Cabanyera

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Cabanyeras prencipals en l'estato espanyol.

As cabanyeras son camins de transhumancia que unen os puestos tradicionals de pastoreyo pa que os pastors y ganaders puedan levar o bestiar caprino, ovino y bovín enta os millors feners aprofitando a moranza d'o clima: enta os puertos u estivas en estiu u enta redoladas mas baixas y de clima mas templau en hibierno.

As cabanyeras suposan bellas 125.000 km de rotas pa la transhumancia en Espanya, o 1% d'o suyo territorio, unas 450.000 hectarias. Churidicament, en Espanya, as cabanyeras son cabal de dominio publico que a suya titularidat exercen as Comunidaz Autonomas estando ista protección churidica a que las fa unicas en Europa.

A nomenclatura oficial en Aragón ye d'orichen castellano y fue imposata en o sieglo XVIII dimpués d'a Guerra de Succesión Espanyola y aplicación d'os Decretos de Nueva Planta: cañadas, cordeles, veredas y coladas. En ixa terminolochía oficial d'orichen castellano, seguntes o Codigo civil y a Lei 3/1995, una cañada ye de 90 varas castellanas d'amplura (uns 75 m), os cordeles d'uns 38 m, as veredas d'uns 20 m d'amplura, y una colada ye cualsiquier vía con menor amplura.

Manimenos a suya protección legal, as cabanyeras sufren a ocupación ilegal u modificacions no permitidas. Un eixemplo ye a cabanyera que transcorre amán de Madrit conoixida como que "Cañada Real" que ista ocupada en bels 15 km por asentamientos de chabolas.