Perifrasi verbal

De Biquipedia
Ir ta: navego, busca

Las perifrasis verbals son estructuras formatas por un verbo auxiliar (conchugato), una particla d'enlace (que puet mancar) y un verbo en forma verbal impresonal (infinitivo, cherundio u participio de pasato).

Lo conchunto tien un significato unitario que ye diferent que la suma de cadagún de los components y s'ha d'analizar como un tot. N'este sentito, los components d'una perifrasi verbal actuan chuntos. Las perifrasis verbals permiten matizar l'acción no només que con los tiempos (present, pasato y futuro) y de los modos (indicativo, subchuntivo), que s'expresan con la conchugación, ye dicir con los morfemas que se meten a lo final de la radiz verbal. Se considera que las perifrasis verbals matizan l'aspecto verbal (perifrasis aspectuals) o lo modo (perifrasis modals).

Lo verbo auxiliar gosa estar un verbo lichero, como los copulativos (estar-ser u ser puro), lo verbo comodín u proverbo (fer), los verbos basicos de movimientos (ir, venir) y belatro que, por lo suyo significato, aduyen a matizar l'acción (arribar/plegar, acabar/rematar, continar, encomenzar, tornar, deber, gosar, poder, ezetra). Por un regular se considera que los verbos auxiliars pierden lur significato (desemantización u gramaticalización), encara que a vegatas només bi ha una chicota perduga de significato.

En la evolución dende lo latín ta las luengas romances bells tiempos verbals romances apareixioron a partir de perifrasis verbals. Ye o caso de lo futuro d'indicativo (VERBO + Present d'HABERE) y lo condicional (VERBO + Pasato imperfecto d'HABERE).

En aragonés oriental s'emplega una perifrasi pa indicar lo pasato perfecto simple (Present d' ir + INFINITIVO). Y se considera que ye d'orichen catalán, car en catalán medieval no s'escribiba y no gosa amaneixer en textos anteriors a lo sieglo XVIII.

Se veiga tamién[editar | editar código]