Portero (fútbol)

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Ista pachina ye sobre os porters de fútbol. Ta porters d'atros esportes se veiga portero (esporte).

Un portero s'estira t'aturar un tiro a portería.

Destin Onka, portero d'a selección d'o Congo, atura un chut d'o debantero australiano Rubin Okotie en o Campionato d'o Mundo de Fútbol sub-20 en 2007.

Un portero, arquero, guardameta u cancerbero, ye o futbolista u chugador de fútbol que esfensa la portería d'o suyo equipo y tien privilechios especials adintro d'o chuego.

En ista posición se requiere de buenas reaccions asinas como rapedas decisions en l'inte t'aturar la pilota. Ye menester, ta un equipo competitivo, tener un portero efectivo en qui se pueda confiar, que lis transmita seguridat a los esfensors, ta que istos puedan obrar tranquilament y efectiva.

Os porters han de vestir un uniforme diferent a la resta d'os chugadors de campo, que consta de: pantalons y camiseta, os qualos poseyen un sistema de coixinetz en os codos y atras partis d'o cuerpo. Amás levan esguantes especials, os qualos s'emplegan como un accesorio de protección. Manimenos, istos tamién tienen una capa de látex situata en a palma, con a finalidat d'esmorteixer y de dar millor adherencia ta poder conseguir una millor aturata u parata.

Estar portero ye difícil dende un punto d'anvista psicolochico, ya que os porters han de saber imposar a suya voz en o terreno de chuego. Si no a comunicación con os esfensors sería nula, y istos no dudarban en recriminar o gol a lo portero que muitas vegatas no puet fer cosa debant d'un buen ataque rival.

O más notable ye que os porters son os solos chugadors que pueden tocar a pilota con as suyas mans u brazos mientres o chuego, encara que nomás adintro de l'aria de penalti. Manimenos, no pueden fer-lo si a pilota ha estato recullita d'un saque lateral u d'un pase d'un companyero con o piet u con a garra, y no puet tener a pilota en as suyas mans mientres más de seis segundos. En o caso de que o portero pille a pilota con as mans d'un pase d'un compayero, se sinyalará un tiro libre indirecto en o mesmo puesto a on que s'haiga preso la pilota.