Wiener Gürtel Straße
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
  Wiener Gürtel
| |
|---|---|
 | |
| Ciudat | Viena |
| Districto | Cuantos districtos |
| Prencipia | A23 Südosttangente |
| Denominación | B 221 Wiener Gürtel Straße |
 | |
 
| |
O Gürtel (literalment "centurón", en dialecto vienés Wiena Giatl Schtråssn) ye un centurón de circumvalación d'a ciudat de Viena, en Austria. Con una largaria total de 13,1 km, ye paralelo a o famoso Ringstraße que rodia a la Inner Stadt. Pasa por os districtos de Landstraße, Wieden, Margareten, Mariahilf, Neubau, Josefstadt, Alsergrund, Meidling, Rudolfsheim-Fünfhaus, Ottakring, Hernals, Währing y Döbling
O nombre oficial d'a vía ye B 221 Wiener Gürtel Straße. Por o sud prencipia en a unión con l'autovía A23 Südosttangente en o districto de Landstraße y contina por l'ueste enta a Gara d'o Sud. Aquí o Wiener Gürtel y o Margaretengürtel marcan a muga entre os districtos de Wieden y Margareten con o districto de Favoriten en o sud. O Gürtel alavez chira enta o norte, travesando o districto de Meidling por a suya parti este, cruzando o río Viena y a Wienzeile y deseparando os districtos de Mariahilf y Neubau a l'este de Rudolfsheim-Fünfhaus chunto a la Gara de l'Uesta. A carretera contina como muga entre Josefstadt y Alsergrund con os districtos exteriors de Hernals y Währing, pasando chunto a o Hespital Cheneral de Viena (Allgemeines Krankenhaus, AKH) y a Volksoper. En a suya parti mas septentrional, en Döbling, o Gürtel trescruza a canal d'o Danubio en o Gürtelbrücke (Puent d'o Gürtel). Dende a Wienzeile dica o suyo extremo norte, se troba chunto a o doble carril o viaducto d'o historico Stadtbahn disenyato por Otto Wagner y que hue fa parti d'a linia U6 d'o metro de Viena.
Historia[editar | modificar o codigo]
O Gürtel fue construyito dende 1873 en o mesmo puesto a on se trobaba a Linienwall, a muralla d'a ciudat construyita por l'emperador Leopoldo I d'Habsburgo en primerías d'o sieglo XVIII ta protecher a suya residencia d'as invasions d'os kuruc en a Guerra d'a Independencia de Rákóczi. Dimpués d'a Primera Guerra Mundial prencipioron a construyir-se arredol d'ista carretera cuantas viviendas de protección oficial (as ditas Gemeindebauten) en a era d'a dita Viena Roya.
Como en atras partis de l'Imperio Austrohongaro, os vehiclos d'antis mas circulaban por a ezquierda, como en o Reino Uniu, pero dimpués de l'Anschluss en 1938 y d'alcuerdo con as regulacions de trafico d'o Tercer Reich, os vehiclos prencipioron a circular en Viena por a dreita igual que se feba en a resta d'o continent. Os plans desenvolicatos en os anyos 1960 y 1970 ta reconstruyir o Gürtel como una autovía urbana nunca no se facioron. Manimenos ista vía, igual que a resta d'arias residencials adchacents, son afectatas por un gran volumen de trafico.
Bibliografía[editar | modificar o codigo]
- Madeleine Petrovic: Der Wiener Gürtel. Wiederentdeckung einer lebendigen Prachtstraße (Verlag Christian Brandstätter: Viena, 1998) (ISBN 3854477236).