Carnaval d'a Fueva

De Biquipedia
(Reendrezato dende Carnaval d'A Fueva)
Ir a la navegación Ir a la búsqueda
Escudo d'a Fueva

O carnaval d'a Fueva ye un carnaval popular que se fa en o municipio d'A Fueva, en a comarca d'o Sobrarbe, en o mes de frebero. En comparanza con belaltros carnavals d'o Sobrarbe, o carnaval de A Fueva no tiene garra presonaches arquetipicos como en son as trangas y as madamas d'o de Bielsa, o Cornelio que se fa montar en a burreta en o de Chistau, ni os cazataires d'o de Torla. Manimenos, se tracta d'una festividat popular en a que cadagún puede presentar-se-ie disfrazau como millor goi le faiga.

O carnaval d'a Fueva ye organizau como una ronda d'as que popularment se fan en as fiestas d'as localidatz de a comarca, pero de forma coordinada d'entre os participants d'as diferents aldeyas y lugars que fan parte d'o municipio, tranzando-se un planning previo d'os lugars y as horas quan que se gosarán concentrar os participants en cada lugar.

A organización d'o evento corresponde a l'«Asociación Cultural A Redolada d'a Fueva», que cara ta nadal anterior expublica o planning que se i seguirá. Os desplazamientos d'entre os lugars se fan en caravana, con vehiclos privaus que meten os propios participants, en cheneral as cheneracions más chovens, mientres que os más grans se quedan en casa ta sacar a bandeja t'altri (convidar-les a lamins, canapés u gotetz de porrón, como ye tipico en as rondas). Isto le da a o carnaval una condición excepcional d'estar itinerant.

A la contra de como se ye fendo istes zaguers anyos o carnaval d'a villa de Bielsa, que s'ha limitau en horario de tardes, o carnaval d'A Fueva como tamién o de Chistau ocupa tot lo día. Ta no solapar-se con os altros tres carnavals «famosos» d'a comarca, se gosa pactar con a organización d'ixes altros o cabo de semana en o que a la fin se fa, derrepartindo-se d'entre totz ellos os cabos de semana disponibles d'o mes de frebero.

Se veiga tamién[editar | editar código]