Panturquismo

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Países u territorios a on que se parlan luengas turquicas y son oficials

O panturquismo consiste en a reivindicación d'un estato turco estendillato entre la Mar Negra y los desiertos de China.

En 1915, mientres a Primera Guerra Mundial, Tekin Alp dició:

Os braus exercitos alemán, austriaco y turco esclafarán o despotismo ruso y darán a independencia a 30 u 40 millons de turmenios, que con 10 millons de turcos otomans, formarán una nación de 50 millons d'hombres que marcharán enta una gran civilización, en ciertos aspectos superior a la civilización dechenerata de Francia y d'o Reino Uniu.

Curiosament o panturquismo no naixió en Turquía pa estar exportato a las minorías turquicas de l'Imperio Ruso, naixió en l'Imperio Ruso como consecuencia d'o contacto d'as minorías turquicas con as ideyas progresistas rusas y dogmas d'o mesianismo paneslau.

Qui dió o prencipal empentón a lo panturquismo estió o tartaro de Crimea Ismail Bey Gaspirali que fundó un influyent diario con o que captó a muitos adeptos y que amés estendilló a suya doctrina dica l'Imperio Otomán, alavez en una decadencia asaber-lo de gran. Ismail Bey Gaspirali pretendeba a creyación d'una luenga literaria turquica unica. Os suyos succesors posoron enfasi en reformar a sociedat musulmana tradicional y occidentalizar-sen. Os panturquistas de l'Imperio Ruso veyeban a l'Imperio Otomán o suyo salvador potencial, encara que estase en un proceso de decadencia mayor que l'Imperio Ruso.

A lo primero o panturquismo tenió poco eco en l'Imperio Otomán, pero a mesura que s'iba perdendo a hechemonía otomana en os Balcans, incapaz de luitar contra os nacionalismos d'as minorías cristianas, fue inspirando a os turcos anatolicos y rumelís, cherminando en o movimiento d'os Chóvens Turcos, movimiento tacato con a sangre de mes de dos millons de victimas de diferents grupos etnicos cristianos (armenios, asirianos, sirians, griegos), y dica musulmans (kurdos disidents), que viviban en l'antigo territorio otomán. Pretendeban turquizar o estato que controlaban y anexionar-sen os territorios turcoparlants de l'antigo Imperio Ruso pa compensar as perdugas de territorios arabes y balcanicos.

Atro panturquista famoso estió o poeta Ziya Goekalp, prexinador de Turán, a idilica patria turquica, (Turán ye como os persas preislamicos diciban a Asia Central).

• Datos: Q83280
• Multimedia: Pan-Turkism / Q83280