Tengrianismo

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O tengrianismo ye a relichión tradicional d'os pueblos turquicos antes que se convertisen a las relichions d'as sociedaz sedentarias a las que invadiban u con las que s'aliaban, principalment a relichión islamica. O tengrianismo prene o nombre por o dios celeste Tengri.

Os pueblos turquicos, a l'igual que os mongols y tunguses, como ye propio d'os pastors nomadas, centraban a suya relichión en un dios celeste, personificación d'o mesmo cielo. Tengri ye un dios con caracter luminoso, meteorico y sancionador.

Bels autors relacionan o termin Tengri u Tangara con o chino T'ien, literalment "cielo", y igualment se fa servir pa dicir a lo dios que personifica o cielo. A deidat celeste talment fue introducida en China por a clase guerrera, feudal y metalurchica que prenió o poder con a dinastía Chou, desplazando o culto d'a Parella Divina neolitica. Tamién quieren relacionar tengri con o sumerio dingir (nombre chenerico pa os dioses) y con o polinesio Tangaroa.

Este dios supremo habitaba o seteno cielo, y teneba una serie de fillos, (os fillos de Tengri) que rechiban cadagún d'os siet cielos.

O culto a los antipasaus u a los muertos yera muito present y se valoraba a suya asistencia en a caza u en a guerra. Os turquicos atribuiban a la recitación de cualques cantos epicos un poder machico pa evocar a los antipasaus. Talment prenioron d'os pueblos indoeuropeus conceptos arredol d'o caballo, os dioses-chinet, a muerte y exercitos de revenenants.

No manca o caracter totemico de bels animals. Muitas tribus hunnas y turquicos teneban a lo lupo u a bellas razas de cans como animals totemicos. O etnonimo d'os nogais significa en mongol "can". En os yacuz yera important o culto a l'onso, que puet estar un herencio d'os pueblos paleosiberians con os que os turquicos estioron en contacto.