Lavau d'a lana

De Biquipedia
A lana sale puerca cuan se plega d'esquirar.

O lavau d'a lana ye o proceso con que se saca la porquería d'os vellons dimpués d'esquiradas as uellas, como as sirrias, cascarrias, cachorros y zaforas diversas que son en o pelo d'os animals, mirando de tornar-le l'aparienza mas limpia y clara que se pueda, antes de poder treballar con ella.

Anque agora ye un proceso mecanizau, antes mas lo feban por regla cheneral as mullers, resultando un d'os treballos mas duros de tot lo relacionau con a lana. O proceso de lavau d'a lana teneba diferents fases, y todas se feban sin emplear garra quimico como sabons u leixivas.

Proceso[editar | modificar o codigo]

Mullers caixcais aclareixendo a lana en un río.

Pa comenzar, a lana se feba banyar en un caldero u palangana gran de metal con augua calenta pero que no bullise, que enantes s'heba preparau en o fuego. A manera de fer-lo yera en primeras verter l'augua calient en o caldero, y dimpuesas meter a lana en ixa augua, y no pas a la contra pos con a fuerza d'o chorro y a temperatura de l'augua se podría fer que o vellón s'estercillase. L'augua calient fa honra pa soltar a graixa d'a lana y a porquería, de vez que s'alisa y la fa tornar mas suave. O vellón se pretaba con as palmas d'as mans pa mirar que tot quedase debaixo de l'augua y garra parte en seco, pa que s'aprofitase bien o lavau.

Dimpués, en pasando uns minutos, se trascolaba la lana con una canasta pa que escurrise l'«augua de lana»[1] u «lanada»[1] sobre un tarraz u un balde. O proceso d'escurrir a lanada con a canasta duraba arredol d'un cuarto d'hora.

Alavez a lana se teneba que aclarir con augua bien limpia. Pa ixo, as mullers l'acarriaban con as canastas ta una fuent u ta o río an que de normal lavaban a ropa, y allí la aclareixeban capuzando la canasta en l'augua unas pocas de veces. Dimpués se teneba que sacar a lana y esbandir-la contra una piedra lavadera una vez a par d'atra pa que perdese l'augua, pero nunca frotando-la, y s'abatanaba contino con una paleta pa rematar-la. En rematar a lana yera limpia, pero se teneba que secar estendendo-la unas horas al sol pa que quedase presta pa o siguient treballo, que yera l'escarmenau.

Se veiga tamién[editar | modificar o codigo]

Referencias[editar | modificar o codigo]

  1. 1,0 1,1 BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Institución «Fernando el Católico» + Gara d'Edizions. Zaragoza, 2008. ISBN 978-84-8094-061-0