Pubescencia

As flors d'a nispolera creixen cubiertas de pubescencia, en o sentiu botanico d'a palabra.

A pubescencia (d'alcuerdo con a fonetica de l'aragonés pronunciau /pubeˈθenθja/ (AFI), como si s'escribise "pubecencia") ye a qualidat d'as superficies pubescents (/pube'θens/). Ixo ye, que son cubiertas de pelo fino, curto y suau.

A palabra dimana d'o latín <PUBESCENTIA por via culta. En latín, pubescens, -scentis, ye a palabra con a que se describe un adolescent en a edat quan principia a amaneixer-le o pelo en a barba y o bigote, y equivaleba a la nuestra palabra «adolescent». Por ixa razón, en as luengas romances a palabra «pubescencia» se gosa emplegar como sinonimo literario d'«adolescencia».

En Botanica, una superficie (fuella, peciolo, fruito, etc.) diz que ye pubescent quan se troba cubierta de pelo curto y fino. Ye un termino scientifico común en as descripcions de plantas.

Ortografía

D'alcuerdo con a Propuesta ortografica de l'Academia de l'Aragonés de 2010, que s'emplega como grafía de referencia en Biquipedia, os grupos consonanticos cultos -SC- s'han d'escribir, en coherencia con a etimolochía d'os cultismos que en lievan (anque en aragonés oral no se dan).