Transchenero

De Biquipedia
Ir a la navegación Ir a la búsqueda
Colache fotografico de bellas presonas trancheners famosas. De cucha enta dreita e d'entalto ta abaixo: Lili Elbe, Laverne Cox, Thomas Beatie, Chaz Bono, Balian Buschbaum e Lynn Conway.
Bandera de l'argüello transchenero.

As presonas transcheners ha una identidat de chenero u esprisión de chenero que difier de lur asignación de sexo en naixer.[1][2][3] Bellas presonas transcheners qui deseyan una intervención medica ta transicionar d'un sexo ta l'atro se identifican como transexuals.[4][5] O termin "transchenero", a vegadas apocopato como "trans", ye tamién un termin bateauguas. Antimás d'incluyir-bi chent que a suya identidat de chenero ye a oposata a lo suyo sexo asignato (hombres trans e mullers trans), puet incluyir-se-bi tamién chent qui no ye exclusivament ni masculina ni feminina (chent qui ye no binaria u chenderqüir, incluyendo-bi lo bichenero, o panchenero, o chenero fluido u l'achenero.[2][6][7] Atras definicions de "transchenero" se puet definir a-saber-lo amplament ta incluyir-bi a os transformistas.[8]

Estar transchenero ye independient d'a orientación sexual.[9] A chent transchenero se pueden identificar como heterosexuals, homosexuals, bisexuals, asexuals u pueden no etiquetar lur orientación sexual. O termin "transchenero" tamién se distingue d'o intersexual, termin que describe a chent naixita con caracteristicas sexuals fisicas "que no s'achustan a las nocions binarias tipicas de cuerpos masculinos e femininos".[10] L'antonimo de "tranchenero" ye "cischenero", que describe a presonas que lur identidat u esprisión de chenero consona con lur sexo asignato.[11]

O grau que os individuos se i sienten chenuinos, autenticos e comodos adintro lur apariencia externa e bi acceptan lur identidat chenuina se ye clamato "congruencia transchenero".[12] Muita chent transchenero permena disforia de chenero e beluns en miran de tractamientos medicos como a terapia hormonal ta transchenero, a cirurchía de reasignación de sexo u a psicoterapia.[13] No tota la chent transchenero deseya istos tractamientos e beluns no pueden chusmeter-se-bi por razons economicas u medicas.[13][14]

Muita chent transchenero se concara con a discriminación en o puesto de treballo[15] y en acceder ta aloixes publicos[16] e servicios de salut.[17] En muitos puestos, no son legalment protechitos d'a discriminación.[18]

Evolución d'a terminolochía transchenero[editar | editar código]

Amigos qui son transcheners en Washington, DC.

O psiquiatra John F. Oliven d'a Universidat de Columbia enfalcó o termin "transchenero" en a suya obra de 1965 Sexual Hygiene and Pathology,[19], escribindo que o termin que se yeran previament usato, transexualidat, "ye confuso; realment, significa 'transchenerismo', porque a sexualidat no ye un factor principal en o travestismo primario".[20][21] O termin "transchenero" estió allora popularizato con definicions variables por a-saber-las presonas transcheners, transexuals e travestis, incluita Virginia Prince,[4] qui lo emplegó en a edición d'aviento de 1969 de Transvestia, una revista nacional ta travestis que ella heba fundata.[22] A meyatos d'os anyos 1970 tant "transchenero" como "chent trans" s'emplegaban como termins bateauguas e "tranchenerista" s'usaba ta referir-se a chent qui quereba vivir trasvestitos sinse cirurchía de reasignación de sexo.[23] En 1976, "transchenerista" (trangenderist) s'acurzó "TG" en os materials educativos en anglés.[24]

En 1984, o concepto de "comunidat transchenero" se yera desembolicato, a on "transchenero" s'emplegaba como un termin bateauguas.[25] En 1985, Richard Elkins establió l'"Archivo Transchenero" (Trans-Gender Archive) en a Universidat de l'Ulaidh (en anglés Ulster University u University of Ulster; en escocés Ulstèr Universitie u Ulstèr Varsitie; y en irlandés Ollscoil Uladh).[22] En 1992, a Conferencia Internacional sobre Lechislación e Politica d'Emplego Transchenero (en anglés International Conference on Transgender Law and Employment Policy) definió "transchenero" como un amplo termin que incluyiba a os "transexuals, transcheneristas, travestis" e a qualsiquier que yera transicionando.[26] O panfleto de Leslie Feinberg "Transgender Liberation: A Movement Whose Time has Come", que circuló en 1992, identificó "transchenero" como un termin que unificase totas as trazas de disconformidat de chenero; asinas "transchenero" ye esdevenito un sinonimo de "qüir" (en anglés queer).[27]

Entre meyatos d'os anyos 1990 y escomencipios d'os anyos 2000, os termins principals emplegatos chus os bateauguas transchenero yeran "muller ta hombre" ta hombres qui transicionaban de muller ta hombre, e "hombre ta muller" ta mullers qui transicionaban d'hombre ta muller. Istos termins agora se son esbancatos por "hombre trans" e "muller trans" repectivament, e os termins "transmasculín" e "transfeminín" son creixendo en uso.[28] Iste cambio de preferencia dende termins que resaltaban o sexo biolochico (como "transexual" u "muller ta hombre") enta termins que resaltaban a identidat y esprisión de chenero (como "transchenero" u "muller trans") reflectan un cambio mas amplo en o replecamiento de l'autoconcepto d'a chent transchenero e un reconoiximiento creixent de qui declinan a reasignación medica como parti d'a comunidat transchenero.[28]

Os manual d'a practica medica, os manuals d'estilo d'os profesionals d'o periodismo e as collas d'esfensa LGBT consellan que os otris adopten o nombre e os pronombres con que s'identifica la presona en qüestión, incluyendo as referencias presents sobre lo pasato d'a presona transchenero.[29][30] Tamién muitos observan que "transchenero" deberba emplegar-se como un adchectivo e no como un substantivo, por eixemplo: "Max ye transchenero" u "Max ye un hombre transchenero" e no "Max ye un transchenero") e que "transchenero" (en anglés transgender) deberba emplegar-se e no "transchenerato" (transgendered").[31][32][33]

D'atra man, as presonas con una sensación de que lur identidat personal corresponde a lo sexo e chenero asignatos a ellas en naixer, ye dicir, qui no son ni transcheners ni no binarios u chenderqüirs, son ditas "cischeners".[34]

O transexual e a suya relación con o transchenero[editar | editar código]

O termin "transexual" introdueito estió introdueito en anglés (transsexual) en 1949 por David Oliver Cauldwell[35] e popularizato por Harry Benjamin en 1966, arredol d'a mesma epoca quan o termin "transchenero" (trangender en anglés) s'enfalcó y escomencipió a popularizar-se.[4] Dende os anyos 90, s'emplegaba o termin "transexual" ta referir-se a lo subconchunto d'a chent "transchenero"[4][36][37] qui deseyaban transicionar permanentment enta lo chenero con que s'identifican e qui en miraban d'asistencia medica (por eixemplo, a cirurchía de reasignación de sexo) con isto.

As distincions entre os termins "transchenero" e "transexual" s'alazetan comunment en distincions entre "chenero" (psicolochico, social) e "sexo" (fisico).[38][39] Doncas, se poderba dicir que a transexualidat lidia mas con os aspectos fisicos d'o sexo d'uno, entre que as consideracions transcheners lidian mas con a disposición u predisposición de chenero psicolochico d'uno, asinas como as expectativas socials relacionatas que pueden acompanyar a un determinato paper de chenero.[40] Muita chent transchenero refusa o termin "transexual".[5][41][42] Christine Jorgensen publicament refusó a parola "transexual" en 1979 y en cuenta d'ista, s'identificó a ella mesma en a prensa, dicindo "o chenero no tien que veyer con os companyers de leito, tien que veyer con a identidat".[43][44] Isto se refiere a que "transexual" ha bellacosa que veyer con a sexualidat, quan en realidat lo ha con a identidat de chenero.[45] Bells transexuals obchectan lur inclusión chus o bateauguas "transchenero".[46][47][48][49]

En o suyo libro de 2007 Transgender, an Ethnography of a Category, l'antropologo David Valentine afirma que a parola "transchenero" s'enfalcó e fue usata por activistas ta incluir-bi-ne de presonas qui no necesariament s'identifican con o termin e os estatos que a chent qui no s'identifica con o termin "transchenero" no deberba incluir-se chus o bateauguas transchenero.[46] Leslie Feinberg tamién asevera que a parola "transchenero" no ye un termin autoidentificador (ta bellas presonas) sino una categoría imposata por alufradors ta replecar a atras presonas.[47] O Transgender Health Program (THP) en o Fenway Health en Boston para cuenta de que no bi ha garra definición universalment acceptata e de que o trafuque terminolochico ye freqüent porque os termins que yeran populars arredol d'o sieglo XXI agora se pueden considerar ofensivos. O THP recomienda a os clinicos preguntar a os clients qué terminolochía prefieren y estalbiar o termin "transexual" a menos que siga seguros de que un client en ye comodo.[45]

Harry Benjamin inventó un sistema de clasificación ta transexuals e transvestitos, dita Escala d'Orientación Sexual (en anglés Sex Orientation Scale, con siglas SOS), a on iste asigna a os transexuals e transvestitos ta una d'as sies categorías alazetatas en lurs razons ta lo transvestismo y en a urchencia relativa de lur amenister (si en bi ha) ta la cirurchía de reasignación de sexo.[50] As visions contemporanias sobre a identidat e clasificación de chenero difiere de traza marcata d'as opinions orichinals de Harry Benjamin.[51] A orientación sexual ya no se considera pas como criterio ta la diagnosi u ta las distinción entre transexualidat, transvestismo e atras menas de conducta e d'esprisión de chenero. A escala de Benjamin fue designata ta emplegar-la con as mullers trans e as identidatz d'os hombres trans no s'alinian pas con as suyas categorías.[52]

Atras categorías[editar | editar código]

Istas replegan a os chenderqüirs/cheners no binarios, a os transformistas/transvestitos, a os dragkings e dragqüins e a las presonas intersexuals.

No binarios, incluitos androchins e bicheners[editar | editar código]

Os chenderqüirs (en anglés genderqueer) u as identidatz de chenero no binarias no son pas especificament ni masculinas ni femininas. Istos pueden estar acheners, androchins, bicheners, pancheners u de chenero fluido[53] y existen difuera d'a cisnormatividat.[54][55] Bichenero e androchino son categorías que se solapan; os individuos bicheners pueden identificar-sen como bochando-sen entre os papers masculins e feminins (de chenero fluido) u como estando alavegada tant masculins como feminins (androchins) e os androchins pueden identificar-sen como mas dillá d'o chenero u sinse chenero (postcheners, acheners), entre cheners (intercheners), bochando-sen a traviés d'os cheners (de chenero fluido) u amostrando alavez multiples cheners (pancheners).[56] Androchín ye también a vegadas emplgato como sinonimo medico ta una presona intersexual.[57] As identidatz de chenero no binarias son independients d'a orientación sexual.[58][59]

Transvestito u transformista[editar | editar código]

Un transvestito ye una presona qui se transviste, isto ye, que se viste con ropas tipicament d'o sexo oposato a l'asignato en naixer.[60][61] A parola "transvestito" s'emplega como sinonimo de "transformista",[62][63] encara que "transformista" se considera cheneralment o termin preferito.[63][64] O termin "transformista" no se define de traza exacta en a literatura de referencia. Michael A. Gilbert, profesor d'o Departamento de Filosofía en a Universidat York, de Toronto, ofreix ista definición: "(Una presona transchenero) ye una presona qui ha una aparent identificación de chenero con l'atro sexo".[65] Ista definición excluye a "qui levan ropas d'o sexo oposato por atras razons", como aquells imitador feminins qui nomás contemplan transvertir-sen por treballo, por papers d'actor u por diversión en una fiesta de disfraces etcetra. Istos individuos se transvisten pero no son pas transformistas".[66] Os transformistas pueden no identificar-sen, quieren estar u adoptar-ne de conductas u practicas d'o sexo oposato e por o cheneral no quieren cambiar lurs cuerpos medicament u quirurchica. A mayoría d'os transformistas s'identifican como heterosexuals.[67]

O termin "transvestito" e o termin desactualizato "transvestismo" son conceptualment diferents d'o termin "fetichismo transvestista", ya que "fetichista transvestista" se refiere a qui intermitentment n'usan de ropas d'o sexo oposato con fins fetichistas.[68][69] En termins medicos, o "transvestismo fetichista" difiere d'o transformismo en o emplego de codigos diferents; 3022.3[69] en o Manual diagnostico y estatistico de transtornos mentals (DSM) e F65.1[68] en o Clasificación Internacional de Malautías (ICD).

Dragkings e dragqüins[editar | editar código]

Una dragqüin actuando.

Estar drag (en anglés drag) consiste en transvestir-se e maquillar-se ta enchaquias especials ta actuar u entretener, no como os transcheners u os transformistas, que en fan por atras razons.[70] Una actuación d'un u una drag una representación e conducta total, antimás d'a ropa e o maquillache. Un u una drag puet estar aparatero, comico u grotesco. As dragqïns son estatas consideratas caricaturas d'as mullers por o feminismo d'a segunda ola. Os artistas drags han una luenga tradición en a cultura LGTB.

En cheneral, o termin "dragqüin" (en anglés drag queen) se refiere a os hombres qui fan d'una drag feminina, entre que "dragking" (en anglés drag king) se refiere a las mullers qui fan d'un drag masculín e os "foxqüins" (en anglés faux drag) se refieren a las mullers qui fan d'una drag feminina.[71][72] Manimenos, en bi ha d'artistas drags de qualsiquier chenero e sexualidat qui actúan por varias razons. Os actors e actrices drags no tienen que estar inherentment transcheners. Qualques actors drags, transvestitos e presonas d'a comunidat gai han adoptato lo termin derivato d'o porno "trani" (en anglés tranny) ta dragqüins u chent qui s'embrecan en o transvestismo u transformismo: sindembargo, iste termin se considera a-saber-lo ofensivo si s'aplica a la chent transchenero.

Referencias[editar | editar código]

  1. "Altilio, Terry; Otis-Green, Shirley (2011). Oxford Textbook of Palliative Social Work (en anglés). Oxford University Press. p. 380. ISBN 978-0199838271. Archivato de l'orichinal l'1 d'aviento de 2016. Consultato lo 12 d'april de 2016. "Transchenero ye un termin bateauguas ta chent qui a suya identidat de chenero e/u esprisión de chenero difier d'o sexo que lis asignoron en naixer (Gay and Lesbian Alliance Against Defamation [GLAAD], 2007).
  2. 2,0 2,1 Forsyth, Craig J.; Copes, Heith (2014). Encyclopedia of Social Deviance (en anglés). Sage Publications. p. 740. ISBN 978-1483364698. Archivato de l'orichinal l'1 d'aviento de 2016. Consultato lo 12 d'april de 2016. "Transchenero ye un termin bateauguas ta chent qui as suyas identidatz de chenero e/u esprisions de chenero e/u conductas son diferents d'aquellas culturalment relacionatas con o sexo que bi estioron asignatos en naixer."
  3. Berg-Weger, Marla (2016). Social Work and Social Welfare: An Invitation. Routledge (en anglés). p. 229. ISBN 978-1317592020. Archivato de l'orichinal l'1 d'aviento de 2016. Consultato lo 12 d'april de 2016. "Transchenero: termin bateauguas que describe a chent qui a suya identidat de chenero e/u esprisión de chenero difier d'as expectativas asociatas con o sexo asignatos a ells en naixer."
  4. 4,0 4,1 4,2 4,3 Thomas E. Bevan, The Psychobiology of Transsexualism and Transgenderism (en anglés) (2014, ISBN 1-4408-3127-0), page 42: "O termin transexual estió introdueito por Cauldwell (1949) e popularizato por Harry Benjamin (1966) [...]. O termin transchenero estió enfalcato por John Oliven (1965) e popularizato por varias presonas transcheners qui estioron os primers en emplegar iste concepto e practicar o transchenerismo. A veces se diz que Virginia Prince (1976) popularizó lo termin, pero a historia contrimuestra que muitos transcheners esfendioron l'uso d'iste termin muito mas que Prince."
  5. 5,0 5,1 R Polly, J Nicole, Understanding the transsexual patient: culturally sensitive care in emergency nursing practice, in the Advanced Emergency Nursing Journal (2011) (en anglés): "L'uso d'a terminolochía por parti d'os individuos transexuals ta identificar-se a ells mesmos. Como se ye mencionato entalto, muitos individuos transexuals prefieren o termin transchenero, u simplament trans, ya que ye mas inclusivo y en carrían de menos estigmas. Bi ha bells individuos transexuals (...) manimenos, qui refusan o termin transchenero; istos individuos veyen a transexualidat como una condición conchenita tractable. Seguntes a transición medica e/u quirurchica, viven adintro d'o sistema binario ya siga como hombre u como muller e pueden no revelar lur enanto de transición."
  6. Gay and Lesbian Alliance Against Defamation. "GLAAD Media Reference Guide – Transgender glossary of terms" (en anglés) Archivato o 03-06-2012 en WebCite, "GLAAD", EE.UU., a mayo de 2010. Consultato lo 24-02-2011. "Un termin bateauguas ta chent que a suya identidat de chenero e/u esprisión de chenero difier d'o que ye tipicament asociato a lo sexo que lis estió asignato en naixer."
  7. Bilodeau, Brent (2005). "Beyond the Gender Binary: A Case Study of Two Transgender Students at a Midwestern Research University" (en anglés). Journal of Gay & Lesbian Issues in Education. 3 (1): 29–44. doi:10.1300/J367v03n01_05. "Sindembargo Jordan e Nick representan un segmento de comunidatz de transcheners qui amplament se son omititas en as rechiras d'o desembolique d'o transchenero e d'o estudiant– individuos qui esprisan una construcción no binaria de chenero [...]"
  8. Reisner, Sari L; Conron, Kerith; Scout, Nfn; Mimiaga, Matthew J; Haneuse, Sebastien; Austin, S. Bryn (2014). "Comparing In-Person and Online Survey Respondents in the U.S. National Transgender Discrimination Survey: Implications for Transgender Health Research" (en anglés). LGBT Health. 1 (2): 98–106. doi:10.1089/lgbt.2013.0018. PMID 26789619. "Se ye definito transchenero amplament ta cubrir a qui transicionan d'un chenero enta unatro asinas como a qui pueden no trigar una transición completa socialment, medica u legal, incluyindo-bi a os transformistas, presonas qui se consideran estar chenderqüirs, androchinos, e (…)"
  9. "Sexual orientation, homosexuality and bisexuality" (en anglés). Asociación Estatounitense de Psicolochía. Archivato de l'orichinal l'8 d'agosto de 2013. Consultato lo 10 d'agosto de 2013.
  10. "Free & Equal Campaign Fact Sheet: Intersex" (PDF en anglés). Oficina d'as Nacions Unitas de l'Alto Commisionato ta os Dreitos Humans. 2015. Archivato (PDF) de l'orichinal o 4 de marzo de 2016. Consultato lo 28 de marzo de 2016.
  11. "Definition of CISGENDER" (en anglés). www.merriam-webster.com. Archivato (PDF) de l'orichinal o 26-03-2019. Consultato lo 26-03-2019.
  12. Kozee, H. B.; Tylka, T. L.; Bauerband, L. A. (2012). "Measuring transgender individuals' comfort with gender identity and appearance: Development and validation of the Transgender Congruence Scale" (en anglés). Psychology of Women Quarterly. 36 (2): 179–196. doi:10.1177/0361684312442161.
  13. 13,0 13,1 Victoria Maizes, Integrative Women's Health (2015, ISBN 0190214805), pachina 745 (en anglés): "Muita chent transchenero permena disforia-anguna de chenero resultant d'a disonancia entre lo sexo biolochico e lo sexo experimentato (Asociación Estatounitense de Psicolochía, 2013). O tractamiento ta la disforia de chenero, considerato a-saber-lo efectivo, n'incluye de tractamientos fisicos, medicos, e/u cirurchicos [...] beluns [transcheners] pueden no triar de transicionar brenca."
  14. "Understanding Transgender People FAQ" (en anglés). National Center for Transgender Equality. 1 de mayo de 2009. Archivato de l'original o 22 d'abril de 2016. Consultato lo 20 d'abril de 2016.
  15. Lombardi, Emilia L.; Anne Wilchins, Riki; Priesing, Dana; Malouf, Diana (October 2008). "Gender Violence: Transgender Experiences with Violence and Discrimination" (en anglés). Journal of Homosexuality. 42 (1): 89–101. doi:10.1300/J082v42n01_05. PMID 11991568.
  16. Gay and Lesbian Alliance Against Defamation. "Groundbreaking Report Reflects Persistent Discrimination Against Transgender Community" (en anglés). Archivato lo 03-08-2011 en Wayback Machine, GLAAD, Estatos Unitos d'America, o 4 de febrero de 2011. Consultato lo 24-02-2011.
  17. Bradford, Judith; Reisner, Sari L.; Honnold, Julie A.; Xavier, Jessica (2013). "Experiences of Transgender-Related Discrimination and Implications for Health: Results From the Virginia Transgender Health Initiative Study" (en anglés). American Journal of Public Health. 103 (10): 1820–1829. [1]. PMC 3780721. PMID 23153142.
  18. Whittle, Stephen. "Respect and Equality: Transsexual and Transgender Rights." (en anglés) Routledge-Cavendish, 2002.
  19. Oliven, John F. (1965). Sexual hygiene and pathology: a manual for the physician and the professions. Lippincott.
  20. Oliven, John F. (1965). "Sexual Hygiene and Pathology" (en anglés). The American Journal of the Medical Sciences. 250 (2): 235. doi:10.1097/00000441-196508000-00054.: "Quan l'anglucia compulsiva plega mas dillá d'a indumentaria feminina e se torna en una anglucia de cambio de chenero ("sexo"), o transvestismo esdevién "transexualidat." O termin ye confuso; realment, significa 'transchenerismo', porque a sexualidat no ye un factor principal en o travestismo primario. Psicolochicament, o transexual a ormino difiere d'o simplo trasvesti; ell ye conscient en tot o tiempo d'o cerenyo deseyo d'estar una muller e l'anglucia puet estar verdaderament inaturable.", p. 514
  21. Rawson, K. J.; Williams, Cristan (2014). "Transgender: The Rhetorical Landscape of a term" (en anglés). Present Tense: A Journal of Rhetoric in Society. 3 (2). Archivato de l'orichinal lo 15-05-2017. Consultato lo 18-05-2017.
  22. 22,0 22,1 Elkins, Richard; King, Dave (2006). The Transgender Phenomenon (en anglés). Sage. pp. 13–14. ISBN 978-0-7619-7163-4. Archivato de l'orichinal o 26-09-2015.
  23. Stryker, S. (2004), "... viviban perén en un rol social tipicament no asociato a lur sexo natal pero qui no recurriban a la cirurchía chenital como meyo d'emparar lur presentación de chenero ..." en Transgender (en anglés). Archivato lo 21-03-2006 en a Wayback Machine d'a GLBTQ: una enciclopedia de cultura gai, lesbiana, bisexual, transchenero e qüir. Consultato lo 10-04-2007.
  24. The Radio Times (2 de chunio de 1979).
  25. Peo, TV-TS Tapestry Board of Advisors, Roger E. (1984). "The 'Origins' and 'Cures' for Transgender Behavior" (en anglés). The TV-TS Tapestry (2). Archivato de l'orichinal o 7 d'abril de 2012. Consultato lo 28 de mayo de 2012.
  26. "First International Conference on Transgender Law and Employment Policy (1992)" panfleto d'una organización (en anglés). ICTLEP/. 1992. Archivato de l'orichinal o 30 de marzo de 2012. Consultato lo 28 de mayo de 2012. "As presonas transcheners incluyen a los transexuals, os transcheneristas e otris travestis d'entramos sexos, transicionando en qualsiquier dirección (d'hombre ta muller u de muller ta hombre), de qualsiquier orientación sexual e de totas as razas, credos, relichions, edatz e graus de discapacidat fisica."
  27. Stryker, Susan. "Transgender History, Homonormativity, and Disciplinarity" (en anglés). Radical History Review, Vol. 2008, nº. 100. (hibierno de 2008), pp. 145–157.
  28. 28,0 28,1 Myers, Alex (14 May 2018). "Trans Terminology Seems Like It's Changing All the Time. And That's a Good Thing" (en anglés). Slate Magazine. Archivato de l'orichinal o 15 mayo de 2018. Consultato lo 15 mayo de 2018.
  29. Glicksman, Eve (abril de 2013). "Transgender terminology: It's complicated". Vol 44, nº 4: Asociación Estatounitense de Psicolochía. p. 39. Archivato de l'orichinal o 25-09-2013. Consultato lo 17-09-2013. "Emplega qualsiquier nombre e pronombre de chenero que prefiera la presona".
  30. ["Meeting the Health Care Needs of Lesbian, Gay, Bisexual, and Transgender (LGBT) People: The End to LGBT Invisibility"] (presentación de PowerPoint en anglés). The Fenway Institute. p. 24. Archivato de l'orichinal o 20-10-2013. Consultato lo 17-09-2013. "Emplega lo pronombre que coincida con a identidat de chenero d'a presona"
  31. Gay and Lesbian Alliance Against Defamation. "GLAAD's Transgender Resource Page" (en anglés). Archivato lo 06-10-2012 en Wayback Machine, "GLAAD", Estatos Unitos d'America. Consultato lo 24-02-2011. "Problematico: "transchenerato". Preferito: transchenero. A l'adchectivo transchenero mai se li deberba adhibir un superfluo sufixo "-ato" apegato a o final. Un sufixo "-ato" apologa innecesariament a parola y en puet prevocar de confusión con o tiempo verbal e d'errors gramaticals. Tamién uniforma lo termin transchenero con os termins lesbiana, gai e bisexual. Tu no dicirbas que Elton John ye "gayato" u Ellen DeGeneres ye "lesbianata," doncas tu no dicirbas que Chaz Bono ye "transgenerato".
  32. Dan Savage, Savage Love: Gayed, Blacked, Transgendered (Creative Loafing en anglés, 11 de chinero de 2014). Archivato lo 25 de chinero de 2016 en Wayback Machine.
  33. Guardian and Observer style guide (en anglés). Archivato lo 09-07-2017 en Wayback Machine: emplegue transchenero [...] nomás que como adchectivo: presona transchenero, presona trans; mai "presona transchenerata" u "un transchenero".
  34. Martin, Katherine. "New words notes June 2015" (en anglés. Oxford English Dictionary. Oxford University Press. Consultato lo 2 d'agosto de 2015.
  35. Magnus Hirschfeld enfalcó lo termin alemá Transsexualismus en 1923, que Cauldwell tradució ta l'anglés.
  36. Transgender Rights (2006, ISBN 0-8166-4312-1) (en anglés), editato por Paisley Currah, Richard M. Juang, Shannon Minter
  37. A. C. Alegria, Transgender identity and health care: Implications for psychosocial and physical evaluation, in the Journal of the American Academy of Nurse Practitioners, volumen 23, tirada 4 (2011), pachinas 175–182 (en anglés): "Transchenero, termin bateauguas ta presonas qui no s'achustan ta las normas en lur identidat e/u conducta (Meyerowitz, 2002). Transexual, subconchunto de transchenerismo; presonas qui en sienten de disonancia entre o sexo en naixer e a identidat (Meyerowitz, 2002)."
  38. Por eixemplo, Virginia Prince emplegaba transgenero ta distinguir a os transformistas d'os transexuals ("glbtq > social sciences >> Prince, Virginia Charles" (en anglés). glbtq.com. Archivato de l'orichinal l'11 de febrero de 2015), escribindo en Men Who Choose to Be Women (en Sexology, en febrero de 1969) que "Yo, a lo menos, sapeba la diferencia entre sexo e chenero e simplament he triato cambear o primero e no pas o zaguero."
  39. "Sex -- Medical Definition" (en anglés). medilexicon.com. Archivato de l'orichinal o 22 de febrero de 2014: define "sexo" como una qualidat biolochica u fisiolochica, mientres o "chenero" ye una "categoría (psicolochica) ta la quala un individuo ye asignato por ells mesmo u por otris...".
  40. UNCW: Developing and Implementing a Scale to Assess Attitudes Regarding Transsexuality (en anglés).
  41. A Swenson, Medical Care of the Transgender Patient (en anglés), en Family Medicine (2014): "Entre que bells transexuals encara prefieren usar iste termin ta describir-se, a-saber-la chent transchenero prefiere o termin transchenero a transexual."
  42. "GLAAD Media Reference Guide" (en anglés). 2011-09-09. Consultato lo 2013-12-27.
  43. Parker, Jerry (o 18 d'octubre de 1979). "Christine Recalls Life as Boy from the Bronx" (en anglés). Newsday/Winnipeg Free Press. Consultato lo 28 de mayo de 2012. "Si tu replecas a os transcheners (a parola que ella prefiere a transexuals) —ella diz— allora tu replecas que o chenero no tien que veyer con os companyers de leito, tien que veyer con a identidat".
  44. "News From California: 'Transgender'" (en anglés). Appeal-Democrat/Associate Press. L'11 de mayo de 1982. pp. A–10. Consultato lo 28 de mayo de 2012. "ella describe a la chent qui han habito ista mena d'operacions transcheners en quis de transexuals". "A sexualidat ye con quí te chitas, pero lo chenero ye quí yes —ella esplanicó".
  45. 45,0 45,1 "Fenway Health Glossary of Gender and Transgender Terms" (PDF en anglés). Chinero de 2010. Consultato lo 27 d'aviento de 2013.
  46. 46,0 46,1 Valentine, David. Imagining Transgender: An Ethnography of a Category (en anglés), Universidat Duke, 2007.
  47. 47,0 47,1 Stryker, Susan. Introduction. In Stryker and S. Whittle (Eds.), The Transgender Studies Reader (en anglés), Nueva York: Routledge, 2006. 1–17.
  48. Kelley Winters, Gender Madness in American Psychiatry (en anglés), ensayos sobre a luita por a dignidat, 2008, p. 198. "Bells individuos transexuals tamién s'identifican con a comunidat transchenero mas ampla; otris no pas."
  49. Boyd, Hellen (2008-07-27). "The Umbrella" (en anglés). enGender. Consultato lo 28 de chunio de 2012. "a unica parti d'o chenero binario que 'necesariament' reutamos ye a noción de que a chent perén se ye asignata a lo costato correcto d'o chenero binario en naixer e que no n'amenista d'empatía u d'aduya si l'asignación estió incorrecta.
  50. Benjamin, H. (1966). The transsexual phenomenon (en anglés). Nueva York: Julian Press, pachina 23.
  51. Ekins, Richard (2005). "Science, politics and clinical intervention: Harry Benjamin, transsexualism and the problem of heteronormativity" (en anglés). Sexualities, en chulio de 2005, vol. 8 nº. 3 306-328 doi: 10.1177/1363460705049578.
  52. Hansbury, Griffin (2008). "The Middle Men: An Introduction to the Transmasculine Identities" (en anglés). Studies in Gender and Sexuality. Volumen 6, tirata 3, 2005 doi:10.1080/15240650609349276.
  53. Amy McCrea, Under the Transgender Umbrella: Improving ENDA's Protections (en anglés), en o Georgetown Journal of Gender and the Law (2013): "Iste articlo va a escomencipiar furnindo un contexto ta las presonas transcheners, acucutando a experiencia d'un subconchunto d'individuos no binarios, de chent bichenero..."
  54. Wilchins, Riki Anne (2002) It's Your Gender, Stupid, pp.23–32 (en anglés), en Joan Nestle, Clare Howell and Riki Wilchins (eds.) Genderqueer: Voices from Beyond the Sexual Binary. Los Angeles:Alyson Publications, 2002.
  55. Nestle, J. (2002) "...reutos plurals ta las construccions e identidatz masculín/feminín, muller/hombre, gai/hetero, butch/femme..." de Genders on My Mind (en anglés), pp.3–10 en Genderqueer: Voices from Beyond the Sexual Binary', editato por Joan Nestle, Clare Howell e Riki Wilchins, publicato en Los Angeles por Alyson Publications, 2002:9. Consultato lo 07-04-2007.
  56. Lindqvist, Anna (18 de febrero de 2020). "What is gender, anyway: a review of the options for operationalising gender" (en anglés). Psychology & Sexuality: 1–13. doi:10.1080/19419899.2020.1729844.
  57. "Androgyne – Define Androgyne at Dictionary.com" (en anglés). Dictionary.com.
  58. "Sexual Orientation and Gender Identity Definitions". Consultato lo 10-07-2020.
  59. "WHAT'S THE DIFFERENCE BETWEEN GENDER IDENTITY AND SEXUAL ORIENTATION?". Consultato lo 10-07-2020.
  60. E. D. Hirsch, Jr., E.D., Kett, J.F., Trefil, J. (2002) "Transvestito: Bella presona qui se viste con ropas normalment levatas por o sexo oposato." en Definition of the word "transvestite" (en anglés). Archivato o 12-10-2007 en a Wayback Machine d'o The New Dictionary of Cultural Literacy, Tercera edición. Consultato lo 13-08-2007.
  61. varios (2006) "trans-ves-ti-to... (plural trans-ves-ti-tos), substantivo. Definición: bella presona qui se viste como lo sexo oposato:" en Definition of the word "transvestite" (en anglés). Archivato lo 09-11-2007-11 en a Wayback Machine dende o Encarta World English Dictionary (edición norteamericana).
  62. Raj, R (2002) "transvestito: n. Sinonimo: transformista:" (en anglés) en Towards a Transpositive Therapeutic Model: Developing Clinical Sensitivity and Cultural Competence in the Effective Support of Transsexual and Transgendered Clients, d'o International Journal of Transgenderism 6,2. Consultato lo 13-08-2007. Archivato lo 27 de setiembre de 2007, en a Wayback Machine.
  63. 63,0 63,1 Hall, B. et al. (2007) "...Muitos dicen que iste termin (transformista) ye preferible a transvestito, que significa lo mesmo..." e "...transvestito —o mesmo que transformista. A mayoría prefieren o termin transformista" en Discussion Paper: Toward a Commission Policy on Gender Identity. Archivato lo 27-09-2007 en a Wayback Machine dende a Comisión d'Ontario sobre os Dreitos Humans. Consultato lo 13-08-2007.
  64. Green, E., Peterson, E.N. (2006) "...O termin preferito ye 'transformista', pero o termin 'transvestito' encara s'emplega en un sentito positivo en Anglaterra..." en LGBTTSQI Terminology (en anglés). Consultato lo 13-08-2007.
  65. Gilbert, Michael A. (2000). "The Transgendered Philosopher" (en anglés). International Journal of Transgenderism. Archivato dende l'orichinal o 26 de chinero de 2016. Consultato lo 16 d'aviento de 2015.
  66. Gilbert, Michael ‘Miqqi Alicia’ (2000) "The Transgendered Philosopher" (en anglés) en a Special Issue on What is Transgender? Archivato l'11 d'octubre de 2007 en a Wayback Machine.
  67. Docter, Richard F.; Prince, Virginia (1997). "Transvestism: A survey of 1032 cross-dressers" (en anglés). Archives of Sexual Behavior. 26 (6): 589–605. doi:10.1023/a:1024572209266. PMID 9415796. S2CID 43816859.
  68. 68,0 68,1 Organización Mundial d'a Salut (1992) "...O transvestismo fetichista se distingue por a suya platera asociación con a excitación sexual e a cerenya falaguera d'espullar-se as ropas una vegada que l'orgasmo ha alcurrito e a excitación sexual baixa...." en ICD-10, Gender Identity Disorder, category F65.1 (en anglés). Archivato lo 22 d'abril de 2009 en a Wayback Machine, publicato por a Organización Mundial d'a Salut.
  69. 69,0 69,1 APA task force (1994) "...O foco parafilico d'o fetichismo transvestista embreca o transformismo. Cheneralment os hombres con fetichismo transvestista alzan una colección de ropa feminina que intermitentment emplegan ta transvertir-sen..." en DSM-IV: Sections 302.3 (en anglés). Consultato lo 13 d'agosto de 2007.
  70. "Understanding Drag" (en anglés). National Center For Transgender Equality. National Center For Transgender Equality. 28 d'abril de 2017. Consultato lo 3 de setiembre de 2020.
  71. "The Many Styles Of Drag Kings, Photographed In And Out Of Drag" (en anglés). HuffPost. 12-11-2019. Consultato lo 03-06 2020.
  72. "How Drag Queens Work" (en anglés). HowStuffWorks. 12-11-2019. Consultato lo 03-06 2020.