Ull

Pa l'organo identificau con o sentiu d'a vista se veiga uello; ta lo lugar d'a Chacetania, se veiga Ulle.

Ull
Despoblau medieval d'Aragón
Entidat  • País  • Provincia  • Comarca  • Municipio	Despoblau medieval  Aragón  Zaragoza Cinco Villas Sos d'o Rei Catolico
Partiu chudicial	Exeya d'os Caballers
Población  • Total	0 hab.
Codigo postal	50596
Parroquial  • Diocesi  • Arcipestrau	Chaca Erla-Uncastiello
Coordenadas	42°25’36’’N 1°14’47’’U
Ull Ull en Aragón

Ull ye un lugar despoblau aragonés, d'antes mas situau en o municipio de Sos d'o Rei Catolico, comarca de Cinco Villas, partiu chudicial d'Exeya d'os Caballers y provincia de Zaragoza, pero actualment situau en territorio de Sangüesa, en a comarca navarra de Sangüesa y merindat de Sangüesa. Ye despoblau dende lo sieglo XIII.

Historia

En a documentación o suyo nombre gosa apareixer como "Ull propter Sangüesa", ta distinguir-lo de l'Ull amán de Chaca, actualment lo lugar d'Ulle en termin municipal de dita villa.

En o suyo termin se trobaba o castiello d'Ull, un castiello que en 1283 fue obchecto d'un seche (lo seche d'Ull) por tropas d'o Reino de Navarra mandadas por Eustaquio de Beaumarchais, mientres a Cruzada contra la Corona d'Aragón ordenada por o papa Martín IV, que dimpués destruyioron o lugar d'Ull, Filera y Lerda, y conquerioron Bailo, Arbués y Berdún. Dende alavez, os tres primers lugars fuoron albandonaus. Tamién destruyioron atros lugars en a val de Pintano y l'arredol, como Nogueras, Soteras, Miranda, Loparuela, Asotiello, Berné y Xabierre-Martés.

Dimpués de l'ataque, se fundó la localidat d'O Reyal, con os habitants d'Ull, Filera y Lerda, como un punto con a finalidat de defender as mugas aragonesas d'as incursions navarras, incorporando-se lo termin d'Ull a ista nueva localidat.

Tanimientres, en o marco d'os constants conflictos en a muga entre Sangüesa y O Reyal, iste zaguer lugar quedó igualment despoblau, incorporando-se ista vegada lo suyo termin, incluyiu Ull, a lo temin de Sos, continando atamas d'ixo los conflictos, que no rematoron que dica 1513-1514 con una decisión de Ferrando II que cedeba una chicota part de territorio a Sangüesa, centrau en o lugar a on d'antes mas s'ubicaba Ull, en a marguin de l'Onsella.

Referencias

Lugars desapareixius de Sos d'o Rei Catolico
O Reyal | Ull

• Datos: Q136913613