Amphibia

Amphibia
Litoria phyllochroa
Clasificación scientifica
Dominio: Eukaryota Reino: Animalia Filo: Chordata Clase: Amphibia

Os amfibios son una clase d'o fillum chordata, subfillum vertebrata y superclase tetrapodos que encara que son terrestres no tienen una adaptación completa a lo medio terrestre y dependen d'o medio aquatico pa la reproducción y en part pa la respiracion.

Os amfibios son a primera clase de tetrapodos en fer aparición y representan en a historia evolutiva d'os vertebratos un punto clau, desembolicando unas estructuras de gran importancia, pa colonizar o medio terrestre pa cutio. A transición dende a vida en l'augua enta a vida en tierra firme suposa pa os vertebratos dos requisitos principals:

• Capacidat de respirar l'aire atmosferico.
• Capacidat de mover-se en substracto duro, on a fricción que se creya en o desplazamiento ye alta.

Bells peixes ya yeran preadaptatos a lo primero. Problemas menos evidents, pero importants estioron a perduga de l'augua por evaporación. Este problema no lo resolvioron os amfibios en lur evolución, y os amfibios actuals troban a solución més dreita: pasar periodos de vida capuzatos. Esto ha condueito a que bells amfibios haigan esdevenito secundariament especies aquaticas.

Os amfibios, por poder estar fuera de l'augua d'una traza mantenita pueden aproveitar os recursos alimenticios de tierra firme, en especial insectos y plantas vasculars. No teneban competencia en as tierras emerchitas por 50 millons d'anyatas y producioron gran variedat de formas, entre as quals amaneixioron os primers reptils, que china chana irían desplazando a los amfibios d'una traza que dende o mesozoico inferior os amfibios han permaneixito como formas secundarias en os biotopos terrestres. Actualment o grupo ye heterochenio, totalizando arredol de 6.759 especies.

Aparato dichestivo

A boca ye gran, y as dients chicotas. Dos canyos comunican con a cambra bucal (no bi ha paladar pa fer deseparación de fosas nasals y cambra bucal). Bi ha un u bells conductos pancriaticos.

Aparato respiratorio

A respiración ye pulmonar, pero como os pulmons no son prou evolucionatos s'ha de complementar con respiración cutania. As larvas, ditas cullarons tienen respiración con branquias externas.

Aparato circulatorio

Aparato circulatorio en os anfibios

A circulación ye doble y incompleta. A diferencia d'os peixes y a l'egual que os atros tetrapodos o corazón no tien seno venoso y bulbo cardiaco. O corazón ye en o tórax por o desembolique d'o cuello. A tabicación atrial ye completa pero a tabicación ventricular no existe. D'esta traza o corazón tien 3 cambras.

Bi ha arterias pulmonars.

D'os 6 pars de gayatas aorticas d'os peixes debantpasatos d'os anfibios, en permaneixen o 3º, 4º y 6º. O cucharón presenta os pars de gayatas aorticas d'o estadio d'os peixes dipnous. Se pierde a unión entre as radices aorticas dorsals, entre a partita anterior y a partita posterior, d'una traza que s'organizan dos circulacions: una enta a capeza y d'atra enta a part posterior.

L'arco tercer orichina l'arco carotidio. L'arco quatreno orichina l'arco sistemico, que distribuye a sangre por tot o cuerpo, y forma as gayatas aorticas que s'unen en l'aorta dorsal.

L'arco cinqueno ye desapareixito en a mayoría, pero lo conservan as zalamandras.

L'arco seiseno orichina l'arteria pulmonar.

Bi ha venas pulmonars.

Aparato excretor

Os rinyons son pars y s'excreta urea. O mesonefros contribuye a la formación d'o rinyón adulto, dito opistonefros.

Sistema tegumentario

A especie Oophaga pumilio ye un eixemplo de amfibio verenoso

A pelleta ye lisa, sin d'escatas, y humida, con muitas glandulas mucosas, belunas pueden estar verenosas.

Aparato locomotor

Bi ha quatre patas, pero bi ha formas apodas.

Sistema nervioso

O sistema nervioso d'os anfibios tien 5 partz: telencefalo, dielencefalo, mesencefalo, metencefalo y mielencefalo. Bi ha gran desembolic d'os lobulos olfativo, (a part més desembolicata d'o cerebro). Os hemisferios cerebrals son chicos y a materia grisa encomienza a migrar ta la superficie. O cerebelo ye poco desembolicato.

Organos d'os sentitos

L'organo fotorreceptor, o uello, ye desembolicato y presenta estructuras analogas a la cornia y cristalín.

Bi ha una cambra timpanica procedent d'o espiraclo d'os peixes, que desembolica una membrana u timpano que quan vibra trasmite as alteracions a un estribo. O timpano ye superficial.

Aparato reproductor

Ciclo de vida d'un amfibio

Son dioicos, a fecundación ye externa en os anuros y interna en os urodels. Por un regular son oviparos. Os uevos son heterolecitos, o desembolique indirecto, y as larvas son nadadoras con respiración branquial.

Os ovarios son vueitos. Os oviductos s'han deseparato d'una traza primerenca en o desembolique embrionario de l'ureter primario.

A cloaca no ye formata que por o proctodeu. A cluaca a vegatas ye evachinable.

O trasporte d'espermatozoides se fa con o canyo de Wolf, que ye l'ureter primario y funcional.

Bibliografía

• Adolfo Aguilar, Eduardo de Juana y Arturo Morales. Historia Natural, tomo 6 Zoología - Vertebrados. Carroggio, 1989.

Enrastres esternos

• Se veigan as imáchens de Commons sobre Amphibia.
• Biquiespecies tiene un articlo sobre Amphibia.
• Información d'especies d'amfibios en a Enciclopedia Virtual d'os Vertebratos d'Espanya d'o CSIC.