambridge. Unión, Madrit, 1996. ISBN 84-7209-308-5.
- Keynes, John M. (Lord Tilton) La Teoría General del Empleo, el Interés y el Dinero. Aosta, Madrit, 1998. ISBN 84-88203-05-5.
[editar] Vinclos externos
Se veigan as imáchens de Commons sobre a Gran Depresión.
