Esquira

De Biquipedia
Translate icon.svg Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.
No s'ha d'entivocar con «esquila».
Esquirando una uella.

A esquira[1][2] ye o proceso de tallar a lana cruda d'as uellas, que se fa tot d'una tongada por animal producindo un vellón. De regular se fa a la fin d'a primavera, quan d'una atra manera, si no se les sacase, os animals comenzarían a «permudar» a lana; ixo ye, a perder a lana con clapas, lo que fería que o vellón ya no valese cosa.

A esquira a modo tradicional s'ha de fer con tiento porque se fa con estixeras que tallan bien a ran d'a piel y en qualsiquier inte se le puede fer un tallo a l'animal. As uellas son animals que chacen a sobén sobre o suyo fiemo propio, con que as feridas feitas en a esquira regular que se les infectan y pueden acarriar a muerte de l'animal. Por ixa razón se fa una división d'o treballo y a esquira d'os vellons les corresponde a os hombres adultos que tienen más esperiencia.

O proceso d'esquirar o rabanyo d'una casa antes yera una fayena a-saber qué fatigosa, pos implicaba encorrer y chirar as uellas arredol d'a casa, zarrar-las en un corral u trancar con baranas una pleta u bel troz de carrera pa zarrar-las, esquirar, lavar os vellons pa sacar-les as zaforas, blanquiar-los... Por ixo, gosaba implicar a tots os miembros d'a familia y mesmo as diferents casas s'aduyaban entre ellas, prolargando a esquira de los uns y los atros entre toda una temporada, por lo que a más de a dureza d'o treballo tamién feba honra pa socializar.

Se veiga tamién[editar | modificar o codigo]

Referencias[editar | modificar o codigo]

  1. BLAS GABARDA, Fernando y ROMANOS HERNANDO, Fernando, El Aragonés de Baixo Peñas; Institución «Fernando el Católico» + Gara d'Edizions. Zaragoza, 2005. ISBN 84-8094-054-9
  2. BARCOS, Miguel Ánchel, El Aragonés Ansotano: estudio lingüístico de Ansó y Fago; Institución «Fernando el Católico» + Gara d'Edizions. Zaragoza, 2007. ISBN 978-84-8094-058-0