Max Fürbringer

De Biquipedia
Ir a la navegación Ir a la búsqueda
Max Fürbringer
Max Fürbringer
Max Fürbringer
Información personal
Calendata de naixencia 30 de chinero de 1846
Puesto de naixencia Wittemberg, Flagge Königreich Sachsen (1815-1918).svg Reino de Saxonia
Calendata de muerte 6 de marzo de 1920
Edat 74 anyos
Puesto de muerte Heidelberg, Flag of Germany (3-2 aspect ratio).svg Republica de Weimar
Ocupación Anatomista y ornitologo

Max Carl Anton Fürbringer (Wittemberg, Saxonia, 30 de chinero de 1846 - Heidelberg, Baden, 6 de marzo de 1920), conoixiu como Max Fürbringer, estió un anatomista y ornitologo alemán.

Biografía[editar | editar código]

Naixiu lo 30 de chinero de 1846 en Wittemberg, en l'alavetz Reino de Saxonia, primer fillo d'o chuez y director de districto chudicial Karl Fürbringer y su muller Hermine Fürbringer (de soltera Gumprecht). Fue chirmano d'o medico Paul Fürbringer (1849 - 1930).

Principió a carrera universitaria de sciencias naturals en Jena, que dimpués continaría en Berlín, doctorando-se en 1869. Entre una estancia como asistent con Carl Gegenbaur en a Universidat de Jena fue animau a encetar a carrera de Medicina, que escomenzaría en 1873 y le lievaría ta Heidelberg. En 1877 se licenció con especialidat en anatomía y fue calificau con mención extraordinaria en 1879.

Tamién obtenió una plaza como profesor numerario en a Universidat d'Amsterdam en 1879, obtenendo dimpués puesto de profesor d'anatomía en a Universidat de Jena en 1888, y en 1901 fue nombrau director d'o Instituto d'Anatomía d'a Universidat de Heidelberg.[1] Se chubiló en 1912 y morió lo 6 de marzo de 1920 en ixa mesma ciudat.

Estió miembro de l'Academia Alemana d'Estudios Naturals Leopoldina[2] dende 1881, y fue esleyiu miembro de l'Academia Prusiana de Sciencias Naturals en 1901. Dende 1903 tamién miembro de a homologa Academia Baverana, y dende 1909 miembro ordinario de l'Academia de Sciencias de Heidelberg.

Aportación[editar | editar código]

Baixo a influencia de Carl Gegenbaur, Fürbringer treballó en estudios sobre a ontochenia (desenvolique d'os rinyons). Mientres escometeba la suya fayena, se dotó de conoiximientos basicos de todas as disciplinas que dimpués le servirían pa fer a revisión necesaria d'as investigacions en a clasificación d'as aus que dica par d'alavetz s'heba feito. Fürbringuer fue un anatomista comparativo as aportacions d'o qual afinoron sobremanera o treballo meticuloso y a riqueza de tecnicas en investigación.

Denguno antes que ell, y cal dicir tamién que denguno dimpués que ell, heba replegau a la vegada tantas caracteristicas útils pa la clasificación scientifica, y denguno tampoco heba meso en valor istas en filochenia como ell, que encara hoi se le reconoix por interconectar os conceptos de forma y función. As falsas semellanzas que a traviés d'influencias identicas resultan en caracteristicas coincidents, ell as discriminó a conciencia y as plasmó de forma sistematica. Fürbringer intuyó y confió en o fenomeno que hoi se conoix como creiximiento alometrico.

Investigacions sobre a Morfolochía y Sistematica d'as Aus[editar | editar código]

«Esbozo d'un árbol chenealochico d'as aus», de «Investigacions sobre a Morfolochía y Sistematica d'as Aus» (1888).

A suya obra culmen estió „Untersuchungen zur Morphologie und Systematik der Vögel“ («Investigacions sobre a Morfolochía y Sistematica d'as Aus» en aragonés), que se basa en estudios comparativos fundamentals sobre o tórax, huembros y a rechión d'as alas de toda a clase Aves, y contina con consideracions sobre temas que van dende feitos paleontolochicos y biocheograficos dica nuevos planteyamientos sobre evolución, que en l'actualidat encara se considera caracteristicas fundamentals y validas sobre a sistematica d'as aus.

Entre atras cosas, se debe a Fürbringer a constatación de que as "aus de peito plano" (Ratites; p. ex. o estrucio) s'heban transformau secundariament en un grupo heterochenio d'aus no voladeras (y no pas que en estasen ya en primeras).

O suyo sistema ye, a traviés d'a implementación de quatro categorías taxonomicas principals (orden, suborden, gens y familia), más finament estructurau que os d'es suyos antecesors, mientres que a categoría gens se corresponde con a orden d'atros autors. De caracters teoricament augmentaus amaneix l'agrupación d'as gentes en 24 subordens y 7 ordens. Por demás, d'os numerosos treballos de Fürbringer en bebe a suya monografía tardana sobre os niervos espino-occipitals. Fürbringer encara ye considerau como o principal estandarte d'a escuela de Gegenbaur, a qui adedicó una extensa biografía en 1903.

Fürbringer instruyó a atros miembros d'o Instituto de Heidelberg en a millora d'a metodolochía de docencia a traviés d'obchectos disponibles, preparacions y modelos plasmaus en fichas chiquetas. As fichas teneban o formato 18 x 24 centimetros. Os colaboradors emplegan a redacción d'istas fichas de chicot formato, bien con tinta, bien con colors d'aquarela u lapiceros de color. Bellas vegadas tamién s'emplegan reproduccions fotograficas d'os obchectos que i hai en as ditas fichas.[3]

Referencias[editar | editar código]

  1. (en) L. K. Nyhart: The Importance of the "Gegenbaur school" for German morphology. In: Theory of Biosciences. Tomo 122, 2003. P. 162-173. doi: 10.1007/s12064-003-0051-x.
  2. (en) Ficha de miembro de Max Fürbringer, en a Deutschen Akademie der Naturforscher Leopoldina, consultada o 30 de noviembre de 2017 (por l'autor orichinal d'iste articlo, en Wikipedia en alemán).
  3. (de) Sara Doll: Max Fürbringer - Fichas formativas de chicot formato, en: Sara Doll, Joachim Kirsch y Wolfgang U. Eckhart: Wenn der Tod dem Leben dient - Der Mensch als Lehrmittel, Springer Deutschland 2017, pp. 49-51. doi: 10.1007/978-3-662-52674-3.

Vinclos externos[editar | editar código]