Colla Chobenil d'a Fabla

De Biquipedia
Ir a la navegación Ir a la búsqueda

A Colla Chovenil d'a Fabla yera una asociación chovenil fundada en Zaragoza en 1980 ta esfender, reivindicar y promover l'aragonés en Zaragoza. Os suyos fundadors estión chent choven que procedeba d'os ambients que complegón en a ideya de treballar por l'aragonés. D'una man chent que procedeba d'o mundo d'a cucha, vinculada a la JGRA (Choven Guardia Roya d'Aragón) como Fernando Romanos, Andrés Tello, Michel Valiente, Gregorio Martinez y chent independent que s'achuntaba en o colechio d'Agustinos de Zaragoza, como Juanjo Gaudioso, Francho Vicente, Francho Beltrán, Lorién Majarena. Dimpués, a os fundadors s'achuntó más chent como Luis Gayán, Ricardo Arguís, Ricardo Párraga "Chiri", Toñin Navarro, Roberto Serrano, Pilara López y Ramón Lambán.

Pegallo d'a Colla Chobenil d'a Fabla

As primeras accions estión reivindicativas y de difusión. Pero tamién empecipió esta colla a fer cursos d'aragonés en a Casa de Choventut de Ciudat Chardín de Zaragoza y ficar una mesa informativa y de venta de materials en aragonés en o centro de Zaragoza totz os domingos y tamién en conciertos y fiestas. Tamién editón o boletín Rebellar feito en aragonés y que con una tirada de 300 eixemplars difundiba l'aragonés y lo reivindicaba.

A seu d'a Colla Chovenil d'a Fabla estió en primerías en a carrera Borderas de Zaragoza, an que o PTA (Partito d'o Treballo d'Aragón) teneba a suya seu, dimpués amprón en o PSA una seu en a carrera Canfranc de Zaragoza.

Participón como miembros en a Chunta d'Aduya a ra Fabla Aragonesa coordinadora que achuntaba a las asociacions que alavez triballaban per l'aragonés y que fayó una replega de firmas refirmando un manifiesto d'aduya a la fabla aragonesa.

En Chinero de 1980 empecipión as primeras reunions en o bico de San Chusé, ta decidir o nombre, as primeras accions y a forma de dar-se a conoixer. Estas accions estión reividicativas y de difusión, pegallos, cartels, pintadas, murals, mesas informativas. Tamién fación os primers cursos en a casa de choventut de ciudá chardín y empecipión a treballar en un diccionario de pocha que dimpués editarían baixo o logo de o Ligallo de Fablans de l'Aragonés. Editón o boletín Rebellar y participón en manifestacions aragonesistas con pancartas y en a coordinadora Chunta d'Aduya a la Fabla Aragonesa.

En chinero de 1982, dimpués de dos anyadas de funcionamiento, fación un documento de treballo que planteyaba como primera linea de treballo d'esta asociación integrar-se en o consello d'a fabla aragonesa y fer un "ligallo de o consello en Zaragoza" fendo fuerza en a difusión, meyos de comunicación, amostranza y reivindicación.

En febrero de 1982 fación una conferencia ta debatir o treballo feito y as posibilidatz de futuro, allí se veyió a necesidat de treballar dillá de l'ambito chovenil, contactar con fabladors patrimonials que viviban en Zaragoza y contar con a estructura legal ta poder funcionar de forma eficaz, lo qual, levó a os fundadors y a más chent que se les heba iu achuntando, a formar en l'anyada 1982 una asociación cultural legalizada, o Ligallo de Fablans de l'Aragonés.