Konterbakom

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Konterbakom (en escritura iberica ) ye a transcripción fonetica literal d'os epigramas en signario iberico escritos en bellas monedas celtiberas de bronce cudidas en a primera epoca romana d'Hispania, cual ceca, seguntes as hipotesis mas aceptadas en a comunidat cientifica,[1] estió situada en una antiga ciudat dita Konterbia Belaiska u bien Contrebia Belaisca. As restas arqueolochicas d'iste oppidum se troban en o puesto dito Cabezo de las Minas en Botorrita, Zaragoza, (Aragón).

Metals y emisions[editar | modificar o codigo]

Contrebia Belaisca cudió dos emisions.[2] A primera, d'estilo mas clasico, en zaguerías d'o sieglo II aC. A segunda, con un estilo mas brocero, en primerías d'o sieglo I aC. En as dos feguran as inicials BE L en l'anverso, y en o reverso o epigrafe Konterbakom, que se traduz como un chenitivo: “d'os de Konterbia”. [3]

Metrolochía[editar | modificar o codigo]

A tamas de presentar leyendas indichenas, a suya metrolochía (pesos y leis) se basa en o sistema romano[4] con unidazs equivalents a os ases romanos y as suyas divisions: semises (metaz) y cuadrants (cuartos). Cal parar cuenta, manimenos, que s'ignoran as denominaciones reals que istos pueblos dioron a las suyas propias monedas, lo que ha levau a emplegar —talment erroniament— a terminolochía romana pa esprisar as valors indichenas conforme a o suyo peso y modulo. A unidat, equivalent a l'as, gosa medir entre os 22 y os 24 mm y o suyo peso oscila entre os 9,10 y os 7,51 g. Un semis puet medir entre 19 y 20 mm y pesar 5,02 g, y un cuadrant medir 15 mm y pesar 1,9 g.[5]

Dispersión[editar | modificar o codigo]

Istas piezas se troban con mas frecuencia en l'actual provincia de Zaragoza, en a de Teruel, y belunas tamién en as de Guadalachara y Cuenca.[6] En ellas, como en buena parti d'as que s'han trobau en a resta de l'antigua provincia d'Hispania Citerior, apareixe siempre en l'anverso una cabeza masculina y en o reverso un chinete portiando una lanza u una palma. En o reverso d'a moneda fraccionaria (semises y cuadrants) o chinete ye sustituyiu por un caballo y una luna creixient. En toz os reversos apareixe a dita leyenda Konterbakom en caracters ibericos.

Guillermo Fatás[7] aventura a hipotesi de que en cada rechión d'a Celtiberia tendría una mena de “capital federal” articulando-la politicamente, unica d'as ciudaz de dito territorio que produciría emisions d'archent. En o caso de Konterbia, —a tamas de no haber tals emisions— ista función vendría esplicita en o propio nombre d'a ciudat, seguntes autors que apuntan a la posibilidat de que Contrebia Belaisca se pueda traducir a o latín como Conventus Bellorum u "reunión d'os belos". Asinas Contrebia sería a ciudat prencipal d'os belos.[8]

Existen monedas con o epigrafe Belaiskom (d'os belos). Miguel Beltrán[9] las considera perteneixients tamién a Konterbia Belaiska,[10] encara que os trobos realizaus dica agora sinyalan a suya situación entre Osma (Soria) y Cervera del Río Alhama (La Rioja).[11]

Iconografía[editar | modificar o codigo]

As emisions de zaguerías d'o sieglo II aC amostran en l'anverso una cabeza viril mirando enta a dreita, peinau de "caracols", con tres caracols por dezaga d'a orella. A la dreita, debant d'a cabeza, amostra un delfín. Dezaga, a la ezquierda, en signos ibericos, a inscripción BEL. En o reverso, un chinete con palma, cabalgando enta dreita. Debaixo, en l'exergo[12], a inscripción iberica Konterbakom.[13]

Por a suya parti, as emisions d'o sieglo I aC amostran en o suyo anverso una cabeza viril chirada a la dreita, con peinau en dos livels. Debant, delfín, dezaga signos ibericos (BEL). En o reverso, un chinete lancero enta a dreita. O signo BA d'a inscripción de l'exergo apareixe una mica curvau. En os semises y cuadrants o chinete ye sustituyiu por un caballo galopiando enta a dreita, y dencima, una luna creixient entre dos globulos (en os semises) u tres globulos (en os cuadrants).[14]

Referencias[editar | modificar o codigo]

  1. (es) ALFARO ASINS, C. (1998), Historia monetaria de Hispania antigua.
  2. (es) Problemas en torno a la ciudad de Conterbia Belaisca. BELTRÁN LLORIS, Miguel. NVMISMA. Anyo XXVI. Num. 138-143. 1976. Pach. 80. Sociedad Iberoamericana de Estudios Numismáticos
  3. (es) La Moneda en el Aragón Romano. ROYO ORTIN, Marco L. Pach. 17
  4. ALFARO ASINS, C. et alii, op. cit..
  5. VILLARONGA, L. (1994), Corpus Nummun Hispaniae ante Augusti Aetatem.
  6. DELGADO, A. (1876), Nuevo Método de clasificación de las medallas autónomas de España.
  7. FATÁS, Guillermo (1986), Apuntes sobre la organización política de los celtíberos. (I Simposium sobre los celtíberos). pp. 9-18
  8. VILLAR, F. et alii (2001), El IV bronce de Botorrita (Contrebia Belaisca): arqueología y lingüística, Salamanca: Ediciones Universidad de Salamanca. pp. 34-35
  9. (es) Miguel Beltrán en GEA
  10. BELTRÁN LLORIS, M., op. cit..
  11. VILLARONGA, op. cit..
  12. (es) Definición "exergo"
  13. VILLARONGA, op. cit..
  14. VILLARONGA, op. cit..

Se veiga tamién[editar | modificar o codigo]