Sekaisa

Sekaisa
Ciudat celtibera
Entidat  • País	Ciudat Celtiberia
Coordenadas	41°18’ 4’’N 1°31’ 2’’U
Habitants	Celtibers
Pueblo	Belos
Provincia	Hispania Tarraconense
Actual	Mara Belmont de Gracián

Chacimiento en activo en Segeda.

Sekaisa (en escritura iberica , en latín Segeda) estió un oppidum prerromán situau en a Comunidat de Calatayut (Zaragoza), concretament en a redolada entre l'actual Mara (ciudat viella) y Belmont de Gracián (ciudat nueva). Yera a ciudat más important d'os belos y cudió moneda arredol d'o sieglo II aC.

Guerras celtibericas

Fació parti d'as guerras celtibericas por o intento d'enamplar as murallas d'a ciudat en o 154 aC, ya que Roma lo utilizó como casus belli pa la conquiesta d'a Celtiberia. S'alioron a una d'as tribus celtiberas más poderosas, os arevacos, quala ciudat más important yera Numancia. As fuerzas combinadas d'os dos pueblos aturoron primero l'ataque d'o cónsul román, Quinto Fulvio Nobilior, contra Sekaisa y dimpués lo refusoron en Numancia.

En l'anyo 153 aC, s'enfrontinoron a o exercito román dirichiu por Quinto Fulvio Nobilior, composau por 30.000 hombres, y as tropas celtibericas de segedenses y numantinos a o mando de Caro de Segeda. O resultau d'ista primera batalla estió a favor d'os celtibers, morindo 6.000 romans.

Cambeo d'o calandario román

Dimpués d'a redota d'o cónsul Nobilior, o Senau decretó a modificación d'o prencipio d'o curso politico román, que dica alavez prencipiaba en as idus de marzo -15 de marzo-, adebantando a elección d'os cónsuls a las kalendae de chinero -1 de chinero-. A calendata d'a elección d'os cónsuls varió en diferents momentos d'a Republica romana estando en abril, mayo, pero más que más en marzo, coincidindo con l'arribada d'o buen tiempo. A partir de l'anyo 153 aC ista elección s'alinió en l'1 de chinero con o prencipio de l'anyo civil, lo que se mantenió dica a fin de l'uso d'ista institución politica.

Manimenos, se considera que l'anyo civil román ya prencipiaba l'1 de chinero dende, seguntes a tradición, zaguerías d'o sieglo VIII aC, quan o rei Numa Pompilio lo heba estableixiu.

Cudición monetaria

Moneda de Sekaisa d'os sieglos II a o I aC

Sekaisa fació as suyas primeras cudicions entre os anyos 170 y 154 aC, ases, unidatz de bronze y divisors. Cudindo tamién denarios d'archent pa bosar os tributos de Roma.

Cudió moneda d'archent y bronze mientres o sieglo II y dimpués primerías d'o sieglo I aC, emplegando en a suya leyenda o suyo nombre en celtiberico, Sekaisa. Pero por as pocas emisions d'archent, s'entiende que l'archent no se i cudió guaire u que dimpués se fundió.

As suyas cudicions se repartioron entre seis emisions diferents. O bronze se cudió en todas ellas, l'archent nomás en a segunda y a tercera emisión.

En a primera y segunda emisión (Segeda I) emplegoron os disenyos d'una cabeza de lupo en l'anverso y un chinete y un au en o reverso.

Posteriorment, en l'anverso, pa todas as valors se fació servir o disenyo d'un busto varonil, con u sin barba, con a posibilidat d'estar acompanyau d'un simbolo. En o reverso s'emplegó o disenyo d'un chinete con diferents atributos, siga una lanza, un au u una palma en as valors más altas; un caballo pa la metat y o sexto; y meyo pegaso y chabalín pa os tercios.

A emisión tercera y sexta estioron as más amplas y as que se dispersoron, arribando enta as zonas meneras d'Ulterior y a Beturia, relacionau posiblement con o movimiento de chent norte-sud d'o sieglo II aC u de l'actividat militar.

O maximo en a cudición se produció en a metat d'o sieglo II aC, cudindo a segunda y tercera emisión, coincidindo con una crisi en Celtiberia, o taller podría haber cudiu moneda pa bosar os tributos desichius por Roma a partir d'os pactos que teneban como en atros casos, como narra Apiano en o suyo libro Iber 45, 48 y 50, pa o pago d'os en auxilia belos baixo Vetilio, en o 146 aC en os momentos de plena guerra numantina.

As atras emisions podrían estar pa uso local. A sexta emisión estió a más larga en o tiempo, 20–30 anyos, talment pa resolver a manca de numerarios. A cudición en o segundo puesto (Durón de Belmonte de Gracián) con o mesmo nombre, mos indica una pervivencia politica y d'habitants de l'anterior.

Bibliografía

• Historia de España, dirigida por M. Pidal, Ed. Espasa Calpe, Madrid, 1960-1982, Tomo I, vol II y III. Tomo II, vol. I y II
• Protohistoria de la Península Ibérica, Barcelona, 2001.
• Burillo Mozota, F, Los Celtíberos (Etnias y estados), Barcelona. Crítica.. ISBN 9788484329497.
• Burillo y Mozota, F, Segeda su contexto histórico: Entre Catón y Nobilior (195 al 153 a.C.) : homenaje a Antonio Beltrán Martínez, Centro de Estudios Celtibéricos de Segeda. ISBN 978-84-611-4203-3.
• Burillo y Mozota, F, Segeda (Mara-Belmonte de Gracián) La ciudad celtibérica que cambió la historia, Seminario de Arqueología y Etnología Turolense.
• Gomis Justo, M, Las acuñaciones del taller monetal de Sekaiza, Universidad de Valencia, Departamento de Prehistoria y Arqueología.
• Marqués, N F (2018). Un anyo en la antigua Roma: la vida cotidiana de los romanos a través de su calendario. Espasa.
• Vives Escudero, A, La moneda hispánica, Juan R. Cayón Editor Numismático.

Vinclos externos

• Se veigan as imachens de Commons sobre chacimiento arqueolochico de Segeda.
• (es) geografia-de-ptolomeo
• (es) Atlas del Imperio romano
• (es) Un santuario celtíbero en la comarca de Calatayud Noticia publicada en o diario Heraldo de Aragón
• (es) Sitio web del yacimiento de Segeda
• (es) Fundación Segeda
• (es) Segeda, la ciudad celtíbera que cambió el calendario.
• (es) "El santuario de Segeda: una construcción única", articlo publicau en "Heraldo de Aragón", 11 de noviembre de 2009
• (es) "Las distintas orientaciones astronómicas del Santuario de Segeda lo convierten en un hallazgo único".