Protobulgaros
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Os protobulgaros estioron un pueblo nomada que habitaba en as estepas d'Europa Oriental. Una parte d'ellos trescruzó o Danubio invadindo l'Imperio Romano d'Orient y ocupando Moesia, a on se fusionó con a población sedentaria eslava y traco-romana contribuindo a la formación d'o pueblo eslau bulgaro. Atra parte d'ellos formoron un reino en a cuenca d'a Volga que duró dica a invasión mongola d'o sieglo XIII. Se suposa que yeran un pueblo turquico relacionatos con os hunnos y os chuvaixes y que tamién han contribuito a la formación d'os pueblos tartaros d'a Volga.
L'arqueolochía documenta en o sieglo VI a presencia d'una cultura atribuible a los protobulgaros en as estepas ponticas, vecins orientals d'os eslaus. Corresponden a los protobulgaros as tumbas prencipescas de Perescepino, Glodosy y Voznesenka, con vaixiellos bizantins, armas y choyas.
Pareixe que i heba a lo menos cuatro brancas u cuatro zonas con población protobulgara:
- En a val d'o Kubán.
- Os Utrigurs, que dimpués quedaría establita en o baixo Kama.
- Os Cutrigurs, a lo norte d'o Baixo Danubio.
- Una branca que yera por Europa centro-oriental y que entró en Italia con os longobardos.
Enantes d'a deseparación definitiva d'as dos brancas supervivients d'o pueblo protobulgaro nomada heban plegato en un apocheu baixo o Khan Kubrat. A invasión d'os Gazaros los deseparó.[1]
O estato Protobulgaro de Mesia
Enta la década de 670, una branca d'o pueblo protobulgaro baixo o mando d'o Khan Asparukh crució o Danubio y ocupó o norte d'a provincia romana de Mesia. Os bizantins no podioron evitar-lo y rematoron acceptando a perda d'este territorio. Os protobulgaros facioron liga con siet tribus eslavas que yeran en a ribera d'o Danubio, y se creyó un estato que se convertió en o Primer Imperio Bulgaro. O prencipe bulgaro Tervel establió buenas relacions con Chustinián II y firmó un tractau comercial con Costantinoble.[2]
O Khan Crumo (803-814) pautó con Carles Magno y atacoron chuntos a los avaros, desfendo o estato avaro, pa dimpués repartir-sen Panonia entre Bulgaria y l'Imperio Carolinchio con o río Tizsa como muga.[2]
A introducción d'o cristianismo como relichión oficial d'o Primer Imperio Bulgaro con una liturchia en eslau fació que os protobulgaros, de luenga turquica, s'eslavizasen y que con o tiempo toz os pueblos eslaus d'o estato bulgaro se convertisen en un pueblo solo conoixito tamién como "bulgaros".
Referencias
- ↑ Hermann Kinder, Werner Hilgemann, Manfred Hergt Atlas Histórico Mundial. De los orígenes a nuestros días Akal, 2007. p 117
- ↑ 2,0 2,1 Gabriela Makowiecka, Estanislao Macowiecki La Cultura Eslava Editora Nacional
Bibliografía
- José-Ramón Julià et al Atlas de historia universal. Tomo I de los orígenes a las crisis del siglo XVII. Editorial Planeta.
- Hermann Kinder y Werner Hilgemann Atlas histórico mundial. Ediciones Itsmo.