Anura
De Biquipedia
| Anura | |||||||||||
|---|---|---|---|---|---|---|---|---|---|---|---|
| Rechistro fosil: Dende o Triasico dica l'atualidat | |||||||||||
.jpg) Rana temporaria |
|||||||||||
| Clasificazión zentifica | |||||||||||
|
Os anuros (zentificament Anura) son a orden con més lumero d'espezies concabitas d'os anfibios autuals. S'esferenzian d'os atros anfibios en no tener coda y en tener as patas zagueras largas e adaptatas ta brincar. En aragonés, as espezies d'Anura son conoxitas popularment como «ranas» y «zapos».
Os anuros se reconoxen fazilment por l'ausenzia de coda e por a doble lonchitud d'os miembros posteriors respecto á los anteriors. O mobimiento d'os miembros posteriors se fa con a mesma traza d'un muelle, que se contraye y s'espande, o que representa una locomozión saltadera, con sincronizazión de mobimientos d'as dos patas posteriors que ye caracteristica d’este grupo.
A zintura pelbiana ye bien osificata en relazión á los atros anfibios ta poder fer de soporte d'os miembros posteriors. A rechión sacra por un regular ye marcata con una bertebra diferent á las atras d'o cuerpo y por detras bi ha unas bertebras caudals fusionatas en urostilo.
O cubito y radio son fusionatos, á l'egual que a tibia y peroné. En o piet posterior os güesos d'a planta y os didos son prolargatos.
A zintura peitoral ye a saber-lo d'osificata y bi n'ha dos tipos basicos con bariazions. Á diferenzia d'os urodelos y apodos tienen encara güesos dermicos en a zintura peitoral por exemplo en as clabiculas.
En o cranio os güesos frontals y parietals son fusionatos en un gran complexo dorsal, y presentan tamién zentros formatos por osificazions d'os arcos neurals que resultan d'a condrificazión e posterior osificazión d'as bainas notocordals. Se'n distinguen tres tipos: ectocordal, holocordal y estegocordal. O lumero de bertebras troncals queda reduzito á 5 - 9 representando un alcurzamiento d'o cuerpo, talment ligato á ixe tipo de locomozión saltadera que fan, como tamién l'ausenzia de cuello, que no deixa que a cabeza se desbíe lateralment cuan se salta.
Os anuros son formas muito actibas y tienen güellos grans y parpados mobils. O timpano ye superfizial y gran. A larinche ye bien desembolicata y a produzión de sonitos ye important en o comportamiento territorial y secsual. Bi ha bolsas e sacos bucals que actuan como cambras de resonanzia cuan fan o suyo cante carateristico, que ye o «ranuco».
A fecundazión ye esterna y a reproduzión obipara con eszezions. A mayoría presentan un desembolique larbario libre, o cullarón.
[editar] Se beiga tamién
[editar] Enrastres esternos
Biquiespezies tien un articlo sobre Anura.
Se beigan as imachens de Commons sobre Anura.
