Cheometría

De Biquipedia
Ir ta: navego, busca
Articlo d'os 1000
Cheometría plana.
Alegoría a la cheometría.

A cheometría (d'o griego γεωμετρία; γη = tierra, μετρώ = mesurar) ye a branca d'o conoiximiento que s'ocupa d'os obchectos u figuras y d'as suyas relacions en o espacio, ye dicir: distancia, posición, superficie, volumen, forma, desplazamiento, prochección, representación, etc. Estió un d'os dos campos d'as matematicas clasicas, estando l'atro campo, l'aritmetica u estudeyo d'os numeros.

En a Edat Moderna, o filosofo Descartes reformuló o concepto de coordenatas cartesianas, dando paso a la cheometría analitica que introdució os metodos de calculo alchebraicos en a cheometria. Actualment, os conceptos cheometricos s'han cheneralizato dica plegar a un alto grau d'abstracción y complexidat, conseqüentment podemos parlar d'una cheometría tradicional u clasica, que ye la que totz conoixemos, ya que s'amostra en as escuelas primarias. As atras cheometrías, por un regular, son disciplinas que se basan, en parti, en os conceptos en bella traza intuitivos d'a cheometría clasica, a partir d'os qualos se formulan atras hipotesis, se desembolican metodos alternativos u s'estableixen vinculacions con atras disciplinas u matematicas.

A cheometría clasica s'ocupa d'as figuras y obchectos que existen u podemos imachinar, tanto en o plan como en o espacio, asinas como d'as suyas prencipals relacions, aplicacions, extensions, etc., como son:

  • A forma d'as figuras, a suya cheneración y parametros.
Por eixemplo: a circumferencia se define como una curva zarrata y plana, os puntos d'a quala equidistan d'un punto dito centro.
  • As mesuras sobre u d'as figuras como son a superficie, o volumen u atras.
Como eixemplo tenemos o volumen d'a esfera seguntes a sigüient expresión:
Volum=\frac{4}{3}\,\pi\,r^3
  • As aplicacions a la resolución de problemas entre figuras u a partir d'as figuras como: trobar tanchents comuns a dos circumferencias, trobar a prochección sobre un plan, etc.
Entre as aplicacions notables se troba a resolución de trianglos, a on a partir d'un costato y dos anglos, dos costatos y un anglo u d'os tres costatos, se pueden deducir os atros costatos y anglos. Ista aplicación ye a base d'a cheodesia y d'a topografía.

A cheometría clasica ye euclidiana, dita asinas en honor d'o matematico griego Euclides, qui formuló o famoso cinqueno postulato u postulato d'Euclides, en que se basa ista sciencia.

Etimolochía[editar | editar código]

A parola "cheometría" viene d'o griego "geo" (tierra) y "metrón" (mesura). En aragonés se puet leyer en o "Libro del Trasoro", a on que dicen:

La .iii.º si es jeumetria, porque nos sabemos las mesuras e las proporciones de las cosas, por luengo e por las altezas e de amplo; aquesta es la sciencia por que los antiguos sabios se forçaron, por sotileza de geumetría, de trobar la grandeza del cielo e de la tierra e de la alteza que ha entre el vno e el otro, e otras muytas proporciones que fan e son de gran maraujllar.