Vocal
As vocals son os sonius d'una luenga que s'articulan exclusivament con a vibración d'as cuerdas vocals, sin que o paso de l'aire por as cavidaz superiors de l'aparato fonador (a farinche, a cavidat bucal y a cavidat nasal) i adhiban dengún atro elemento sonoro. Istas cavidaz nomás actuan como resonadors, alterando os harmonicos d'o soniu activau por as cuerdas vocals. As vocals s'oposan a las consonants.
I hai tres factors de clasificación d'as vocals, en función de como a cavidat bucal y a cavidat nasal alteran os harmonicos d'o soniu produciu por as cuerdas vocals:
- o punto d'articulación, que pende d'a posición d'a luenga, que puet estar avanzada u atrasada, y/u alto u baixo baixada (vocal ubierta) u devantada (vocal zarrada) enta o paladar.
- a labialización, que pende d'a posición d'os labios, con arredondeyo u sin.
- a nasalización, que pende d'a participación u no pas d'a cavidat nasal como resonador.
En acustica os diferents formants de cada vocal se veyen como partis foscas d'un espectrograma. As vocals son os sonius más estudiaus.
Una vocal puet unir-se con atras en a pronunciación y formar asinas un diftongo u un triftongo, presents en a mayoría de luengas. A capacidat de distingir entre sonius vocalicos seguius se diz vocalización cuantica.[1] Cal sinyalar que a pronuncia d'as vocals varía muito entre os diferents idiomas. Os signos pa representar as vocals son os que más a sobén levan un diacritico.
Vocals en as diferents luengas
[editar | modificar o codigo]En bellas luengas, particularment as luengas semiticas, l'alternancia de vocals tiende a marcar inflexions, y no s'acostumbran a escribir en os suyos alfabetos. En atras luengas, as vocals son un fonema esencial d'a palabra. As vocals son especialment importants en luengas que disponen de pocas consonants (como por eixemplo o maorí u o hawaiano), u luengas en que a proporción de consonants ye relativament chicota (como o sedang, parient d'o vietnamita, que distingue 55 sonius vocalicos diferents). O chaponés ye una d'as poquismas luengas que tien vocals xordas.
En muitas luengas, entre ellas l'aragonés, no se puet tener una silaba sin vocal, ya que actuan como nuclio silabico. De feito, una vocal sola puet formar una silaba y mesmo una palabra completa: a, a-rro-ce-gar, pe-ón, o-bo-e, man...
Sistemas vocalicos
[editar | modificar o codigo]A mayoría de luengas tienen entre 3 y 7 vocals, y istas 5 son as más comunas: A, E, I, O, U. Se gosan representar seguntes o trianglo vocalico de l'AFI.
Ista configuración ye a más comuna porque representa l'uso más eficaz d'o espacio vocalico, de manera que chicotas variacions en una vocal no producen confusions. Como eixemplo, o castellano y o griego moderno emplegan iste sistema. O latín ya teneba una configuración pareixida, si bien distinguiba entre vocals curtas y largas. Manimenos, no toz os suyos derivaus estioron tan frugals como o castellano, ya que o francés distingue 16 vocals (incluyindo-ie as nasals). D'entre as luengas europeas, as chermanicas son particularment ricas en sonius vocalicos, con o sueco liderando iste grupo, con 17 vocals.
En l'atro extremo d'o espectro, os dialectos tsvanjaliano y sujumiano de l'abkhasio conoixen nomás dos vocals. Todas as luengas naturals incluyen bella mena de a.
O sistema vocalico aragonés
[editar | modificar o codigo]En aragonés, en cheneral, i hai cinco fonemas vocalicos:[2] /a/, /e/, /i/, /o/ y /u/. L'aragonés benasqués incluye amás a posibilidat de E y O ubiertas u zarradas, por lo que tendría dica siet vocals: as mesmas de l'aragonés cheneral y as dos variants semiubiertas /ɛ/, /ɔ/
Referencias
[editar | modificar o codigo]- ↑ (ca) Bueno i Torrens, David (2015), “Llenguatge, creativitat i lliure albir: l'origen evolutiu de la capacitat lingüística”, en Llengua, societat i comunicació, 13.
- ↑ (an) Estudio de Filología Aragonesa Gramatica basica de l'aragonés, Prensas d'a Universidat de Zaragoza (PUZ), 2021, ISBN 978-84-1340-204-8, p. 22
