Eutrofización

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Con la calor y la contaminación un laco como este queda cubierto d'algas y bacterias con emisión de gas en bambollas mientres un par de semanas.

La eutrofización ye un augmento de la producción primaria en un ecosistema acuatico (especialment creiximiento u proliferación d'algas) como consecuencia d'abocamientos d'orichen agricola, ganadero u domestico que aportan nutrients inorganicos (fostatos, nitratos, nitritos), u organicos (organofosforatos, proteínas, ecetra). Afectan especiament a lacos, lacunas, pero tamién afectan a ríos y mars.

Eutrofización en zonas humidas continentals

En la eutrofización d'un laco, una lacuna u un entibo bi ha diferents etapas.

A lo principio bi ha una proliferación de lo fitoplancton, augmentando l'actividat fotosintetica. L'oxicheno que se chenera en la superficie sale a l'atmosfera mientres que abaixo mingua la luminosidat, se reduce l'actividat fotosintetica, mingua l'oxicheno disuelto, por lo que mueren los organismos anaerobios y fotosinteticos, que sedimentan en lo fondón, y con éls lo nitrocheno.

La perduga de lo nitrocheno fa que muera lo fitoplancton, que sedimenta en lo fondón y que amaneixcan las cianobacterias oportunistas capaces de fixar lo nitrocheno atmosferico. Las cianobacterias precisan de fosforo, que ye en exceso por los abocamientos agricolas, ganaders u domesticos. L'acumulación de materia organica que dimana de los restos de seres vivos permiten l'actividat de bacterias aerobias que consumirán grans cantidaz d'oxicheno pa metabolizar-la, creyado una situación d'anoxia que permitirá l'actividat de bacterias anaerobias en lo fondón que producirán la putrefacción de los sedimentos producindo gases putents como l'amoniaco, metano y sulfuro d'hidrocheno.

En bellas basas y lacunas eutrofizadas de la val d'Ebro s'observa la presencia de l'alga Cladophora en abundancia.

Eutrofización en las mars

En ciertas mars como la Mar Baltica, Mar Negra y Mar Mediterrania bi ha problemas d'eutrofización, tamién en ciertos estuarios. Se puet producir un augmento de diatomeas y d'algas que presentan toxinas, con mortaleras de peixes, aus marinas y mamifers marins.

Mesuras contra la eutrofización

Mesuras que se planteyan contra lo problema de la eutrofización son:

Fer servir fertilizant organicos como lo fiemo en cuenta de fertilizants quimicos.
Fer servir fertilizants, herbicidas y plaguicidas sinteticos d'una traza mes racional y eficient.
Deixar creixer las leguminosas entre diferents collitas pa enriquir lo suelo en nitrocheno.
Tractar los purins de las granchas.
Disminuir lo contenito en polifosfatos de los deterchents.
Tractar las auguas residuals en estacions depuradoras con tractamientos biolochicos y quimicos que eliminn los compuestos de fosforo y nitrocheno.