Dinastía d'os Paleologos
Os Paleologos son una dinastía que gobernó en l'Imperio Bizantín dende 1261 dica 1453.
O 21 de chulio de 1261 as tropas de Miguel Paleologo prenioron Costantinoble y facioron fuyir a Balduín II ta Occident, feito que se considera como una reconstrucción de l'Imperio Bizantín u Imperio Román d'Orient. Miguel Paleologo esdevinió Miguel VIII. O Imperio Bizantín de Miguel VIII yera achiquiu respecto a l'imperio anterior a la quatrena cruzada y rodeyau por estaus independients y hostils: Imperio de Trapisonda, Despotau d'Epiro, Ducau de Neopatria, Ducau d'Atenas, Principato de Morea, y las plazas costeras d'os chenoveses y venecians. Os chenoveses y venecians teneban en lurs mans totz os antigos nuclios comercials bizantins que serviban d'enlace con Orient.
Con l'aduya d'a diplomacia y a fuerza Miguel VIII enfeblió as pretensions d'os poders d'occident: o Papato, Carlos d'Anchú, Venecia.
Manimenos baixo os succesors de Miguel VIII os turcos, especialment os otomans conquirioron quasi tota Asia la Chica y os serbos s'amanaban a Costantinoble. Os paleologos podioron aturar o abance turco en Anatolia occidental y a costa Echea bell tiempo con l'aduya d'os almogávars, pero dimpués de traicionar-los os turcos podioron tornar a abanzar.
Quan Chuan V s'asentó en a cadiera imperial l'imperio se reduciba a Costantinoble, Tracia, Salonica y bella isla, (os atros territorios los heban conquiestos os serbos u bulgaros u yeran en a practica autonomos, como Morea). Chuan V miró l'aduya de Roma en 1355, 1366 y 1369. En tiempos de Chuan V (1341-1391) os turcos otomans entroron en os Balcans ya de pa cutio, dirichius por Murat I y conquirioron Tracia, Filinopolis y Adrianopolis, preferindo dedicar-se a la conquiesta de territorios en os Balcans en cuenta de conquerir a ciudat de Costantinoble. Os turcos iban abanzando en a conquiesta d'os Balcans, vencendo a los serbos en 1389 en a batalla de Kosovo y poco dimpués a los bulgaros.
Baixo Manuel II (1391-1425) y Chuan VII (1425-1448) os otomans plegoron a reducir l'Imperio Bizantín a la capital y pocos puestos més. Os emperadors bizantins demandaban aduya a las cortz occidentals pero no conseguían ni res. O 29 de mayo de 1453 Mehmet II prenió Costantinoble y l'emperador Costantín XI morió en a suya defensa.