Cichorium
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
- «Chicoria» y «achicoria» reendrezan ta iste articlo. Pa atros usos d'o fitonimo «chicoria» se veiga Chicoria (desambigación).
| Cichorium | |
|---|---|
 | |
| Denominacions populars | |
Chicorias, achicorias, chicoiras, achicoiras, chicoinas, chocorias, chocainas
| |
| Clasificación scientifica | |
| Eukaryota | |
| Plantae | |
| Magnoliophyta | |
| Magnoliopsida | |
Subclase:
|
Asteridae |
| Asterales | |
| Asteraceae | |
Subfamilia:
|
Cichorioideae |
| Cichorieae | |
| Cichorium | |
| Descripción | |
Cichorium
L., 1753 | |
As chicorias[1] u achicorias[1] (scientificament Cichorium) son un chenero de plantas herbacias en a familia d'as asteracias que concabe especies como Cichorium intybus, una hierba silvestre muit común, y Cichorium endivia, con variedatz d'uso culinario que se conoix popularment como escarolas.
Descripción[editar | modificar o codigo]
As chicorias son siempre plantas herbacias no lenyosas. Producen una roseta de fuellas que se debanta a poco sobre o suelo, con un tallo curto en as primeras fases d'o suyo desarrollo vechetativo.
As fuellas tienen distribución alterna arredol d'o tallo, y son más largas que amplas, enteras, lancioladas u ovo-lancioladas, d'aparencia fresca, a sobén con espiclas en o revés.[2] O limbo foliar gosa aparentar dentadura u estar aserrau, nunca no liso. A radiz ye napiforme, central, y almagazema nutrients que a planta emplega en a florada y fructificación.
En a florada a planta cambea a-saber-lo a suya morfolochía. O tallo se prolarga verticalment dica poder pasar d'o metro d'altaria.[2] As fuellas funcionals, as d'a roseta chovenil, s'ixecan y cayen. O tallo comienza bien luego a ramificar-se (de forma dicotomica) y en os forcons amaneixen fuellas nuevas, más chicorronas que as d'as fases anteriors d'a planta.
As flors son azuls[2] u moradas, de color muit viva, y brostan en numero par en un involucro en o extrimo de cada tallo floral, refirmadas por dos (u multiplo de dos) bracteyas por cada involucro.[2] Os petalos en a corola son fusionaus lo menos por a base, pero en bells casos dica la punta.[2] Os estambres son poco vistables, en o centro d'a flor y fusionaus por l'antera.[2]
Os fruitos son vilanos monospermos, aon que as escratas voladeras son más curtas que o fruito.[2] Dimpues d'haber-se produciu o fruito, a planta muere. Os tallos florals d'a segunda fase vital d'a planta gosan quedar-se de piet, secos, en forma de lastons, dica que o tempero y a calamón les fan vulcar-se.
Habitat[editar | modificar o codigo]
As chicorias habitan en una ampla diversidat de suelos, dende calsineros dica silicios u basalticos, siempre que i troben qualque cosa de compuestos nitrochenaus, pues son plantas mayoritariament nitrofilas. Ista preferencia por o nitrocheno fa que se'n gose trobar en arias humanizadas u aon que i haiga presencia freqüent d'animals (en a naturaleza, os compuestos nitrochenaus en o suelo dimanan con muita freqüencia d'as deposicions -fiemo y orina- d'os animals, u bien d'o contacto entre a tierra y l'aire atmosferico quan se'n ha feito un movimiento). Por ixo son hierbas habituals en as marguins d'os camins, cunetas de carreteras, pratos, uebras, articas, femallas y un largo etcetera de micro-habitats que tienen l'acción de l'Hombre como denominador común.
As chicorias precisan un buen grau d'humedat en a tierra mientres que creixen, y como a mayoría son encara funcionals a temperaturas baixas, muitas forman y fan creixer a suya roseta de fuellas principals en os meses de l'hibierno. A florada se desviene en os meses de más calor, qualques especies en a primavera y belatras en os meses estivals. S'ha descrito o comportamiento de florada d'as especies con interés economico, como a escarola, y pareix que a disminución d'a humedat en o suelo podría estar o factor desencadenador.
Imáchens[editar | modificar o codigo]
Fuellas basals de C. intybus.
Flor.
Florada de Cichorium endivia, a escarola domestica.
.jpg)
Referencias[editar | modificar o codigo]
- ↑ 1,0 1,1 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
- ↑ 2,0 2,1 2,2 2,3 2,4 2,5 2,6 (es) BLASCO-ZUMETA, Javier. Cichorium intybus en Flora de la Ribera Baja de Ebro.
Vinclos externos[editar | modificar o codigo]
Se veigan as imachens de Commons sobre Cichorium.
Wikispecies tiene un articlo sobre Cichorium.
