Orientación sexual

De Biquipedia
Ir a la navegación Ir a la búsqueda

A orientación, inclinación o delera sexual se refiere ta un patrón d'atracción sexual, erotica, emocional u aimorosa enta una determinata colla de presonas definitas por lur sexo. A orientación sexual e lo suyo estudio pueden trestallar-se en quatre partis prencipals: a heterosexualidat u atracción enta presonas d'o sexo oposato, homosexualidat u atracción enta presonas d'o mesmo sexo; a bisexualidat u atracción enta presonas d'entramos sexos; e l'asexualidat u manca d'atracción sexual.[1] O comportamiento sexual humán, a identidat de chenero e a identidat sexual son termins relacionatos con a orientación sexual, ya que psicolochicament conforman a percepción sexual d'una presona. A preferencia sexual, d'atra man, suchiere bell grau de triga, que determina la vida d'una presona en establir un chenero como obchecto de deseyo, por o que ye incorrecto emplegar o termin ta referir-se ta la orientación sexual d'una presona.[2] A consonancia u disonancia se refiere a la relación u similaridat entre preferencia sexual e a orientación sexual. S'aplica o termin consonancia a una presona que as suyas preferencias sexuals coincide con a suya orientación sexual (por eixemplo: un hombre declarato homosexual que en mantién de relacions sexuals con presonas d'o chenero masculín), entre que a disonancia se refiere ta la diferencia entre a preferencia sexual e a orientación sexual (por eixemplo: una muller declarata heterosexual que en siente d'atracción sexual por presonas d'o chenero femenín, pero que en mantién de relacions sexuals con presonas d'o chenero masculín e que prefiere estar dita heterosexual).[3]

Definición[editar | editar código]

Os estudios scientificos efectuatos en l'arco de decadas han constrimostrato que a orientación sexual ha una gama especifica que puet variar dende a total atracción enta presonas d'o mesmo sexo dica la total atracción enta presonas d'o sexo oposato; manimenos, se gosa emplegar tres categorías ta definir a la orientación sexual: heterosexual, homosexual (lesbiana u gai) e bisexual —respectivament; atracción enta presonas d'o sexo oposato, d'o mesmo sexo e d'entramos sexos.[4][5] En qualques casos, se considera una orientación sexual mesmo l'asexulidat, ye dicir, a escasa u nula atracción enta presonas tant d'o sexo oposato como d'o mesmo sexo u simpla manca d'orientación sexual.

Encara que siga d'uso común discutir sobre a orientación sexual considerando-la como una caracteristica estrictament personal, a la par que o sexo biolochico u a edat, o que no ye de tot correcto: a orientación sexual se define, de feito, a traviés d'as relacions interpersonals e va a ormino a determinar o tipo d'individuos que una presona triga freqüentar e con qui aspera trobar una relación sentimental satisfacient, bellacosa alazetal ta la realización personal de muitos individuos.[4] Ye mesmo distincto d'a simpla actividat sexual, que puet mesmo no esprisar a orientación sexual d'una presona.[5]

Totz os tipos d'orientación sexual son trazas normals con que os sers humans n'entablamos de lazos afectivos;[4] a tamas d'os estereotipos esparditos seguntes que as presonas con orientación sexual no heterosexual estarban trestucatos u anormals, a rechira no ha dixato platero garra tipo de vinclo entre orientación homosexual u bisexual e a psicopatolochía e, por tant, a definición d'a homosexualidat como "trestuque mental" ye estata albandonata ya fa tiempo por as asociacions de clasificación que operan en ista demba.[4]

A "preferencia sexual"[editar | editar código]

A vegadas se ye usata a esprisión "preferencia sexual" como sinonimo d'"orientación sexual"; sindembargo istos dos termins han un significato distincto en a demba psicolochica.[6] O termin "preferencia", de feito, suposa bell grau de libre triga d'a propria orientación sexual, bellacosa que un individuo no necesariament ha e que no n'ha trobato d'alazet en a rechira psicolochica.[6]

O termin "preferencia sexual" ye usata sobre tot por aquells que emparan a fluideza intrinseca d'o deseyo sexual (en o tocant a la verdadera e propria orientación) e que a sexualidat contién qualque elemento de triga, e antimás por qui creyen que no se puet fablar d'una orientación sexual definita dica bella edat, en contraposición a aquells qui piensan que a sexualidat ye determinata por factors cheneticos e/u evolutivos perteneixients, en cada caso a la muito tierna infancia.

Causas e percepción d'a orientación sexual[editar | editar código]

Segunte l'actual conoiximiento scientifico, a orientación sexual se define a ormino durando a primera infancia;[5] no existe, con tot e con ixo, un consenso definitivo entre os scientificos sobre quálas son as razons exactas por que una presona desembolica una orientación sexual heterosexual, bisexual u homosexual.[4][5] Cheneralment, as causas se son rechiratas en una combinación d'influencias cheneticas, hormonals e ambientals, pero no son surtitas prebas definitivas a lo respective;[4][5][7] en o tocant a la opinión espardita seguntes que os abusos sexuals, os succesos traumaticos u una cura u una educación entivocata d'os fillos puedan influir en o desembolique d'a orientación sexual, ista en manca d'evidencia scientifica.[5]

D'atra man, ye amplament compartito entre os estudiosos que a orientación sexual no ye fruito d'una triga,[4][5][7] asinas como no existe garra evidencia de que a orientación pueda modificar-se de traza artificial (a traviés d'as ditas "terapias reparativas"; que, por contra, resultan a ormino negativas ta las presonas qui i son chusmesas).[4]

A percepción d'a propria orientación sexual escomencipia a definir-se, de traza cheneral, entre a meya infancia e a primera adolescencia, pero varía enormement de presona a presona e ye independient de l'actividat sexual verdadera e propria: por eixemplo, un individuo puet identificar-se como heterosexual, bisexual u homosexual mesmo antis d'haber-ne habito de relacions sexuals e viceversa.[4] Antimás se considera que a presencia de prechudicio e discriminación en a sociedat constituyen un entrepuz ta que as presonas con orientación sexual homosexual u bisexual replequen completament lur orientación.[4]

Referencias[editar | editar código]

  1. Sexual orientation, homosexuality and bisexuality (en anglés). Articlo de l'Asociación estatounitense de Psicolochía (en anglés American Psychologycal Association); consultato o 20 de febrero de 2012.
  2. Avoiding Heterosexual Bias in Language (en anglés). Articlo de l'Asociación estatounitense de Psicolochía (en anglés American Psychologycal Association); consultato o 21 de febrero de 2012
  3. Concordance Between Sexual Behavior and Sexual Identity in Street Outreach Samples of Four Racial/Ethnic Groups (en anglés). Articlo de Michael Boss, Y. James Essien, Mark Williams e María Eugenia Esquer Fernández. Articlo en o Journal of the American Sexually Transmitted Diseases Association; consultato o 21 de febrero de 2012.
  4. 4,0 4,1 4,2 4,3 4,4 4,5 4,6 4,7 4,8 4,9 Sexual Orientation & Homosexuality - Answers to Your Questions For a Better Understanding (en anglés), en American Psychological Association. URL consultato l'8 d'abril de 2012.
  5. 5,0 5,1 5,2 5,3 5,4 5,5 5,6 Sexual Orientation and Adolescents (en anglés), en American Academy of Pediatrics. URL consultato l'8 d'abril de 2012.
  6. 6,0 6,1 Avoiding Heterosexual Bias in Language (PDF en anglés), en American Psychological Association. URL consultato l'8 d'abril de 2012.
  7. 7,0 7,1 Submission to the Church of England's Listening Exercise on Human Sexuality (PDF en anglés), en o Royal College of Psychiatrists. URL consultato l'8 d'abril de 2012.