Parizón

De Biquipedia
Ir a la navegación Ir a la búsqueda
Ovella con dos caloyos de a misma parizón.

A parizón (d'o latín <PARITIONE) ye a temporada de partos en o ganau domestico, y por extensión en qualsiquier remugant de rabanyo. En o hemisferio norte se produz tipicament en primavera, anque en os rabanyos d'animals domesticos siempre bi ha exemplars isolaus que paren en qualsiquier epoca de l'anyo.

En as especies d'herbivoros socials, o ciclo reproductivo se troba asociau con a disponibilidat d'alimento y adaptativament s'ha visto favoreixiu cap a producir-se os partos en coincidindo con a época de mayor abundancia.[1] En o hemisferio norte y en latitutz subtropicals y temperadas, como as d'Europa, a parizón gosa coincidir con os meses d'abril y mayo (primavera), de forma que o zelo se produz sincronicament antes, en función de a durada de chestación de cada especie[1] (5 meses en as ovellas y en as crabas, 7 meses en as vacas).

Importancia[editar | editar código]

Dende o punto d'envista de a ganadería a parizón ye una epoca d'especial treballo ta os pastors porque requiere muita cuenta con l'actividat d'os partos, pus no ye raro que a las mais les vienga la cría travesera y pasen contumancias que precisen a intervención de l'hombre ta desarrollar-se correctament. Tamién requiere especial atención separar correctament as mais de sus caloyos en os primers dias, pus ye fácil que no puedan seguir o paso d'aquellas y calga zarrar os corderetz en as horas diurnas mientres se suelta las fembras ta pasturar, habendo-se de parar muita cuenta que se reunen dimpuesas y que as crías no entivocan a mai, o que podría tener conseqüencias fatals ta la supervivencia d'a cría (as fembras lactants s'aborrecen d'as crías d'as atras y no as deixarían tetar, o que conduciría a la muerte por inanición d'o caloyo).

En os rabanyos ovins transuants de l'Alto Aragón, a parizón se soleba producir a prencipios d'abril, o que pillaba en Tierra Plana, bellas tres semanas u un mes antes d'escomenzar a cabanyera de tornada t'a montanya. Isto yera cabal porque significaba que as ovellas teneban chusto a millors tascas ta fartar-se y producir a cantidat de leit que permitiba a os corders estar en as condicions optimas ta comenzar o viache. As ovellas que libraban a rezago (tardanas), dimpués que as de demás, soleban fer-se pasturar en os millors puestos en es dias anteriors a la partida con a intención que os corderetz recuperasen.[2]

Lexico[editar | editar código]

Como totz os episodios relacionaus con a ganadería, a parizón tien un extenso lexico relacionau en aragonés.

  • Parizoner u parizonero, o pastor que s'encarga especialment d'as ovellas plegadas de librar y d'os caloyos.
  • Crabitero u manta crabitera, una manta especial que lievaban as companyías que serviba ta transportar a codetas de bell pastor u en o somero cabanyero os calois naixius en a cabanyera y que encara no podeban seguir a su mai.
  • Paridera, a quadra u estallo a on se zarraba os corders mientres sus mais pasturaban.
  • Facera, a partida mas verde a on se feba pasturar as ovellas paridas mas tardanas.[2]
  • Acampaderas, as uellas que heban librau en rematar una chornada.[2] Se deciban asinas porque yeran prioritarias en fer-las «acampar» en l'arredol de a paridera. P. ex. Se diz: «Ista ovella está acampadera», querendo dicir que ye plegada de parir.
  • Mai temprana, a fembra que pariba antes que a media en o rabanyo.
  • Mai mediana, a fembra que pariba a la vegada que a mayoría en o rabanyo.
  • Mai tardana, a que pariba dimpués.

Referencias[editar | editar código]

  1. 1,0 1,1 (es) PORRAS, Antonio, VALENCIA, Javier y ZARCO, Luis Alberto (2003); Estacionalidad reproductiva en ovejas
  2. 2,0 2,1 2,2 (es) SATUÉ BUISÁN, José (2007); Memoria de un montañés. Xordica Editorial. Zaragoza. ISBN 978-84-96457-25-6

Vinclos externos[editar | editar código]