Reptilia

De Biquipedia
Ir ta: navego, busca
Articlo d'os 1000
Reptilia
Imáchens de diferents reptils
Imáchens de diferents reptils.
Clasificación scientifica
Dominio: Eukaryota
Reino: Animalia
Filo: Chordata
Clase: Reptilia

Os reptils u Reptilia en clasificación scientifica son una clase d'animals cordatos gnastomatos tetrapodos. Se'n conoixen 9.320 especies arredol d'o mundo, quaternadas en 4 ordens: Testudines, Squamata, Sphenodontia y Crocodylia. Scientificament, se considera que as aus son un grupo especializato dentro d'os Reptilia.

Son animals ditos ectotermos, ye decir, con una termperatura corporal identica a la temperatura exterior d'o suyo medio ambient y no produeita por o suyo cuerpo, caracteristica que comparten con otros grupos taxonomicos como insectos u peixes.

A sciencia que en fa o estudeo ye una d'as d's brncas d'a Herpetolochía, estando-ne l'atra o estudio d'os amfibios, que d'antis más s clasificaban en o mesmo grupo taxonomico d'os reptils. Se considera que os primers reptils amanixioron mientres o Carbonifero, chunto con os Amniota y estioron os primers animals en fer una verdadera colonización d'o medio terrestre. Estioron muit abundants mientres a Era Mesozoica, quan estioron as especies dominants a traviés d'os dinosauros, pero desapareixioron como gran grupo taxonomico dominant en zagueras d'o periodo Cretacico, estando suplantatos por un nuevo grupo taxonomico en expansión, os mamiferos, millor adaptatos a o medio terrestre.

A suya relación con l'hombre ye complexa, y gosan amanixer muito en as mitolochías como animals fabulosos. Antiparte, se fa a explotación comercial de bellas especies, mas que mas por a suya piel en treballos de marroquinería; por ixo bell unas especies son obchecto de cría. Sindembargo, gosan tener amenazas en o suyo medio natural, mas que mas por a polución y en desapareixer os suyos habitats por efecto de l'acción de l'hombre.

Caracteristicas fisicas[editar | editar código]

Aparato dichestivo[editar | editar código]

Serpient minchando un engardaixo.

En os reptils a boca gosa estar gran, y as comisuras s'alargan tipicament por dezaga d'os uellos. No bi ha ni mexiellas ni morros carnosos. Sin dembargo, os quelonios tienen pico.

Bi ha dients en as dos mandibulas, insertos en una sola ringlera sobre os uesos premaxilar y maxilar d'a mandibula superior y exclusivament en o dentario d'a inferior. En beluns amés bi ha dients sobre os uesos d'o paladar (palatins y pterigoideus). Os dients son totz eguals (homodoncia), de forma conica, uncinata, utils p'agafar y retener as presas, pero no pa masticar, (encara que i ha habito ordens fósils con tendencias a la heterodoncia d'os mamifers).

Os dients gosan estar fusionatos a los uesos d'as mandibulas, en as marguins (dients acrodontos), en os laterals d'as caras internas (pleurodontos). En os crocodilians y en órdens fósils como os dinosauros os dients s'anclan en uns alviolos como por eixemplo en os crocodilians. O reemplazo d'os dients gosa estar costant en tota una vida (polifiodoncia) con patrons alternants a fin que no i haiga tramos extensos sin dients en as mandibulas.

Siempre bi ha una luenga, queratinizata, luenga y áchil en os engardaixos y serpients (que la tienen con forma de forca) y poco móvil en os crocodilians y tortugas.

A boca tien tamién diferents tipos de glandulas salivars y en o caso d'os ofidios y o chenero Heloderma d'os saurios as glandulas salivars labials han esdevenito glandulas productoras de vereno.

O resto de l'aparato dichestivo s'achusta a lo esquema cheneral d'os vertebratos. O estomago d'os crocodilians tien una porción glandular anterior y una porción posterior.

O bodiello bolsudo gosa tener un ciego. A cloaca, a l'egual que en as aus, tien cierta complexidat de disenyo pa permitir recuperar augua, (adaptación a la vida terrestre), tanto a partir d'as feces como d'os pixatos. As feces s'almazenan en una primera cambra, o coprodeu, os pixatos en atra, l'urodeu, y dimpués se comunican con una cambra final, o proctodeu, que s'ubre a lo exterior.

Aparato respiratorio[editar | editar código]

Una tortuga respirando.

A respiración no ye que pulmonar, de fueras d'os quelonios, que pueden tener una respiración bucofarinchia de poca importancia debant d'a pulmonar.

Os pulmons son dividitos en cambras y presentan graus de complexidat, dende os pulmons de Sphenodon y bells engardaixos que presentan sacos no guaire replegatos y no guaire més abanzatos que os d'os amfibios, dica masas esponchosas d'os varanos, tortugas y crocodilians, muit alviolatas y comparables a los pulmons d'os mamifers. Os ofidios pierden uno d'os dos pulmons.

En tot caso tienden a estar més complexos en a parte de debant, (por on siempre pasa l'aire dos vegatas), que en o fondón. Os mecanismos d'inspiración y espiración son més perfeccionatos que en os amfibios; pasan a tener un papel fundamental os movimientos enta dezaga d'as costiellas, movimientos que se fan con a musculatura intercostal. En beluns puet haber-ie un diafragma parcial, pero no ye completo que en os crocodilians, fendo que i haiga una deseparación completa entre as cambras toracicas y abdominal.

A larinche, part superior d'a traquia que s'ubre por a glotis a lo fondón d'a cambra bucal, amaneix sostenita por cartilagos especials (cricoides y aritenoides). En bells reptils (checonidos)y Crocodylia dica pueden plegar a producir sonitos. A mayor parte d'os reptils son manimenos mutos.

Aparato circulatorio[editar | editar código]

Imachen termografica d'un varano.

A circulación en os reptils ye doble y incompleta, (en os crocodilians quasi completa).

Corazón[editar | editar código]

O corazón d'os reptils ye en o tórax por o desembolique d'o cuello, y a l'egual que o d'as aus y mamifers careixe de seno venoso y bulbo cardiaco. Por o numero de cambras o corazón d'os reptils ye tipicament tricameral (pero en os crocodilos ye tetracameral). As tres cambras son auricla dreita, auricla ezquierda (tabicación atrial completa) y ventriclo (tabicación ventricular incompleta, de fueras d'os crocodilians, que tienen tabicación ventricular completa, con ventriclo dreito y ezquierdo).

En l'aparato circulatorio cada vegata resulta mayor a separación d'as sangres arterial y venosa. Amés d'as dos auriclas, tienen en o ventriclo un tabique, encara que incompleto, que ye prou efectibo pa impedir quasi de tot a mezcla de sangres y ninviar a mayor parte d'a sangre venosa ta os pulmons (por as arterias pulmonars), y por atro, a mayor parte d'a ya purificata, procedent de l'auricla ezquierda a lo resto de l'organismo (por as gayatas aorticas).

En os crocodilos a división plega a fer-se completa: o tabique desepara de tot o ventriclo ezquierdo d'o ventriclo dreito, o primer exclusivament pa la sangre arterial y lo segundo pa la venosa.

Gayatas aorticas[editar | editar código]

Manimenos, encara que contina a tendencia enta una simplificación d'o sistema d'as gayatas aorticas, encara i persisten as dos correspondients a lo quatreno par, as gayatas sistemicas dreita y ezquierda. A ezquierdo sale d'o ventriclo més u menos centrato enfrent d'o tabique, por o que trasporta sangre mezclata. O sistema no resulta doncas tan perfecto como en aus y mamifers, en os que no persiste que una gayata.

Tampoco en os crocodilians o sistema ye perfecto, a penar que a deseparación completa d'os ventriclos, porque a gayata ezquierda naixe en o ventriclo dreito, y leva sangre venosa, encara que pareix que reciba tamién sangre arterial por o foramen de Panizza, un forato chicot que comunica a suya base con a d'a gayata dreita.

As gayatas aorticas dreita y ezquierda d'o quatreno par se unen formando una aorta dorsal.

O par tercero de gayatas aorticas orichina o sistema carotídio, y o par seiseno, as arterias pulmonars.

Celulas sanguínias[editar | editar código]

Os globulos royos d'a sangre son siempre nucliatos y elipticos, convexos en as dos caras, més grans que en os mamifers pero muitismo menos numerosos.

Aparato excretor[editar | editar código]

O sistema excretor d'os reptils se basa en un par de rinyons de tipo metanefros u rinyón terciario y un par d'ureters secundarios, como en as aus y mamifers.

O metanefros tien un gran numero de nefronas, que no tienen ya nefrostomas ni se troban en disposición metamerica.

Os ureters secundarios sustituyen a los ureters primarios u conductos de Wolf, que esdevienen uns conductos a lo servicio exclusivo de l'aparato reproductor d'os masclos, pa trasportar espermatozoides y desembolique de glandulas anexas, mientres que en as fembras s'atrofian u desapareixen.

Os ureters secundarios desembocan dreitament en a cloaca, on apareix a vegatas una vuixiga urinaria (tortugas, tuatara y muitos saurios). Ye una formación que deriva embriolochicament d'a membrana alantoidea (endodermo), y que a lo prencipio no presenta garra relación con os ureters.

Bi ha diferents modalidatz d'excreción d'os productos nitrochenatos. Por un regular ye por medio d'acido urico, un producto que permite a reabsorción de gran cantidat d'augua en l'urodeu, con una traza que a la fin d'o proceso o pixato ye una espesa masa de color blanquenca. Ye una intresant adaptación pa no perder augua en l'ambient terrestre, y de feito se conserva siempre en os reptils de zonas aridas.

Manimenos os reptils aquaticos, que no han d'escusar augua, excretan fundamentalment urea y amoniaco (calapacos, crocodrilians). Os reptils marins a la fuerza precisan espulsar o exceso de cloruro sodico, y lo fan como as aus marinas, con glandulas especials, que en as tortugas de mar se troban en as orbitas oculars, a sal ye carreyata por as glarimas, mientres que en Amblyrhynchus se troban en as fuesas nasals y en as serpients marinas en o paladar.

Tegumento[editar | editar código]

O cuerpo ye cubierto por una piel endurita. A piel ye dividita en estratos:

  • Profundo, con celulas que se subdividen de contino, aflorando a la superficie, que asinas como se fan viellas producen queratina.
  • Externo, formato por a queratina d'as celulas muertas en forma de escatas.

A vegatas amaneixen placas osias dermicas. O tegumento tien pocas glandulas. O tegumento d'os reptils se caracteriza, especialment a diferencia d'os amfibios, por una notable queratinización y por a escaseza de glandulas, resultando-ne una piel dura y seca, adaptata a los inconvenients prencipals d'a vida en o medio terrestre, (perduga d'augua y atros). A capa cornia d'a epidermis ye muit gruesa y desembolica unas faneras caracteristicas: as escatas cornias.

As escatas cornias no tienen garra relación con as d'os peixes u encara con as de bells amfibios, osias y d'orichen dermico. Estas faneras son muit sencillas en comparanza con as equivalents d'os mamifers y aus, os pelos y plumas (estas zagueras son homologas d'as escatas d'os reptils). No son que espesamientos d'a capa cornia deseparatos ente sí por zonas més finas que fan de superficies d'articulación.

As escatas pueden estar més u menos imbricatas, a vegatas muito, como se desvién en a superficie ventral d'as serpients, con amplas escatas utils pa la locomoción. Atras vegatas son grans y aplanatas, como se desvién en os crocodilos u en a parte externa y visible d'a clasca d'as tortugas (escutos).

A vegatas prenen a forma de crestas, cuernetz, ecetra, pero a modificación més curiosa ye o cascabiello d'os Crotalinae u serpients de cascabiello. De todas trazas, as escatas cornias gosan estar muit costants en numero y disposición dentro d'as diferents especies y grupos sistematicos, d'astí que os taxonomos las tiengan muito en cuenta pa fer as clasificacions.

As escatas, por un regular tota a capa cornia d'a piel, se renuevan periodicament, unas vegatas por simple desgaste, (tortugas y crocodilians), atras por descatación (engardaixos), atras por una verdadera muda u ecdisi (serpients y bells checos). En estos casos, antes que no se forme d'una nueva capa cornia, amaneix una pelicula liquida de chos l'antiga, que una vegata formata, a serpient permuda a piel, esgallando-se l'antiga, o que se conoix en as serpients como a "camisa".

Atras faneras han amanexito tamién por primera vegata en o curso d'a evolución en os reptils, asinas os picos, presents en bells dinosauros, y huei en día en as tortugas, u as garras, cheneralizadas en os miembros marchadors de totz os reptils actuals.

Tamién se sabe que lo menos en bells reptils voladors d'a era secundaria (pterosaurios) poseyeban unas faneras en cierta traza comparables a los pelos d'os mamiferos, talment pa la protección termica.

A dermis d'os reptils asobén desembolica de chos as escatas, elementos osios que sirven como refuerzo u defensa. Son os osteodermos u placas osias cutanias que amaneixen en muitos fardachos, pero que se desembolican especialment bien en os crocodrilians y as tortugas, en estas zagueras formando a parte interna d'a clasca. Unas placas osias en forma de V, ordenatas en series, apareixen en a cara ventral de crocodilians y rincocefalos: reciben o nombre de gastralia u costiellas ventrals y o suyo orichen ye muit antigo (lo trobamos en os amfibios estegocefalos). Talment sigan una prebatina evolutiva de protecher as partz inferiors d'a dureza d'o medio terrestre. Estas gastralia son freqüents entre os reptils fósils y dica apareixen tamién en Archaeopteryx, una d'as primeras aus.

Poquismas glandulas bi ha en a piel d'os reptils y en tot caso, muit localizatas. Se'n pueden citar belunas, productoras d'olors, cheneralment holocrinas, en relación con l'actividat sexual u a demarcación d'os territorios. Por eixemplo as glandulas femorals se situan sobre a cara interna d'os muslos en os lacertidos y atros engardaixos, con un desembolique apreciablement mayor en os masclos que en as fembras. As glandulas dorsals y nucals d'os ofidios, as glandulas de l'almizcle que gosan amaneixer de chos a mandibula inferior d'os quelonios y crocodilians y tamién en a cloaca d'estos zagueros. Evidentement en os reptils no bi ha glandulas sudoriparas.

A l'egual que en os atros vertebratos, a color d'os reptils se debe pigmentos que levan os cromatoforos d'a dermis (melaninas, carotenoides, ecetra...), encara que numerosos reptils presentan colors muit vistosas, bella vegata brillants, bells reptils son conoixitos por a capacidat de cambear de color, (metacrosi). Dende l'antiguidat os camalions son celebres, pero tamién bi ha metacrosi en as salamanquesas (checonidos), iguanidos, agamidos y atros.

Fundamentament en estos cambeyos no intervienen que os melanoforos, encara d'una estructura muit particular, car son provistos de numerosas ramificacions, que se situan por dencima d'os xantoforos y guanoforos y que son capaces de modificar a repartición d'os granos de melanina en o citoplasma. Una concentración de melanina produce un aclaramiento de l'animal y fa que se manifiesten con atra intensidat d'os atros pigmentos. Os mecanismos determinants d'ixos movimientos d'a melanina son prou complexos y varían d'uns a atros reptils, d'una traza que encara que han estato prou estudiatos, encara nos se conoixen con precisión. Prencipalment os estimulos desencadenants son visuals, pero tamién intervienen a temperatura, l'acción d'a luz dreitament sobre a piel, en animals cegatos esperimentalment por eixemplo u o diferent grau d'excitación niervosa de cada animal. O control d'os melanoforos en os camalions (Chamaeleo) se desvién por vía niervosa, pero en atros reptils, como en o iguanido Anolis carolinensis, pareix tener que veyer con as hormonas. En este caso o escurimiento se produce por l'acción d'a intermedina u MSH, (hormona dispersadora de la melanina), que se fabrica en a part intermedia d'a hipofisi, mientres que l'aclarimiento se produce a espensas de l'adrenalina. Encara bi ha atro caso, o d'atro iguanido, Phrynosoma, en o que o control pareix misto, hormonal y niervoso. O significato adaptativo d'estos cambeos tamién se discute, se puet escar en a homocromía que proporciona con o medio, útil pa escapar d'os predadors, pero se suchiere que puedan afavorir a termorregulación, lo menos en bells reptils. Tarentola mauritanica y d'atros son més escuros de nueit y més claros de día, en una alternancia fácil que siga por un ritmo circadián endochen.

Sistema niervoso[editar | editar código]

O encefalo d'os reptils ye més abanzato que o d'os amfibios. Bi ha cinco partz: telencefalo, dielencefalo, mesencefalo, metencefalo y mielencefalo. En os escatosos bi ha un neopalio, acumulación de materia grisa en a superficie. Os crocodilians tamién tienen neopalio, encara poco desembolicato.

Aumenta a mida d'os hemisferios cerebrals d'o telencefalo, en os que ya bi ha un neopalio. Manimenos, o desembolique d'una crosta cerebral ye encara escasismo en comparanza con os mamifers, mientres que os cuerpos estriatos en o telencefalo y o teito optico en o mesencefalo presentan una gran impotancia: o celebro, por un regular no ye mal desembolicato, pero careixe practicament de lobulos laterals. En conchunto a suya estructura ye més pareixita a la d'o encefalo d'as aus que a la d'os mamifers, y a suya mida ye redueita. Sobretot en relación con a masa corporal d'os reptils grans, particularment os dinosauros.

Un detalle de gran intrés se troba en o diencefalo d'os reptils o dito complexo pinial, que apareix en posición dorsal y consta d'una glandula de funcions poco conoixitas (episifi), y, a vegatas (tuatara y bells saurios), d'un uello pinial, con homolochía u no con os uellos parietals, que hemos visto, por eixemplo en os agnatos actuals, encara se discute. Este tercer uello s'acofla en un foramen entre os uesos parietals y presenta estructuras (lent, retina y niervo) perfectament comparables a las d'os verdaders uellos. En os reptils estinguitos se troban foramens pareixitos, por o que tamién se i suposa que a presencia de uello pinial.

O cerebelo ye poco desembolicato.

Aparato locomotor[editar | editar código]

O escleto ye osificato de tot. Bi ha 2 vertebras sacras. Con quatro patas y cinco dedos por un regular.

En conchunto os reptils no tienen un escleto guaire diferent d'o d'os amfibios. Entre as diferencias trobamos una mayor rechionalización d'o escleto axial, (a penar que puedar haber-ie costiellas en totas as rechions), ya bi ha un cuello prou marcato, con un numero variable de vertebras, important porque aumenta a movilidat d'a cabeza respecto a lo tronco. Se modifican as dos vertebras primeras, atlas y axi, y l'axi s'articula con o cranio por medio d'un solo condilo occipital, a vegatas trilobulato. Por un regular aumenta a solideza d'a columna, con vertebras que s'engranan firmement unas con atras por medio de procesos (zigapofisis) adrezatos enta debant y enta dezaga. En bells reptils primitivos as vertebras son anficelicas, por o que entre unas y atras pueden persistir restos d'a notocorda (Sphenodon) pero as d'os actuals son por un regular procelicas.

O cranio d'os reptils hereda patrons d'os amfibios estegocefalos con més fidelidat que os mesmos amfibios actuals, prou involucionatos en este sentito. En tot caso tiende a una simplificación y se troba osificato quasi de tot. En a suya estructura destaca por a importancia a la hora d'estudear a evolución a part lateral d'a boveda dermica, dita rechión temporal on bi ha tendencia a formar-se finestras pa facilitar a inserción d'os musclos masticadors. A mayor parte d'os reptils actuals presentan en orichen un cranio con dos finestras en cada costato, una por dencima y atra por debaixo d'os uesos postorbitario y escamoso, que se unen por a metat (cranio diapsido).

Atro rasgo con intrés ye a tendencia a lo desembolique d'un segundo paladar en a cambra bucal, por medio de prolongacions laminars de diferents uesos: premaxilars, maxilars, palatins, etc..., d'una traza que as narinas internas levatas enta dezaga, s'ubren dreitament a la farinche, como se vei ya en os crocodilos. Esta fita ye important, porque permite respirar con normalidat encara tenendo ocupata a cambra bucal.

A mandibula inferior amaneix formata por 6 uesos diferents, a vegatas menos, d'os quals o dito articular ye precisament o que forma l'articulación en o cranio meyant o ueso quadrato. Asobén ye móvil y a movilidat suya se troba en relación con atra més u menos acusata d'a mandibula superior y part de debant d'o cranio (cinesi) o que pareix tener utilidat en a captura y deglución de presas grans. A l'egual que en os amfibios ni bi ha que un ueso entre o tempán y l'oido interno, a columela, derivata d'o hiomandibular.

Miembros locomotors y cinturas tienen tamién basicament o modelo d'os amfibios, con a suya orientación lateral a lo cuerpo y humers y fémurs en principio més u menos horizontals. En os reptils actuals muitas vegatas os miembros se reducen y desapareixen (Amphisbaenia, Serpentes), mientres que en os reptils fosils trobamos intresants modificacions pa diferents fins, incluitos o vuelo y la natación.

En a cintura peitoral suelen desapareixer os cleitros, de fueras de bells reptils muit primitivos, con una traza que totz os antigos components dermicos d'esta no quedan ya que as claviculas pars y una interclavicula. En a porción endocontral as escapulas y coracoides prenen por o contrario cada vegata menor importancia. Estos en posición ventral colaboran a cerrar por a part inferior a cambra toracica chunto con o interclavicular, un amplo esternón y porcions esternals d'as costiellas.

Muitos reptils, encara que no totz, careixen d'epifisis en os cabos d'os uesos, por o que nunca no terminan d'osificar-sen y pueden creixer tota a vida. Esto explica que os reptils no pleguen a tener una talla de pa cutio en o suyo creiximiento como en os mamiferos y puedan tener midas excepcionals en individuos viellos: engardaixos, serpients, crocodilos y tortugas.

Distribución y habitat[editar | editar código]

Os reptils se troban presents quasi en a totalidat d'a superficie terrestre, con a excepción de zonas masiato frías amanatas a o Polo Norte u a o Polo Sud. En estar animals de sangre fría, prefieren sindembargo as temperaturas mas calidas, asinas que a suya presencia y a suya diversidat biolochica s'incrementan en amanar-se a zonas tropicals.[1] Ye decir, os continents mas ricos en reptils sont Asia, Africa y America d'o Sud.

Os reptils han colonizato totz os medios naturals, mesmo os marins.

Os reptils pueden adaptar-se a habitats muit diferents. Se los troba muit presents en as selvas tropicals, con una gran diversidat d'especies, pero se troban igualment en os desiertos, a on se troba serpients u d'atros reptils activos mientres a nueit y que mientres o día reposan. En as zonas de montanys, a los fardaixos lis cuaca d'ocultar-se entre as piedras, y bellas serpients s'han especializato en vivir en zonas de montanya, como Vipera ursinii, que se troba en as altas montanyas d'Europa en altarias amanatas a los 2.000 metros.[2]. Bellos reptils pasan parte d'a suya vida baixo tierra, como o grupo Amphisbaenia. Os reptils tamién han colonizato os medios aquaticos: os crocodilos, bellas tortugas como Cistude en Europa y bellas serpients como Eunectes (as anacondas), o Agkistrodon piscivorus en Estatos Unitos u os Colubridae gosan vivir en ríos y lacos d'augua dulza, y tamién as tortugas ,arinas se trobn e totz os ocians y en todas as mars d'o mundo, no plegando en tierra firme so que ta reproducir-se-ie.[1]. Os Hydrophiidae u serpients marinas representan un nivel d'adaptación supérieur, en no tornar mai en tierra en a mayor parte d'as especies, habendo asoptato un ciclo de vida marino de raso. Muitismas especies de reptils tienen costumbres arboricolas, mas que mas entre as serpients y os fardaixos. Bell unas pueden desplazar-se d'árbol en árbol en «planeyando», como por eixemplo fan os Draco (dragons voladors), encara que tamién bellas serpients como Chrysopelea (as serpients voladoras).

Historia evolutiva[editar | editar código]

Orichen d'o reptils[editar | editar código]

Un reptil primitivo, Hylonomus lyelli.

Os reptils amanioxioron alto u baixo fa 320 millons d'anyadas en as maresmas de zaguerías d'o Carbonifero, estando una evoluición d'animals reptiliomorfos abanzatos.[3]. Os reptiliomorfos que han esdevenito amniotas se distinguen d'o amfibios por o suyo uevo, con una cosca solida que permite a puesta mesmo en o suelo. Ixo permite a los reptils de colonizar o medio terrestre en pasando-ie a integridat d'a suya vida, mientres que os amfibios quedan mas vinclatos en o medio aquatico.[4] Ixa traza de uevo, dito uevo amniotico, ye caracteristico d'os amniotas, un taxón d'animals d'os que os primers representants pueden ser qualificaos como reptils. L'amniota mas antigo conoixito ye Casineria, considato mas como un reptil primitivo millor que como un amfibio abanzato.[5][6]. Una serie de pisatas fósils trovatas en Nueva Escocia, de fa 315 millons d'anyadas, presenta as marcas d'as escatas caracteristicas d'os reptils.[7] S'atribuye ixas marcas a Hylonomus, o primer amniota clasificato sin discusión como tal.[8]. Yera un chicot animal pareixito a un fardaixo, d'alto u baixo 20 u 30 cm de longaria, con muitas dients de punta fendo constar o suyo rechimen alimentario insectivoro.[9]. Entre os mas antigo reptils conoixitos s'encluye tamién Westlothiana, a qui se considera sindembargo mas com un amfibio reptiliomorfo que como un verdadero amniota[10] y Paleothyris, que tienen un aspecto y comportamientos semilars a Hylonomus.

Bibliografía[editar | editar código]

Vinclos externos[editar | editar código]

Referencias[editar | editar código]

  1. 1,0 1,1 (O'Shea, 2005, 28)
  2. (fr) Dieter Zorn: Les vipères d'Europe de l'Ouest.
  3. (en) M. Laurin y R. R. Reisz: A reevaluation of early amniote phylogeny, en Zoological Journal of the Linnean Society, volumen 113 pachinas 165-223, 1995
  4. (en) Monroe W. Strickberger, Evolution, Jones & Bartlett Learning, 2005, 722 p. ISBN 978-0-7637-3824-2
  5. (en) R. L. Paton, T. R. Smithson y J. A. Clack: An amniote-like skeleton from the Early Carboniferous of Scotland en Nature, volumen 398, pachinas 508-513, 8 d'abril de 1999.
  6. (en) R. Monastersky: Out of the Swamps, How early vertebrates established a foothold—with all 10 toes—on land, 1999, Science News, volumen 21, pachina 328.
  7. (en) H.J. Falcon-Lang, M.J. Benton y M. Stimson: Ecology of early reptiles inferred from Lower Pennsylvanian trackways, 2007 Journal of the Geological Society, Londres, volumen 164, pachinas 1113-1118.
  8. (en) Earliest Evidence For Reptiles Sflorg.com.
  9. (en) D. Palmer: The Marshall Illustrated Encyclopedia of Dinosaurs and Prehistoric Animals, 1999, Marshall Editions, Londres, pachina 62 ISBN 1-84028-152-9.
  10. (en) M. Ruta, M.I. Coates y D.L.J. Quicke: Early tetrapod relationships revisited, 2003, Biological Review, volumen 78, pachinas 251-345.