Poblau iberico d'el Palomar

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O poblau iberico d'el Palomar ye un chacimiento arqueolochico situau chunto a la localidat d'Oliet (Andorra-Sierra d'Arcos), en o Parque Cultural d'el Río Martín que contiene as restas d'un chicot poblau iberico fortificau. Ye considerau como un d'os chacimientos ibers mas importantes d'a provincia de Teruel, encara que nomás s'ha escavau un tercio d'a suya superficie total.^[1]

S'organizaba arredol d'una carrera central y a os cantos yeran as casas. O poblau yera rodiau por una muralla d'a que se conservan encara restas d'os torretons, observando-se l'adopción de sistemas y tecnicas esfensivas helenisticas por parti d'os ibers. As casas yeran construyidas son con calsinera, adoba en a parti superior y cubiertas por fusta y canyas. Teneban dos plantas, estando a inferior emplegada como almadazén u bodega y a superior como vivienda, habendo-se conservau escalas de piedra.

Una d'as arias escavadas corresponde a una necropoli visigoda composada de dica nueu fuesas construyidas con losetas de piedra, estando una d'ellas doble, con un adulto y un nino de 1 u 2 anyos dencima d'o suyo peito. D'entre os 10 individuos apedecaus aquí dos son ninos y cuatre adultos (dos mullers y dos hombres). No se i han trobau por un regular aixovars, fueras de bella fibiella u aniello de bronce. Tamién bi heba restas d'un atabul de fusta en una d'as fuesas.

En as escavacions s'han trobau importants restas de ceramica con decoración ibera y atra que imita a la romana. Muita d'ista decoración se basa en diferents motivos cheometricos como bandas, semicerclos y cerclos concentricos, aixedrezaus, reticulas, estilizacions vechetals y motivos feguraus. Tamién s'han puesto recullir monedas y obchectos de fierro como claus, estrals, trucos u de bronce como fibulas, aros, argüellas u placas de centurón. Bi heba tamién obchectos de piedra como molins, almiretz y losetas de piedra con decoración grabada.

Historia

O poblau se construye en o sieglo III aC y ye destruyiu y albandonau mientres as Guerras Sertorianas en l'anyo 74 aC. Tornaría a emplegar-se dimpués como necropoli visigoda en o sieglo VI.

As primeras escavacions fuoron dirichidas por o profesor Galiay, publicando Antonio Beltrán os resultaus d'os primers estudios en l'anyo 1958. Dica l'actualidat s'ha escavau una parti d'o poblau perteneixient a una mazana de casas en as que amás s'han trobau sepolturas d'animals y ninos, belunas con ixovar incluyiu. Es as casas se veyen cualques cambras interiors y mesmo escalas que daban acceso a os pisos superiors. O Museu de Teruel fació escavacions periodicas entre os anyos 1977 y 1982 baixo a dirección de J. Vicente centradas en o estudio d'as viviendas y a urbanistica d'o poblau.

D'atra man en os anyos 1997, 2002 y 2005 o Gubierno d'Aragón financió cuantas intervencions con l'obchectivo de consolidar, esviellar y mantener as restas constructivas escavadas.

En l'anyo 1981 o chacimiento d'el Palomar fue declarau Molimento Historico-Artistico por Reyal Decreto y en 2002 se modificó a suya categoría de protección pasando a considerar-se Conchunto d'Interés Cultural, zona arqueolochica, d'alcuerdo con a Lei d'o Patrimonio Cultural Aragonés.