Rei Arturo

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O Rei Arturo en a suya armadura de guerra, estatua en bronce d'o sieglo XV que se troba en a tumba de l'emperador Maximilián I —muerto en 1519— en Innsbruck.

O Rei Arturo u Rei Artús como lo claman as fuents medievals aragonesas, ye un personache literario que ocupa un papel central en o ciclo epico medieval dito "Materia de Bretanya". A cuestión sobre a suya existencia real ye polemica, y en a suya formación han intervenito feitos historicos reals y elementos mitolochicos celtas y cristianos medievals.

Proceso de formación d'o personache literario

As primeras mencions se troban en libros medievals con pretensions historiograficas. A primera mención d'Arturo se troba en o Gododin d'o bardo Aneurin. O manuscrito ye d'o sieglo XIII, pero o poema ye muito mes antigo. A segunda mención se troba en a Historia Brittorum que s'atribuye por error a Nennius pero que ye un amalgama complexa de bels compiladors. Arturo ye calificau de dux bellorum u chefe militar, que combate contra los saxons y los vence en 12 batallas, vencendo-los de pa cutio en a batalla de Mont Badon. Manimenos en o libro De Excidio Britanniae atribuyen esta victoria a Aurelius Ambrosius. En a compilación atribuida a Nennius por error retratan a Arturo como un cazataire mitico que con su can Cavall encorre a lo chabalín monstruoso porcum troit, continando con elementos propios d'a mitolochía celta. O relato galés Kulhwch y Olwen ya presenta a lo rei Arturo con unas caracteristicas propias d'a mitolochía celta, galesa concretament, y encara no presentaba o caracter caballeresco. Arturo encara no ye un rei cortés, ye un conducidor batallero rodeyau de magos y de guerrers que no son precisament caballers y que en realidat son personaches mitolochicos celtas detectables en atras historias, anteriors y posteriors. Seguntes bellas teorías ye un conchunto de tradicions asociadas a uno u mesmo a cuantos chefes militars d'o sieglo V, cuan os britans luitaban contra os saxons (y anglos y chutos) que heban invadiu a provincia romana de Britania y os romanos la albandonoron.

Os mitos arturicos prenen a forma actual en a man de Godofré de Montmouth, creyando una historia coderent chuntando personaches que no teneban relación con l'Arturo orichinal (como Merlín, que yera anterior), y copiando modelos clasicos (como a concepción d'Hercules por Zeus). En a versión d'Arturo de Godofré de Montmouth encara no saliba a mesa redonda. En ista concepción, que ye a que s'ha feito servir como base d'a visión moderna d'o rei Arturo, amaneixen a resta d'elementos lechendarios, chunto con una patena cristiana que recubre tot o conchunto, adhibindo-se asinas elementos cristianos como a busca d'o Santo Gredal.

A conoixencia d'os mitos arturicos s'ixemenó por toz os países antigament britonicos y tamién en l'ambito francés. Bels escritors franceses escribioron relatos arturicos, feito que empentaban por Alionor d'Aquitania y Henrique II d'Anglaterra, os cuals pretendeban fer servir o títol pa lechitimar a suya dinastía en Francia y Anglaterra como heredera d'o rei Arturo contra las aspiracions d'os Capetos.

O rei Arturo en fuents aragonesas y navarras

Ye mencionau en o Libro de las Cheneracions en o capítol De Constantín y en un capítol propio "del Rey Artús":

Este rey ovo un fijo en esta dueynna qui fo muy bono, et ovo nombre Artus, et ovo otra fija, qui ouo nombre Elena, et casola con el rey Loth de Leonés, et ovieron un fijo qui ouo nombre Galván,...

Murió Uterpradagón et regnó su fijo Artus. Este rey fo muy buen rey et leal...

(Del Rey Artús): Este rey Artus ovo un dia cort en Courlione, so ciudat. Et esta cort fo muy grande et muy alta et bona...

El rey Artús, quoando lo odió, aplegó so huest et fo a lidiar con el emperador: et quando fo al Mont de Sant Miguel, convatiose con un gigant et vençió al rey, et matolo et fo a la batalla al emperador. Quoando vio el emperador que Artús venía sobre él,...

Et el rey Artús tovo el campo, et fo mal ferido de tres lançadas, et fezose levar ad Islavalón por sanar.

Aprés la muert del rey Artús, ovo tres reyes en el reysmo de Bretaynna: la una partida de la terra ovo Loth de Leonés, el padre de Galván; et la otra partida ovo el Constantín, el fillo de Cador, del duc de Cornuailla.

Tamién en o capitol 34 d'o Libro del Trasoro "de la ljnea de los reyes de Roma e de Anglaterra".

Apres su muert, Brutun su hermano passo en vna tierra que, por el nonbre del fue clamada Bretanya, que agora se clama Anglaterra, e el fue començamjento de los reyes de Gran Bretanya. E de su generacion nascio depues el buen rey Artus, de quj los romanos faulan tanto, que fue rey coronado a .ccc. e l.xxxiij. anyos apres la jncarnacion de Ihesu Xpisto; e esto fue en tiempo que Zeno fue emperador en Roma e regno .l. anyos.

O rei Arturo en a mitolochía pirinenca

En a versant gascona d'os Monts Pireneus bi ha una conoixencia tradicional d'un personache dito Artús, pero sin relación con as historias d'a "Materia de Bretanya", y representando o mito d'o "cazataire maldito".

En Bigorra traviesa o cielo gramando en as nueiz de tronada como castigo por no haber-se persignau en l' angelus o 15 d'agosto.

Lo Rei Artus d'o Coserán y d'o País d'Olmes (Arièja) se'n fue d'a misa d'o gallo pa cazar una llebre que ye condenau a no ensobinar-la nunca.

En Biarn li dicen Rei Artus y sobrevuela as vals d'Aspa y d'Osal os dias de ventolera d'a santmigalada con mil cans.

Bibliografía

Olivier de Marliave: Pequeño diccionario de Mitología Vasca y Pirenaica. Alejandría, 1995.
Jean Markale: Pequeño diccionario de Mitología Céltica. Alejandría, 1995 y 2000.

Enlaces externos

Se veigan as imáchens de Commons sobre o Rei Arturo.

Datos: Q45792
Multimedia: King Arthur / Q45792