Eutrofización
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
La eutrofización ye un augmento de la producción primaria en un ecosistema aquatico (especialment creiximiento u proliferación d'algas) como conseqüencia d'abocamientos d'orichen agricola, ganadero u domestico que aportan nutrients inorganicos (fostatos, nitratos, nitritos), u organicos (organofosforatos, proteínas, ecetra). Afectan especiament a lacos, lacunas, pero tamién afectan a ríos y mars.
Eutrofización en zonas humidas continentals[editar | modificar o codigo]
En la eutrofización d'un laco, una lacuna u un entibo bi ha diferents etapas.
A lo principio bi ha una proliferación de lo fitoplancton, augmentando l'actividat fotosintetica. L'oxicheno que se chenera en la superficie sale a l'atmosfera mientres que abaixo mingua la luminosidat, se reduce l'actividat fotosintetica, mingua l'oxicheno disuelto, por lo que mueren los organismos anaerobios y fotosinteticos, que sedimentan en lo fondón, y con ells lo nitrocheno.
La perduga de lo nitrocheno fa que muera lo fitoplancton, que sedimenta en lo fondón y que amaneixcan las cianobacterias oportunistas capaces de fixar lo nitrocheno atmosferico. Las cianobacterias precisan de fosforo, que ye en exceso por los abocamientos agricolas, ganaders u domesticos. L'acumulación de materia organica que dimana de los restos de seres vivos permiten l'actividat de bacterias aerobias que consumirán grans cantidatz d'oxicheno pa metabolizar-la, creyado una situación d'anoxia que permitirá l'actividat de bacterias anaerobias en lo fondón que producirán la putrefacción de los sedimentos producindo gases putents como l'amoniaco, metano y sulfuro d'hidrocheno.
En bellas basas y lacunas eutrofizadas de la val d'Ebro s'observa la presencia de l'alga Cladophora en abundancia.
Eutrofización en las mars[editar | modificar o codigo]
En ciertas mars como la Mar Baltica, Mar Negra y Mar Mediterrania bi ha problemas d'eutrofización, tamién en ciertos estuarios. Se puet producir un aumento de diatomeas y d'algas que presentan toxinas, con mortaleras de peixes, aus marinas y mamifers marins.
Mesuras contra la eutrofización[editar | modificar o codigo]
Mesuras que se planteyan contra lo problema de la eutrofización son:
- Fer servir fertilizant organicos como lo fiemo en cuenta de fertilizants quimicos.
- Fer servir fertilizants, herbicidas y plaguicidas sinteticos d'una traza mes racional y eficient.
- Deixar creixer las leguminosas entre diferents collitas pa enriquir lo suelo en nitrocheno.
- Tractar los purins de las granchas.
- Disminuir lo contenito en polifosfatos de los deterchents.
- Tractar las auguas residuals en estacions depuradoras con tractamientos biolochicos y quimicos que eliminn los compuestos de fosforo y nitrocheno.
Bibliografía[editar | modificar o codigo]
- Diodora Calvo Aldea, Maria Teresa Molina Álvarez, Joaquín Salvachúa Rodríguez "Ciencias de la tierra y medioambientales". 2º Bachilleraro. 2010 McGrawHill.