Reptilia

Reptilia
Diferents reptils.
Clasificación scientifica
Dominio: Eukaryota Reino: Animalia Filo: Chordata Clase: Reptilia

Os reptils u Reptilia son una clase de cordatos gnastomatos tetrapodos. Se'n conoixen 9.320 especies arredol d'o mundo, quaternadas en 4 ordens: Testudines, Squamata, Sphenodontia y Crocodylia. Scientificament, as aus son un grupo especializato dentro d'os Reptilia.

Aparato dichestivo

Serpient minchando un engardaixo

En os reptils a boca gosa estar gran, y as comisuras d'alargan tipicament por dezaga d'os uellos. No bi ha ni mexiellas ni morros carnosos. Os quelonios tienen pico.

Bi ha dients en as dos mandibulas, insertos en una sola ringlera sobre os uesos premaxilar y maxilar d'a superior y exclusivament en o dentario d'a inferior. En beluns a més bi ha dients sobre os uesos d'o paladar (palatins y pterigoideus). Os dients son toz eguals (homodoncia), de forma conica, uncinata, utils pa agafar y retener as presas, no pa masticar, (encara que i ha habito ordens fósils con tendencias a la heterodoncia d'os mamifers).

Os dients gosan estar fusionatos a los uesos d'as mandibulas, en as marguins (dients acrodontos), en os laterals d'as caras internas (pleurodontos). En os crocodilians y en ordens fósils como os dinosaurios os dients s'anclan en uns alviolos como por eixemplo en os crocodilians. O reemplazo d'os dients gosa estar costant en tota una vida (polifiodoncia) con patrons alternants a fin que no i haiga tramos extensos sin dients en as mandibulas.

Siempre bi ha una luenga, queratinizata, luenga y áchil en os engardaixos y serpients (que la tienen con forma de forca) y poco móvil en os crocodilians y tortugas.

A boca tien tamién diferents tipos de glandulas salivars y en o caso d'os ofidios y o chenero Heloderma d'os saurios as glandulas salivars labials han esdevenito glandulas productoras de vereno.

O resto de l'aparato dichestivo s'achusta a lo esquema cheneral d'os vertebratos. O estomaco d'os crocodilians tien una porción glandular anterior y una porción posterior.

O intestín grueso gosa tener un ciego. A cloaca, a l'egual que as aus tien cierta complexidat de disenyo pa permitir recuperar augua, (adaptación a la vida terrestre), tanto a partir d'as feces como d'os pixatos. As feces s'almazenan en una primera cambra, o coprodeu, os pixatos en atra, l'urodeu, y dimpués se comunican con una cambra final, o proctodeu, que s'ubre a lo exterior.

Aparato respiratorio

Una tortuga respirando

A respiración no ye que pulmonar, de fueras d'os quelonios, que pueden tener una respiración bucofarinchia de poca importancia debant d'a pulmonar.

Os pulmons son dividitos en cambras y presentan graus de complexidat, dende os pulmons de Sphenodon y bells engardaixos que presenta sacos no guaire replegatos y no guaire més abanzatos que os d'os amfibios, dica masas esponchosas d'os varanos, tortugas y crocodilians, muito alviolatas y comparables a los pulmons d'os mamifers. Os ofidios pierden uno d'os dos pulmons.

En tot caso tienden a estar més complexos en a parte de debant, (por on siempre pasa l'aire dos vegatas), que en o fondón. Os mecanismos d'inspiración y espiración son més perfeccionatos que en os amfibios; pasan a tener un papel fundamental os movimientos enta dezaga d'as costiellas, movimientos que se fan con a musculatura intercostal. En beluns puet haber-ie un diafragma parcial, pero no ye completo que en os crocodilians, fendo que i haiga una deseparación completa entre as cambras toracicas y abdominal.

A larinche, part superior d'a traquia que s'ubre por a glotis a lo fondón d'a cambra bucal, amaneix sostenita por cartilagos especials (cricoides y aritenoides). En bells reptils (checonidos)y Crocodylia dica pueden plegar a producir sonitos. A mayor parte d'os reptils son manimenos mutos.

Aparato circulatorio

Imachen termografica d'un varano

A circulación en os reptils ye doble y incompleta, (en os crocodilians quasi completa).

Corazón

O corazón d'os reptils ye en o tórax por o desembolique d'o cuello, y a l'egual que o d'as aus y mamifers careixe de seno venoso y bulbo cardiaco. Por o lumero de cambras o corazón d'os reptils ye tipicament tricameral (pero en os cocodrilos ye tetracameral). As tres cambras son auricla dreita, auricla ezquierda (tabicación atrial completa) y ventriclo (tabicación ventricular incompleta, de fueras d'os crocodilians, que tienen tabicación ventricular completa, con ventriclo dreito y ezquierdo).

En l'aparato circulatorio cada vegata resulta mayor a separación d'as sangres arterial y venosa. A més d'as dos auriclas, tienen en o ventriclo un tabique, encara que incompleto que ye prou efectibo pa impedir cuasi de tot a mezcla de sangres e nimbiar a mayor parte d'a sangre venosa ta os pulmons (por as arterias pulmonars), y por atro, a mayor parte d'a ya purificata, procedent de l'auricla ezquierda a lo resto de l'organismo (por as gayatas aorticas).

En os cocodrilos a división plega a ferse completa: o tabique desepara de tot o ventriclo ezquierdo d'o ventriclo dreito, o primer exclusivament pa a sangre arterial y lo segundo pa la venosa.

Gayatas aorticas

Manimenos, encara que contina a tendencia enta una simplificación d'o sistema d'as gayatas aorticas, encara i persisten as dos correspondients a lo quatreno par, as gayatas sistemicas dreita y ezquierda. A ezquierdo sale d'o ventriclo més u menos centrato enfrent d'o tabique, por o que trasporta sangre mezclata. O sistema no resulta doncas tan perfecto como en aus y mamifers, os que no persiste que una gayata.

Tampo en os crocodilians o sistema ye perfecto, a penar que a deseparación completa d'os ventriclos, car a gayata ezquierda naixe en o ventriclo dreito, y leva sangra venosa, encara que pareix que reciba tamién sangre arterial por o foramen de Panizza, un forato chicot que comunica a suya base con a d'a gayata dreita.

As gayatas aorticas dreita y ezquierda d'o quatreno par se unen formando una aorta dorsal.

O par tercero de gayatas aorticas orichina o sistema carotídio, y o par seiseno, as arterias pulmonars.

Celulas sanguínias

Os globulos royos d'a sangre son siempre nucliatos y elipticos, convexos en as dos caras, més grans que en os mamifers pero muitismo menos lumerosos.

Aparato excretor

O sistema excretor d'os reptils se basa en un par de rinyons de tipo metanefros u rinyón terciario y un par d'ureters segundarios, como en as aus y mamifers.

O metanefros tien un gran lumero de nefronas, que no tienen ya nefrostomas ni se troban en disposición metamerica.

Os ureters segundarios sustituyen a los ureters primarios u conductos de Wolf, que esdevienen uns conductos a lo servicio exclusivo de l'aparato reproductor d'os masclos, pa trasportar espermatozoides y desembolique de glandulas anexas, mientres que en as fembras s'atrofian u desapareixen.

Os ureters segundarios desembocan dreitament en a cloaca, on apareix a vegatas una boxica urinaria (tortugas, tuatara y muitos saurios). Ye una formación que deriva embriolochicament d'a membrana alantoidea (endodermo), y que a lo prencipio no presenta garra relación con os ureters.

Bi ha diferents modalidatz d'excreción d'os productos nitrochenatos. Por un regular ye por meyo d'aceto urico, un producto que permite a reabsorción de gran cantidat d'augua en l'urodeu, con una traza que a la fin d'o proceso o pixato ye una espesa masa de color blanquenca. Ye una intresant adaptación pa no perder augua en l'ambient terrestre, y de feito se conserva siempre en os reptils de zonas aridas.

Manimenos os reptils aquaticos, que no han d'escusar augua, excretan fundamentalment urea y amoniaco (calapacos, crocodrilians). Os reptils marins a la fuerza precisan espulsar o exceso de cloruro sodico, y lo fan como as aus marinas, con glandulas especials, que en as tortugas de mar se troban en as orbitas oculars, a sal ye carreyata por as glarimas, mientres que en Amblyrhynchus se troban en as fosas nasals y en as serpients marinas en o paladar.

Tegumento

O cuerpo ye cubierto por una pelleta endurita. A peleta ye dividita en estratos:

• Profundo, con celulas que se subdividen de contino, aflorando a la superficie, que asinas como se fan viellas producen queratina.
• Externo, formato por a queratina d'as celulas muertas en forma de escatas.

A vegatas amaneixen placas osias dermicas. O tegumento tien pocas glandulas. O tegumento d'os reptils se caracteriza, especialment a diferencia d'os amfibios, por una notable queratinización y por a escaseza de glandulas, resultando-ne una pelleta dura y seca, adaptata a los inconvenients prencipals d'a vida en o meyo terrestre, (perduga d'augua y atros). A capa cornia d'a epidermis ye muito gruesa y desembolica unas faneras caracteristicas: as escatas cornias.

As escatas cornias no tienen garra relación con as d'os peixes u encara con as de bells amfibios, osias y d'orichen dermico. Estas faneras son muito sencillas en comparanza con as equivalents d'os mamifers y aus, os pelos y plumas (estas zagueras son homologas d'as escatas d'os reptils). No son que espesamientos d'a capa cornia deseparatos ente sí por zonas més finas que fan de superficies d'articulación.

As escatas pueden estar més u menos imbricatas, a vegatas muito, como se desbién en a superficie ventral d'as serpients, con amplas escatas utils pa la locomoción. Atras vegatas son grans y aplanatas, como se desvién en os cocodrilos u en a parte externa y visible d'a clasca d'as tortugas (escutos).

A vegatas prenen a forma de crestas, cuernetz, ecetra, pero a modificación més curiosa ye o cascabel d'os Crotalinae u serpients de cascabel. De todas trazas, as escatas cornias gosan estar muito costants en lumero y disposición dentro d'as diferents especies y grupos sistematicos, d'astí que os taxonomos las tiengan muito en cuenta pa fer as clasificacions.

As escatas, por un regular tota a capa cornia d'a piel, se renuevan periodicament, unas vegatas por simple desgaste, (tortugas y crocodilians), atras por descatación (engardaixos), atras por una verdadera muda u ecdisi (serpients y bells checos). En estos casos, enantes d'a formación d'una nueva capa cornia, amaneix una pelicula liquida de chos l'antiga, que una vegata formata, a pelleta antiga s'esgalla d'una vegata, o que se conoix en as serpients como a camisa.

Atras faneras han amanexito tamién por primera vegata en o curso d'a evolución en os reptils, asinas os picos, presents en bells dinosaurios, y huei en día en as tortugas, u as garras, cheneralizadas en os miembros marchadors de totz os reptils actuals.

Tamién se sabe que lo menos en bells reptils voladors d'a era secundaria (pterosaurios) poseyeban unas faneras en cierta traza comparables a los pelos d'os mamiferos, talment pa la protección termica.

A dermis d'os reptils a sobén desembolica de chos as escatas, elementos osios que sirven como refuerzo u defensa. Son os osteodermos u placas osias cutanias que amaneixen en muitos fardachos, pero que se desembolican especialment bien en os crocodrilians y as tortugas, en estas zagueras formando a parte interna d'a clasca. Unas placas osias en forma de V, ordenatas en series, apareixen en a cara ventral de crocodilians y rincocefalos: reciben o nombre de gastralia u costiellas ventrals y o suyo orichen ye muito antigo (lo trobamos en os amfibios estegocefalos). Talment sigan una prebatina evolutiva de protecher as partz inferiors d'a dureza d'o meyo terrestre. Estas gastralia son freqüents entre os reptils fósils y dica apareixen tamién en Archaeopteryx, una d'as primeras aus.

Poquismas glandulas bi ha en a pelleta d'os reptils y en tot caso, muito localizatas. Se'n pueden citar belunas, productoras d'olors, cheneralment holocrinas, en relación con l'actividat sexual u a demarcación d'os territorios. Por eixemplo as glandulas femorals se situan sobre a cara interna d'os muslos en os lacertidos y atros engardaixos, con un desembolique apreciablement mayor en os masclos que en as fembras. As glandulas dorsals y nucals d'os ofidios, as glandulas de l'almizcle que gosan amaneixer de chos a mandibula inferior d'os quelonios y crocodilians y tamién en a cluaca d'estos zagueros. Evidentement no en os reptils no bi ha glandulas sudoriparas.

A l'egual que en os atros vertebratos a color d'os reptils se debe pigmentos que levan os cromatoforos d'a dermis (melaninas, carotenoides, ecetra...), encara que lumerosos reptils presentan colors muito vistosas, bella vegata brillants, bells reptils son conoixitos por a capacidat de cambeyar de color, (metacrosi). Dende l'antiguidat os camalions son celebres, pero tamién bi ha metacrosi en as salamanquesas (checonidos), iguanidos, agamidos y atros.

Fundamentament en estos cambeyos no intervienen que os melanoforos, encara d'una estructura muito particular, car son provistos de lumerosas ramificacions, que se situan por dencima d'os xantoforos y guanoforos y que son capaces de modificiar a repartición d'os granos de melanina en o citoplasma. Una concentración de melanina produce un aclaramiento de l'animal y fa que se manifiesten con atra intensidat d'os atros pigmentos. Os mecanismos determinants d'ixos movimientos d'a melanina son prou complexos y varían d'uns a atros reptils, d'una traza que encara que han estato prou estudeyatos, encara nos se conoixen con precisión. Prencipalment os estimulos desencadenants son visuals, pero tamién intervienen a temperatura, l'acción d'a luz dreitament sobre a piel, en animals cegatos esperimentalment por eixemplo u diferent grau d'excitación nerviosa de cada animal. O control d'os melanoforos en os camalions (Chamaeleo) se desvién por vía nerviosa, pero en atros reptils, como en o iguanido Anolis carolinensis, pareix tener que veyer con as hormonas. En este caso o escurimiento se produce por l'acción d'a intermedina u MSH, (hormona dispersadora de la melanina), que se fabrica en a part intermeya d'a hipofisi, mientres que l'aclarimiento se produce a espensas de l'adrenalina. Encara bi ha atro caso, o d'atro iguanido Phrynosoma, en os que o control pareix misto, hormonal y nervioso. O significato adaptativo d'estos cambeyos tamién se discute, se puet escar en a homocromía que proporciona con o meyo, util pa escapar d'os predadors, pero se suchiere que puedan afavorir a termorregulación, lo menos en bells reptils. Tarentola mauritanica y d'atros son més escuros de nueit y més claros de día, en una alternancia fácil que siga por un ritmo circadián endochen.

Sistema nervioso

O encefalo d'os reptils ye més abanzato que o d'os amfibios. Bi ha cinco partz: telencefalo, dielencefalo, mesenzefalo, metencefalo y mielencefalo. En os escatosos bi ha un neopalio, acumulación de materia grisa en a superficie. Os crocodilians tamién tienen neopalio, encara poco desembolicato.

Aumenta a mida d'os hemisferios cerebrals d'o telencefalo, en os que ya bi ha un neopalio. Manimenos, o desembolique d'una crosta cerebral ye encara escasismo en comparanza con os mamifers, mientres que os cuerpos estriatos en o telencefalo y o teito optico en o mesencefalo presentan una gran impotancia: o celebro, por un regular no ye mal desembolicato, pero careixe practicament de lobulos laterals. En conchunto a suya estructura ye més pareixita a la d'o encefalo d'as aus que a la d'os mamifers, y a suya mida ye redueita. Sobre tot en relación con a masa corporal d'os reptils grans, particularment os dinosaurios.

Un detalle de grant intrés se troba en o diencefalo d'os reptils o dito complexo pinial, que apareix en posición dorsal y consta d'una glandula de funcions poco conoixitas (episifi), y, a vegatas (tuatara y bells saurios), d'un uello pinial, con homolochía u no con os uellos parietals, que hemos bisto, por eixemplo en os agnatos actuals, encara se discute. Este tercer uello s'acofla en un foramen entre os uesos parietals y presenta estructuras (lent, retina y niervo) perfectament comparables a las d'os verdaders uellos. En os reptils estinguitos se troban foramens pareixitos, por o que tamién se i suposa que a presencia de uello pinial.

O cerebelo ye poco desembolicato.

Aparato locomotor

O esqueleto ye osificato de tot. Bi ha 2 vertebras sacras. Con quatro patas y cinco dedos por un regular.

En conchunto os reptils no tienen un esqueleto guaire diferent d'o d'os amfibios. Entre as diferencias trobamos una mayor rechionalización d'o esqueleto axial, (a penar que puedar haber-ie costiellas en totas as rechions), ya bi ha un cuello prou marcato, con un lumero variable de vertebras, important porque aumenta a movilidat d'a cabeza respecto a lo tronco. Se modifican as dos vertebras primeras, atlas y axi, y l'axi s'articula con o cranio por meyo d'un solo condilo occipital, a vegatas trilobulato. Por un regular aumenta a solideza d'a columna, con vertebras que s'engranan firmement unas con atras por meyo de procesos (zigapofisis) adrezatos enta debant y enta dezaga. En bells reptils primitivos as vertebras son anficelicas, por o que entre unas y atras pueden persistir restos d'a notocorda (Sphenodon) pero as d'os actuals son por un regular procelicas.

O cranio d'os reptils hereda patrons d'os amfibios estegocefalos con més fidelidat que os mesmos amfibios actuals, prou involucionatos en este sentito. En tot caso tiende a una simplificación y se troba osificato quasi de tot. En a suya estructura destaca por a importancia a la ora d'estudear a evolución a part lateral d'a boveda dermica, dita rechión temporal on bi ha tendencia a formar-se finestras pa facilitar a inserción d'os musclos masticadors. A mayor parte d'os reptils actuals presentan en orichen un cranio con dos finestras en cada costato, una por dencima y atra por debaixo d'os uesos postorbitario y escamoso, que se unen por a metat (cranio diapsido).

Atro rasgo con intrés ye a tendencia a lo desembolique d'un segundo paladar en a cambra bucal, por meyo de prolongacions laminars de diferents uesos: premaxilars, maxilars, palatins, etz..., d'una traza que as narinas internas levatas enta dezaga, s'ubren dreitament a la farinche, como se vei ya en os crocodilos. Esta fita ye important, porque permite respirar con normalidat encara tenendo ocupata a cambra bucal.

A mandibula inferior amaneix formata por 6 uesos diferents, a vegatas menos, d'os quals o dito articular ye precisament o que forma l'articulación en o cranio meyant o ueso quadrato. A sobén ye móvil y a movilidat suya se troba en relación con atra més u menos acusata d'a mandibula superior y part de debant d'o cranio (cinesi) o que pareix tener utilidat en a captura y deglución de presas grans. A l'egual que en os amfibios ni bi ha que un ueso entre o timpano y l'oido interno, a columela, derivata d'o hiomandibular.

Miembros locomotors y cinturas tienen tamién basicament o modelo d'os amfibios, con a suya orientación lateral a lo cuerpo y humers y fémurs en principio més u menos horizontals. En os reptils actuals muitas vegatas os miembros se reducen y desapareixen (Amphisbaenia, Serpentes), mientres que en os reptils fosils trobamos intresants modificacions pa diferents fins, incluitos o vuelo y la natación.

En a cintura peitoral suelen desapareixer os cleitros, de fueras de bells reptils muito primitivos, con una traza que totz os antigos components dermicos d'esta no quedan ya que as claviculas pars y una interclavicula. En a porción endocontral as escapulas y coracoides prenen por o contrario cada vegata menor importancia. Estos en posición ventral colaboran a cerrar por a part inferior a cambra toracica chunto con o interclabicular, un amplo esternón y porcions esternals d'as costiellas.

Muitos reptils encara que no totz careixen d'epifisis en os cabos d'os uesos, por o que nunca no termitan d'osificar-sen y pueden creixer tota a vida. Esto explica que os reptils no pleguen a tener una talla de pa cutio en o suyo creiximiento como en os mamiferos y puedan tener midas excepcionals en individuos viellos: engardaixos, serpients, crocodilos y tortugas.

Bibliografía

• Adolfo Aguilar, Eduardo de Juana y Arturo Morales. Historia Natural, tomo 6 Zoología - Vertebrados. Carroggio, 1989.

Enrastres externos

• Se veigan as imáchens de Commons sobre Reptilia.
• Wikispecies tiene un articlo sobre Reptilia.